Luke 20

Yesu 'ana loina manuna

(Madiu 21:23-27; Maki 11:27-33)

'Ebweu tuta 'enaya, Yesu 'ie'ie'ita Anuwa Tabu 'enaya, nate Tetela Bobo'ana 'isimasimana tomota 'ediya, ta totaliyao be loina 'ana toe'itao be wate 'inapwanao simai ga Yesu sienaidena, sigwae, “Tai, yaita 'ina loinega ga gete nadigega 'uguiguinuwa'esa?”

Ta Yesu 'ieonedi, 'igwae, “Nugana yagimi enaida 'emiya. Yaita 'ina loinega ga Yoni togiebapitaiso 'iguiguinuwa? Yaubada, nai 'ebweu tomota?”

'Enega taudimo 'ediya sienuenuwana, sigwae, “'Ina ona mwa'adega tada e'isa'ese? Manuna 'abo tagwae, ‘Yaubada 'enega’, 'iabe 'ieona limada be 'igwae, ‘Ta! To'ase sana manuna ga Yoni nigeya waemiemise?’ Ta 'abo tagwae, ‘Tomota 'enega’, nate be boda gulewega siloibwaibwada, manuna tomota yaudi Yoni siemisena 'aene tauna 'ebweu palopita.”

'Enega 'ina enaida nigeya sie'ie'isa 'ai'aili, ta esi sigwae, “Nigeya 'amwalamwalatoni.”

Ta Yesu wate 'igwae, “'Abo'agu geya'abo wate 'emiya yasimasimana apwesa yaita 'ina loinega ga gete nadigega yaguiguinuwa'esa.”

'Inapwana 'ina bagula 'ana topaisewao onasemalimalina

(Madiu 21:33-46; Maki 12:1-12)

'Enega Yesu tomota nidi 'iona semalimaliyedi, 'igwae, “'Ebweu tai 'ina bagula 'iasona oine daisinamo, ga 'ina toguinuwao 'iloinedi be si'ita'i'isi, ta tauna 'itauya mali senaya ga nada 'imiyami.

10 “Ta sesoi 'ana tutaya 'inapwana nina 'ina 'ali'ei 'ebweuna 'ietune ilena be 'aene oine uwana bagula 'ana to'ita'i'itao 'ediyega 'ida me'edi. 'Itautauya ga nigeya si'ebwa'ebwa'e, ta esi sisapina ga ma'animenimenamo sietunena ga 'iila.

11 “'Enega 'inapwana nina 'ina 'ali'ei 'eluwena wate 'ietunena 'ediya ga siununa ga wate sigie omayamayena ta ma'animenimenamo sietunena ga 'iila.

12 “Ta wate 'etonina 'ietunena 'ediya ga wate siunu geyogeyonina ga sipa'ina.

13 “'Enega tonibagula nina 'inuwanuwa, 'igwae, ‘To 'eda wate yada guinuwe? Nai taugu tuga natu'ai'ailigu yaetune be 'enega sida 'amayabe manuna tauna sana natugu.’

14 “Ta tuta nina toguinuwao nidi 'inapwana natuna si'itena 'imeema taudimo 'ediya sigwae, ‘Gosemao, tai gote 'imeema, tauna 'inapwana nina natuna 'ebweuna namo tuga, 'enega batuwa nina taloemwawasi be 'abo'ada bagula taloine.’

15 “'Enega sigiyaina ga bagulega siula apwesena 'etauluya, ga nada siloemwawasina.”

Ga ni'atu Yesu 'ina emwasala 'igumwala ga 'ienaida 'ediya, 'igwae, “To'ase 'iabe 'inapwana nina 'ina to'ita'i'itao nidi 'ediya 'iguinuwe?

16 “Ona'ai'aila 'inapwana nina 'imama be toguinuwa nidi 'iloemwawasidi, be 'enega bagula nina mali to'ita'i'itao 'i'ebwa'edi.”

'Inapwanao nidi Yesu 'ina ona gete nadigega sinonona ga sigwae, “Ona'ai'aila, 'abo'ada geya'abo wate nadigega!”

17 Ta Yesu 'iduneyedi ta wate 'ediya 'igwae, “Mwa'adega 'ana mwalatoi Buki Tabu 'ina simana gete, 'igwae,

‘'Ola nina lowa to'abi anuwa siguitoyasena, ta gete tugai ni'atu sietoolona be 'ie'ola nugana, be 'ola maibo'adi 'iloinedi.’

18 “'Eguma yaita 'ibebe'u 'ola gete 'ena, 'iabe luluna 'ilasadi, ta 'eguma 'ola nina 'ibebe'u 'ebweu yaita etaninaya 'iabe oona 'i'auideide namo.”

19 Gote 'ena totaliyao be loina 'ana toe'itao 'aina 'eda'eda si'ebesena be 'aene Yesu sida giyai, manuna simwalatonina 'aene taudi tuga manudi 'iona semalimali, ta esi nigeya sigiyagiyai manuna pwalu 'ediya simatauta.

Takisi Sisa manuna

(Madiu 22:15-22; Maki 12:13-17)

20 'Enega tuta yauna Yesu siloomata'i'isi be 'aene to'ase 'ina loegesi siloba, be 'enega sisimana toloina 'enaya be 'ietalae, 'enega tomota 'aidi sietunedi Yesu 'enaya be enaidega sikaboe be 'aene 'ina loegesi siloba. 21 'Enega tomota nidi simai ga Yesu sieonena, sigwae, “'Inapwana, ona'ai'aila 'oyo 'imu onao be 'imu e'itao maibo'ana palupaludi, ta wate 'amwalatonimu 'aene nigeya 'ebweu tomota 'uda matautena, ta esi Yaubada 'ina nuwanuwa 'ana toe'ita 'ai'aila 'oyo. 22 'Enega mwa'adega, sawesawenaya be Kini Sisa manuna takisi tasa'u, nai nigeya?”

