Luke 18

Kwabula 'ebweu 'ina sidasida toloina 'ebweuna 'enaya

'Enega 'ebweu ona semalimali Yesu 'i'ebwa'edi be 'aene geya'abo sidasida 'enega sineeneta. Gete nadigega 'igwae, “'Ebweu 'asa 'enaya toloina 'ebweu sinabwana 'imiyami, tauna Yaubada nigeya 'ida matautena ta wate tomota nigeya 'ida 'amayabedi. Ta sena nina 'enaya wate 'ebweu kwabula 'imiyami, 'enega tuta yauyauna kwabula nina 'iapweapwesa toloina nina 'ena ta 'isidasida 'ana lema manuna, 'igwae, ‘'Inapwana, 'agu talauwala 'enega 'uda 'etoseyegu.’

“Tuta 'ebweuna 'ebweuna nadigega 'ina guinuwa, ta toloina nina geya nuwana be 'ileme. Ga 'ebweu tuta 'enaya toloina nina 'ie'oata'oata, 'enega taunamo 'ena 'igwae, ‘Tuwa tuga Yaubada nigeya yamatamataute ta wate tomota nigeya yada 'amayabedi, ta esi kwabula gete 'ina mai limalimana 'eguya manuna yada leme 'ana talauwala 'enega, 'abona nai wate 'agu 'oata'oata 'isa'u.’”

'Enega Yesu wate 'ieonedi, 'igwae, “'Inapwana gete 'ina ona manuna wada nuwanuwa. Ona'ai'aila tauna tai to'umalina ta esi kwabula 'ilemena. Wate nadigega Yaubada 'iabe 'ina tomotaiyao esiesinuwadi 'ilemedi tuta nina 'abo si'awa'awanoi limalimana 'enaya, 'asiyata be boiboi 'ediya, ta 'ina lema nina palupaluna tuga 'ida guinuwe 'ediya.

“Ta mwa'adega 'omi wanuwena 'abo tuta nina 'abo'agu Tomota Natuna yailama bale'u gete 'ena, 'eisa tomota ma idi emisa yalobadi sitoolo pa'ala?”

Palisi be takisi 'ana to'ewa 'idi sidasida

Tomota 'aidi sinuwena 'aene taudi palupaludi ta mali tomota nigeya, 'enega Yesu 'iona semalimaliyedi gete nadigega, 10 'igwae, “'Ebweu tuta 'enaya tomota siteluwa silugu Anuwa Tabu 'ena sabi sidasida Yaubada 'enaya. 'Ebweuna Palisi ta 'ebweuna takisi 'ana to'ewa. 11 'Enega Palisi nina 'itoolo ga 'isidasida, 'igwae, ‘Yaubada ye, yalokagutoki 'emuya manuna 'abo'agu nigeya nadigega gosegwao 'idi bubuna, manuna taudi to'ipwala diidiga be kabokabodi be loeloelatadi, ta wate 'abo'agu nigeya nadigega takisi 'ana to'ewa gote, 12 manuna wiki 'ebweuna 'ebweuna 'asiyata 'eluwa 'ediya 'e'ai 'enega yaedidigula, ta wate 'igu gwegweyao maibo'ana 'enega tupwa ya'ebwa'ebwaya daite 'emuya.’

13 “Ta esi takisi 'ana to'ewa nina ma'alenega 'itoolo ga ma ina omayamaya lumalumana 'itutuna, ta 'ikopu sanamwa'uta ga 'isidasida, 'igwae, ‘Yaubada ye, ni'atu 'umwalatonigu 'aene 'abo'agu toto'umaligu, 'enega 'uda 'atenuwa 'ole'oleyegu!’

14 'Enega Yesu wate 'ediya 'igwae, “Ona'ai'aila, tai gete 'ina sidasida nina manuna 'ana 'awabobo'ana 'ilobena Yaubada 'enega, ta esi Palisi nina nigeya. Manuna 'abo yaita tauna 'igitu'eye 'iabe sida gimwa'ute, ta 'abo yaita tauna 'igimwa'ute sida gitu'eye.”

Gogama Yesu 'iona obobomedi

(Madiu 19:13-15; Maki 10:13-16)

15 'Aina tomota natudiyao gidalidi sime'edi be 'aene Yesu 'ida gitoodi, ta 'ina tononoyao tomotai nidi si'itedi ga si'etobodedi.

16 Ta Yesu 'ibwau egogonedi ga 'igwae, “Geya'abo gogama wa'eto'etobodedi ta esi wada tagwaledi be 'eguya sida mai. Manuna gogama getedi nadigega Yaubada 'ina 'ebeloina 'ilobwene 'ai'ailidi. 17 Manuna 'abo yaisigedi taudi geya'abo gogama getedi nadigega 'idi emisa, geya'abo sa'i Yaubada 'ina 'ebeloina 'ena silugulugu.”

Esaesa manuna

(Madiu 19:16-30; Maki 10:17-31)

18 Me Yudia 'idi toanugana 'ebweu 'imai ga Yesu 'ienaidena, 'igwae, “'Inapwana, yamwalamwalatoni 'aene 'oyo toe'ita bobo'ana, 'enega to'ase yada guinuwe be 'enega yawasigu ataya yada loba?”

