Luke 14

Sabate 'ana loina

Sabate 'ebweuna 'enaya Yesu 'itauya sabi 'e'ai Palisiyao 'idi 'inapwana 'ebweu 'ina anuwaya. Anuwa nina 'ena 'ilugulugu ta boda siduneduneye, manuna sena nina 'enaya 'ebweu tole'oasa 'imiyami, bwalana maibo'ana si'eloseseya. 'Enega Yesu tole'oasa nina manuna 'ienaida loina 'ana tosinasinapuyao be Palisiyao 'ediya, 'igwae, “Mwa'adega? Wanuwena 'aene bobo'ana 'abo tole'oasa 'asiyata Sabate 'enaya tagiebobo'ane, nai nigeya?” Ga 'ina ona nina nigeya sie'ie'isa, ga muliyega Yesu tole'oasa nina nimana 'igiyaina, ga 'ana le'oasa 'igie bobo'anena. 'Enega 'ietunena ga 'itauya 'ina 'asaya. 'Enega Yesu 'iasakowasi 'ediya ga 'igwae, “'Abo yaisigei 'omi ma imi yobaiyao nadigega ase be bulumakau ta 'ebweuna yobai nina 'asiyata Sabate 'ena 'ibebe'u gaulaya, mwa'adega, 'ilobwenena be walisi tu'eyei?” Ta taudi tuga nigeya 'ebweu wate 'idi e'isamo.

Geya'abo 'ebemiya bobo'adi waesiesinuwedi

'E'ai nina solanaya Yesu tomota 'aidi 'i'itedi, 'ebemiya bobo'ana 'ena simiyatowa, 'enega 'ebweu onasemalimali 'i'ebwa'edi, 'igwae, “'Abo yaita 'ina anuwaya 'ibwauyeyo ai sagalina manuna, geya'abo toai 'atainaya 'umiyamiyatowa, manuna nai 'ebweu tai sinabwana 'eguma 'imama, tonisagali nina 'ieonayo be 'utatauya tupitupiya, ta 'imu 'ebemiya nina 'enaya tai auwauna nina 'ida miyatowa. Ta 'oyo 'iabe ma imu omayamaya tupiya 'uaila. 10 'Enega 'abo sibwauyeyo be 'ululugu 'ediya, 'ebemiya tupiya 'uesinuwe be 'ena 'umiyatowa, be 'enega tuta nina 'abo tonisagali 'imama be 'i'itayo 'iabe 'emuya 'ida ona, 'igwae, ‘Gosiyagu, 'umiyalaga gamwagamwanaya,’ be 'enega 'ulalaga ma imu gwausowala, ta wate ma 'amu tupu tomota matadiya. 11 Gete 'enega tamwalatoni 'aene yaita tauna 'igitu'eye 'etamo 'iebusi; ta 'abo yaita tauna 'igimwa'ute 'iabe 'itutu'e.”

12 'Enega Yesu Palisi nina 'ibwauyena ga 'ena 'igwae, “'Abo 'emasula nai 'e'ai gidalina 'uguinuwe, geya'abo gosemwao nai tasimwao nai 'imu bu'unao nai toesaesao 'ubwaubwauyedi 'e'ai nina 'enaya, manuna taudi ma'etamo sibwauyeyo sabi e'isa 'emuya. 13 Ta esiya 'abo 'emasula 'uguinuwe, taudi gomagomabesodi be bwalobwalogodi be tolopegoi be wate tomatakebokebo 'uda bwauyedi, 14 be 'enega 'awabobo'ana 'ai'aila 'uloba, manuna gete taudi nigeya sawesawediya be 'imu oboboma nina sie'isa. Ta esi Yaubada 'enega 'amu e'isa 'uda loba, tuta nina 'abo tobobo'adi mwawasega 'igietoolodi.” 35

'Inapwana 'ebweu 'emasula sinabwana 'iguinuwena

(Madiu 22:1-10)

15 Ga ni'atu ma'enao si'e'ai ta 'ebweuna 'ediyega ona gete 'inonona ga Yesu 'ieonena, 'igwae, “O nadigega! 'Abo yaisigedi silulugu Yaubada 'ina 'ebeloina 'enaya be si'a'a, sida gwausowala sinabwana.”

16 'Enega Yesu tai nina 'ina ona 'ie'isena, 'igwae, “'Ebweu tai 'emasula sinabwana 'iguinuwena ga tomotai yaudi 'ibwauyedi. 17 Ta ni'atu masula 'igibubuna ga 'ina 'ali'ei 'ietunena tomotai nidi 'ediya ga 'ieonedi, ‘Ni'atu masula sigibubuna, 'enega wamai be tatatauya be 'e'ai nina wada 'ai.’

