Hebrews 5

Totaliyao sinabwadi Yaubada 'iesinuwedi ga 'iaseyedi, be tauna matanaya sitalitaliya 'abo'ada tomota 'ida bubuna to'umalidi manudi. 'Ida totaliyao nidi sida bubuna nuwana toemwagemwageyao be toloegesiyao 'ediya, manuna totaliyao tomota tuga, ma idi neneta. 'Enega taudi 'idi to'umalinao manudi, ta wate tomota yaudi 'idi to'umalinao manudi, sitalitaliya Yaubada 'ena.

Nigeya sawesawenaya be 'ebweu yaita tauna 'ina nuwenuwega 'ietotaliya, ta Yaubada esi 'ina esinuwega, nadigega lowa Yaubada Eloni 'iesinuwena ga 'ietotaliya. Wate nadigega Keliso nigeya tauna 'igilagilagasi be 'ietotaliya, ta Yaubada 'iesinuwena ga 'ieonena, 'igwae,

“'Oyo natugu. Batuwa tuga ya'awa natunemu.”

Ta wate 'ina ona 'eluwena, 'igwae, “'Oyo 'uetotaliya ataya nadigega Melikisedeki.”

Lowa Yesu bale'uya 'imiyami, ma ina dedoi 'isidasida Tamana 'ena, be nuwanuwana mwawasega 'i'etoseye, 'enega 'i'etoseyenaya manuna Yesu Tamana 'i'amayabena. Yesu nina Yaubada natuna, ta tuwa tuga 'elouya 'ilobena ga 'ina 'alama'i'itega 'iematamatana 'ai'aila, ga 'enega 'ina bubuna maibo'ana palupaluna. 'Enega 'abo'ada wate 'abo taematamatanei, 'etoseyana ataya Yesu nina 'enega taloba, 10 manuna Yaubada Yesu 'iaseyena be 'ietotaliya ataya nadigega Melikisedeki.

Geya'abo Yaubada taguiguitoyase

11 Yage gete manuna ona yauna simiyami, nuwanuwagu be yasimanedi 'emiya, ta nigeya kapekapeyana, manuna tenami tuituidi. 12 Tuta gete 'ilobwenemi be mali tomota wae'itadi ta nigeya sawesawemiya, manuna Yaubada tetelina 'ana 'autui nigeya wamwalamwalatoni, 'enega 'etamo 'ae'ie'itami. 'Omi susu namo 'ilobwenemi manuna masula pa'alina nigeya 'ilobwelobwenemi. 13 'Enega 'omi gogama nadigega, e'ita palupaluna manuna nuwami nigeya 'isabwasabwalena 'ai'aila, 'enega 'ilobwenemi be e'ita nuwadi 'ediyega 'ae'enimi nugana.

14 Ta 'abo yaisigedi 'idi mwalatoi 'imatuwa, taudi 'atuwa masula pa'alina 'ana to'aiyao, manuna nuwadi ni'atu 'isabwalena ga sawesawediya siesinuwa to'ase bobo'ana ta to'ase to'umalina.

Copyright information for `DOB