19 Ga Yesu tai nina 'ieonena, “Mwa'adega ga 'enega 'u'awa bobo'anegu? Manuna nigeya 'ebweu yaita bobo'ana, nate namo Yaubada. 20 Ta Yaubada 'ina loinao ni'atu 'umwalamwalatonidi, nate 'aene:

Geya'abo loelata,

Geya'abo loemwawasa,

Geya'abo 'ipwala,

Geya'abo simana kabokabo,

Ta wate tamayo be sinayo 'uda 'amayabedi.”

21 Ga tai nina 'igwae, “'Igu tuta gwamega ga batuwa loina nidi getedi yamuliya 'ai'ailedi.”

22 'Ina ona gete nadigega Yesu 'inonona, 'enega 'igwae, “'Ebweuna yage namo 'ilogegesemu, nate 'aene 'imu gwegweyao maibo'ana 'uda egimwaneyedi be 'adi maisa togomabeso 'ediya 'ueguyaiyedi, ta 'enega 'umamai be 'umuliyegu be 'enega ma'etamo 'imu esaesa galewaya 'uda loba.”

23 Ona gete tai nina 'inonona ta 'ina esaesa sinabwana 'iegagalena, 'enega nuwana 'imwau 'ai'aila.

24 Ta 'ina nuwamwau nina ni'atu Yesu 'imwalatonina, 'enega tomota 'ediya 'igwae, “'Abo yaisigedi taudi ma idi esaesa sinabwana 'idi lugu Yaubada 'ina 'ebeloina 'enaya mwau wawasae. 25 Ona'ai'aila, kameli tauna yobai sinabwana, 'enega tupwana mwauna be siyaluma 'ana lobwalena 'enega 'ilulugu, ta esi toesaesao 'idi lugu Yaubada 'ina 'ebeloina 'enaya mwau wawasae.”

26 Boda nidi Yesu ma'enao simiyami ona nina sinonona, ga sienaidena, sigwae, “'Abo gete nadigega, yaita sana sawesawenaya be 'ebe gwausowala 'iloba?” 27 'Enega 'ediya 'igwae, “To'ase tomota 'ediya nigeya kapekapeyana, Yaubada 'ena yage nidi kapekapeyadi.”

28 'Enega Pita Yesu 'ieonena, “'Inapwana, ta 'abo'ama mwa'adega? Manuna ni'atu 'ima 'asao 'apilisinedi ga 'amuliyemu.” 29 Ta Yesu maibo'adi 'ieonedi, 'igwae, “Yasimana palupalu 'emiya, 'abo yaisigedi 'omi 'imi 'asa nai mwanemiyao nai tasimiyao nai tamamiyao nai sinamiyao nai natumiyao wapilisinedi be Yaubada 'ina loina 'ena watagwalemi, 30 tuta gete 'ena e'isa sinabwana waloba, ta wate tuta 'imeemai 'enaya yawasimi ataya wa'ewa.”

Yesu 'ina ona mwawasa manuna

(Madiu 20:17-19; Maki 10:32-34)

31 Yesu site tuwelo nidi 'ibwau egogonedi ga 'iailedi ma'alenaya ga 'ieonedi, “Gete tuga tatu'etu'e Yelusalema be yage nina maibo'ana palopitao lowaenei si'etoladina 'abo'agu Tomota Natuna manugu 'iabe siapwesa be wa'itadi. 32 Nugana sida 'ebwayaegu taudi nigeya me Yudia 'ediya, be sida tuyeyegu be sigie omayamayaegu be sigiwaligu, 33 ta wate balaeyega sisapigu, ta 'enega siloemwawasigu, ta 'asiyata 'etonina 'enaya mwawasega yatoolo limana.”

34 Ta 'ina tononoyao nidi nigeya 'ebweu wate 'ina ona nina 'ana nuwasabwalena 'ediya 'ilugulugu.

Yesu 'ebweu tomatakebokebo 'igie bobo'anena

(Madiu 20:29-34; Maki 10:46-52)

35 Ta ni'atu Yesu Yeliko 'ena 'ialogedo, ga 'ebweu tomatakabokebo 'edaya 'imiyami ta 'iesidasida mani be gwegwe manudi. 36 Yesu ma 'ana bodao 'enadi 'inonona ta 'ilosuyaena ga 'igwae, “Yaisigedi natedi?” 37 'Enega sigwae, “Yesu goma Nasaleta 'itautauya.”

38 'Enega tomatakebokebo nina 'ibwau toila ga 'igwae, “Yesu ye, 'oyo Debida 'ina susu, 'uda 'atenuwa 'ole'oleyegu!”

39 Ga taudi tomota nidi sinuganama tai nina si'etobodena, sigwae, “'Ulosa'u! Tuwa bwau!”

Ta tuga 'ibwau toitoila ta 'igwae, “Debida tubuna ye, 'uda 'atenuwa 'ole'oleyegu.”

40 'Enega Yesu 'itoolo ga 'ieonedi be tai nina sida bwauyenama.

Ta ni'atu 'imai ga 'ienaidena, 'igwae,
41 “To'ase nuwanuwayo be yaguinuwe 'emuya?”

'Enega 'igwae, “'Inapwana, kapekapeyana be matagu 'uda gie'esasedi?”

42 Ta Yesu 'igwae, “Gete tuga matayo 'ida 'esasa, manuna ni'atu 'imu emisa 'enega 'ubobo'ana.”

43 Gote 'ena matana 'i'esasedi ga ma ina lokagutoki Yaubada 'enaya Yesu 'imuliyena. Ta boda nidi si'itenaya, ga maibo'adi Yaubada situpuna.

Copyright information for `DOB