18 “Ta maibo'adi geya nuwadi, 'enega mali ona be mali ona si'ebwa'ena. 'Ebweuna 'igwae, ‘Ni'atu tanowa auwauna yagimwanena, 'enega nai yatatauya be yayausi. Ta kagutoki sinabwana, nai geya'abo yaweewa.’ 19 Ta 'ebweuna wate 'igwae, ‘Kagutoki sinabwana, nai 'abo'agu wate geya'abo yaweewa, manuna bulumakau sanau ta wate 'ebe gesowa nima ni'atu yagimwanedi, 'enega yatautauya be 'aene yada eguinuwaedi, be yada epaisewa toodi.’ 20 Ta wate 'ebweu 'igwae, ‘'Abo'agu auwaugu yaai, 'enega nai geya'abo yaweewai.’

21 “'Enega 'ali'ei nina 'iila ga 'ina 'inapwana 'enaya 'isimana, 'igwae, ‘Maibo'adi geya nuwadi.’ Ga tonianuwa nina 'igamwasowala, 'enega 'ina 'ali'ei nina 'ena 'iona, ‘'Utauya manini 'asa sinabwana 'edanao maibo'adi 'ediya be 'eguma 'eisa tomotai 'ulobadi, 'anabwa'ayoi nanaewadi nai nenetadi nai matakebokebodi nai bwalobwalogodi, tuga maibo'adi 'u'au'ewedima be sida 'a.’

22 “Ga 'ali'ei nina 'iguinuwa nadigega, ta muliyega 'imai ga 'iona, ‘Ni'atu tomota nidi yabwauyedima ta esi 'imu anuwa nina nigeya siloeloemaa.’ 23 'Enega 'inapwana nina wate 'igwae, ‘'Eda maibo'adi 'ediya 'uda tauya be tomotai 'ueonadi be simama, be 'enega 'igu anuwa sida loemaa. 24 Ta esi tomotai nidi yagimi bwauyedi geya'abo 'ebweu 'ediyega 'agu masula 'ilotolotoo.’”

Mwa'adega Yesu 'ana muliya

(Madiu 10:37-38)

25 Ta ni'atu pwalu sinabwadi ma'enao sitautauya, ga 'enega Yesu 'isanaila ga boda nidi 'ieonedi, 26 “Yaita 'abo nuwanuwana be 'imuliyegu, nugana 'ida yala'ai'ailigu ta tamana be sinana be mwanena be natunao be tasinao be nuunao ta wate tauna tuga manuna 'ida guitoyasedi. Ta 'eguma nigeya, tauna nigeya 'agu tomuliya. 27 Ta 'abo yaita yawasina nigeya 'itagwatagwalei be 'imwamwawasa kelose 'enaya nadigega 'abo'agu, tauna nigeya sawesawenaya be 'imuliyegu. 28 Nadigega tuga 'abo yaita nuwanuwana be anuwa sinabwana 'i'abi, nugana yage maibo'adi 'ida gibubudi 'abi nina manuna, 29 'abona nai 'ola namo 'ietoolodi be geya'abo anuwa maibo'ana 'ilosalosaloni. Gete 'enega 'iabe tomota si'ita be tai nina situyeye 30 be sida gwae, ‘Tai gete 'atuwa waiwaina ga 'ola 'ietoolodi ta nigeya anuwa nina maibo'ana 'i'abi'abi.’ 31 Ta wate 'eguma 'ebweu kini ni'atu ma ina tolosaiyao teni tausani sitautauya sabi losaiya wate mali kini ma ina bodao tuweniti tausani 'adi yau 'ediya, mwa'adega kini nina 'iabe 'inuwanuwa'esa? Nai nugana 'ida miyatowa ta 'ida nuwanuwa be 'aene sawesawediya siewaiwai 'adi talauwalao nidi 'ediya, nai nigeya? 32 Ta 'eguma nigeya, 'ina toepilialealeyao nidi 'ietuetunedi be sipilipili bodedi, 'abo mali kini nina ma ina boda 'etamo 'edasolaya simiyami, be 'enega ma'ediyao sida eonaona nuwasiwalowa manuna.”

33 'Enega Yesu 'ina emataluwa 'ilosalonina, ga 'ediya 'igwae, “Gete nadigega wate 'agu muliya 'ana 'eda. 'Eguma yaita 'oyo nuwanuwayo be 'umuliyegu, nugana 'imu 'ebeloina maibo'ana 'uda pilisinedi.

Ola yage bobo'ana

(Madiu 5:13; Maki 9:50)

34 “Ola yage bobo'ana. Ta 'eguma 'ina waiwai 'igugumwala, nigeya sawesawenaya be 'ibobo'ana limana. 35 Nigeya wate 'ilobwelobwene be bwa'a 'igiebobo'ane, ta esi tada guitoyase namo.

“'Eguma matenami ona gete wada nono.”

Copyright information for `DOB