Hebrews 7

Totaliya Melikisedeki

Ta Melikisedeki nina me Salema 'idi kini, ta Yaubada Toloetana sana 'ina totaliya. Lowaenei Melikisedeki nina Ebelaamo 'ilobena, tuta nina losaiya 'enega 'iilailama. Ta Ebelaamo nina toloinao yaudi ma 'adi bodao ni'atu 'ipe'udi, 'enega Melikisedeki Ebelaamo 'iona obobomena. 'Enega Ebelaamo 'ina gwegweyao 'iweyalidi egueguyai sanau 'adi yau, ga egueguyai 'ebweuna Melikisedeki 'i'ebwa'ena, ta Ebelaamo tauna naini 'i'ewedi.

Ta Melikisedeki 'ana esana 'ana gibui “Toloina palupaluna,” ta 'ina sena 'ana esana Salema, 'ana gibui “Siwalowa,” 'enega tamwalamwalatoni 'aene Melikisedeki tauna ina loina siwasiwalowina.

Ta Melikisedeki nina nigeya tamanamo ta nigeya sinanamo, ta wate nigeya 'ina susumo, ta 'ina tubuwa be 'ina mwawasa nigeya 'adi mwalatoimo, ta esi 'atuwa nadigega Yaubada natuna 'ietotaliya ataya Yaubada 'enaya.

Ona'ai'aila, Melikisedeki nina 'ebweu 'inapwana ta toloetana sana, ga Ebelaamo 'iloetana sinena, ta Ebelaamo 'ina gwegwe 'enega tupwana 'i'ebwa'ena Melikisedeki. Ta totaliyao taudi Libai 'ina bodao 'idi gwegwe tupwana si'ewa'ewa 'abo'ada Ebelaamo tubunao 'edega, manuna taudi be 'abo'ada susu 'ebweuna, ta wate ma 'adi loina gwegwe 'ana 'ewa tomota 'ediyega manuna. Ta Melikisedeki mali susu, ta 'ina miya loetana namo, 'enega gwegwe tupwana 'i'ewena Ebelaamo 'enega. 'Enega wate Melikisedeki 'ina ona oboboma Ebelaamo 'i'ebwa'ena. Ebelaamo nina tai sinabwana, manuna Yaubada 'ina onaupaupa 'i'ebwa'ena, ta Melikisedeki Ebelaamo 'iloetana sinena, manuna tuta yauna taudi 'adi esana sinabwadi 'idi ona oboboma si'ebwa'ebwaya tomota taudi 'adi esana gidalidi 'ediya, 'adi lema manuna, 'enega wanuwa'i'isi 'aene Melikisedeki 'ina ona oboboma Ebelaamo 'i'ebwa'ena. Gete tugai Libai 'ina bodao 'ida gwegwe tupwana si'ewa'ewa, ta taudi ma'etamo simwamwawasa, ta Melikisedeki tetelina 'aene tauna miyamiya atayana. Batuwa 'ida gwegwe 'ana tupwa ta'ebwa'ebwaya Libai tubunao 'ediya, ta lowa 'ana 'ita 'atuwa Melikisedeki nina gwegwe 'ana tupwa 'i'ewena Libai 'enega, 10 manuna Libai ma'etamo tubuna Ebelaamo solanaya, ta Ebelaamo Melikisedeki 'edaya 'ilobena, ga 'ina gwegwe 'ana tupwa 'i'ebwa'ena.

11 Libai tubunao taudi 'idi guinuwa Yaubada 'ina loinao me Isileli sie'itada, ta loina nina nigeya sawesawenaya 'igiepalu 'ai'ailida, 'enega nuwanuwada 'ebweu totaliya auwauna be 'igiepaluda. Totaliya nina nadigega Melikisedeki, ta nigeya Eloni matubunao nadigega. 12 'Enega 'eguma totaliya tasa'u gelasedi loina wate tasa'u gelasedi.

13 Tamwalamwalatoni 'aene Keliso tauna 'ida totaliya auwauna, nigeya Libai 'ina susu 'enega 'imeema, 14 ta esi Yuda 'ina susu 'enega 'imai, taudi nigeya esinuwa silobaloba Mosese 'enega be sietotaliya.

15 'Enega 'ida totaliya auwauna Melikisedeki nadigega. 16 Nigeya Mosese 'ina loina 'enega 'ietotaliya, ta esi yawasina miyamiya atayana ta waiwaina 'enega. 17 Tauna Yesu manuna Buki Tabu 'igwae,

“'Oyo 'uetotaliya ataya, nadigega Melikisedeki.”

18 Ona'ai'aila, Mosese 'ina loinao nigeya sawesawediya be 'ebweu to'ase sigiepalu 'ai'aili. 'Enega gimi loina tapilisinena, manuna nenetana, ta 'enega emisa auwauna ta bobo'ana 'iapwesama, be emisa nina 'enega Yaubada taloselabe. 20 Ta 'abo'ada 'ida emisa Keliso 'ena 'imiyami. Ta Yaubada Keliso nina lowa 'iona obobomena. 21 Gimi totaliyao nigeya Yaubada 'ina ona oboboma silobaloba. Ta Yesu namo manuna 'igwae,

“'Inapwana ni'atu 'iona upaupa be 'oyo 'uetotaliya ataya, ta onaupaupa gete geya'abo 'iligeligei.”

22 'Enega Yesu 'ina loina auwauna tamwalatoi 'ai'ailina 'aene loina kadekadelina 'ibobo'ana sinena.

23 Lowa gimi totaliyao mali 'epata be mali 'epata 'ediya ma 'adi boda be 'aidi simwawamwawasa, ta auwaudi sieelopa'eludi. 24 Ta Yesu tauna 'ida totaliya ataya, 'enega nigeya 'ana lopa'elumo. 25 Ta Yesu nina tuta maibo'ana sawesawenaya 'i'etoseyeda, 'eguma 'ana emisega talulugu Yaubada matanaya, manuna Yesu miyamiya atayana, ta tuta yauna manuda 'isidasida Yaubada 'ena.

26 Ona'ai'aila, Yesu nina sawesawenaya be 'ietotaliya manuda, manuna tauna adelina maibo'ana bobo'ana tuga, ta nigeya nadigega toto'umalida 'abo'ada, 'enega Yaubada Yesu nina 'igilagasina, ga galewa 'ana tomiyanao 'iloetana sinedi.

27 Ta gimi totaliyao 'asiyata 'ebweuna 'ebweuna Yaubada 'ena sitalitaliya, taudi 'idi to'umalinao, ta tomota wate 'idi to'umalinao manudi. Ta Yesu ma'ebweuna namo oona 'itagwalena ga 'italiyaena Yaubada 'ena manuda.

28 'Epata nuganuganidi 'ediya Mosese 'ina loinega tomota mayaluyaluwa nenetadi sietotaliya sinabwana, ta muliyega Yaubada 'ina onaupaupa 'enega Natuna tauna adelina palupaluna 'ietotaliya ataya.

Copyright information for `DOB