23 Ta Yesu ni'atu 'idi kabo nina 'imwalatonina, 'enega 'ieonedi, 24 'igwae, “Abaga mani nina wame'e be ya'ita.” 'Enega si'ebwa'ena ga 'ieonedi, 'igwae, “Wada eonagu yaita gete 'ana ma'ama'ayau ta 'ana esana mani nina 'ena?”

Ga taudi sigwae, “Kini Sisa.”

25 'Enega Yesu 'igwae, “O, nadigega, 'enega 'eguma Kini 'ina yage wa'ebwaya Kini 'enaya, ta 'eguma Yaubada 'ina yage Yaubada wa'ebwa'e.”

26 Yesu 'ina ona gete pwalu matadiya maibo'ana palupaluna, ta nigeya 'ebweu wate onagesi 'enega silobaloba, ta ma idi nuwaowana simiya 'alaenono.

Tomwawasa 'idi toolo limana

(Madiu 22:23-33; Maki 12:18-27)

27 'Enega wate 'aina Sadusiyao, taudi nigeya siemiemisa tomwawasa 'idi toolo limana manuna, simai ga Yesu 'ena sienaida, sigwae, 28 “'Inapwana, loina gete nadigega Mosese 'i'etoladina manuda, 'igwae, ‘'Abo 'ebweu tai 'iai be nigeya natunamo ta 'imwamwawasa, tai nina tasina kwabulinana ma'iyana sida ai be 'enega 'abo waine 'ienatuna, natunao tokwaiya nina 'ana lopa'eluyao.’”

29 'Enega 'ebe'ita si'ebwa'ena, sigwae, “'Ebweu tai matasinao simiyami 'adi yau site sebeni, ga 'adi tomatuwa nina 'iai ga muliyega nigeya natunamo, ta tai nina 'imwawasa. 30 'Enega tasina selabenega kwabula nina 'i'ewena ga wate simiyamiyana ta nigeya natunamo, ta tai nina 'imwawasa. 31 'Enega wate tasina selabenega kwabula nina 'iaina, ga wate nadigega nigeya natunamo, ta 'imwawasa. Ta nadigega tuga tasinao maibo'adi kwabula nina siaiai ta simwawamwawasa, ta nigeya natudimo, 32 ga muliyega waine wate 'imwawasa.

33 “Ta to'ase 'unuwena tomota gete manudi to tai waine nina mwane'ai'ailina, tuta nina 'abo mwawasega sitoolo limana? Manuna site sebeni nidi ni'atu siaina.”

34 'Enega Yesu 'idi ona 'ie'isena, 'igwae, “Wada nuwa'i'isi 'aene tuta gete 'ena waine be tai siaiai, 35 ta esi tuta 'imeema 'enaya 'abo waine be tai sawesawediya be mwawasega sitoolo limana geya'abo wate siaiai limana. 36 Manuna 'iabe taudi nadigega aniloseyao, be geya'abo wate simwawamwawasa limana, ta esi Yaubada 'ida 'awanatunedi manuna mwawasega sitoolo limana.

37 “Ta Mosese lowaenei 'ie'ita 'ai'ailida tomwawasa 'idi toolo limana manuna. Tuta nina Mosese mitawaya 'itautauya ta Yaubada kaiwe sabelulu 'enega 'ieonena, 'igwae, ‘'Abo'agu Ebelaamo be Aisake be Yekobe 'idi Yaubada’. 38 Gete 'ana mwalatoi 'aene nigeya tomwawasa 'idi Yaubada ta esi taudi mayawasidi 'idi Yaubada, manuna 'inapwanao nidi Yaubada 'ina senaya gete tuga mayawasidi simiyami.”

39 Gote 'ena loina 'ana toe'itao simatauta ga 'aidi sigwae, “Toe'ita, 'imu e'isa bobo'ana wawasae,” 'enega nigeya 'ebweu wate enaida si'ebwa'ebwa'e.

To'etoseyana nina tauna Debida 'ina susu

(Madiu 22:41-46; Maki 12:35-37)

41 'Enega Yesu wate 'ienaida 'ediya 'igwae, “Mwa'adega ga 'enega 'aina tomota sigwae 'aene Debida 'ina susuyega To'etoseyana Keliso 'iapwesa, 42 manuna Same 'enaya Debida 'igwae,

‘Yaubada 'iona 'igu 'Inapwana 'enaya, 'igwae: 'Ataiguya 'umiyatowa,
43 be 'ana laba 'amu talauwalao yasa'u mwa'utedi 'aeyo 'adi 'ebesa'u manuna.’

44 “Debida nina 'ina 'Inapwana Keliso, 'enega mwa'adega sana ga Debida 'ina susuyega muliyega Keliso 'iapwesama?”

Loina 'ana toe'itao 'idi bubuna

(Madiu 23:1-36; Maki 12:38-40)

45 'Enega boda maibo'adi sienoenono, ta Yesu 'ina tononoyao 'ieonedi, 'igwae, 46 “Tasigwao, geya'abo loina 'ana toe'itao 'idi bubuna wamulimuliye. Manuna taudi adelidi tuga nadigega tuta yauna nuwanuwadi be 'adi 'oamao duduladi si'otedi be tomota gamwagamwanidiya sisakosakowasi be 'aene sida 'amayabedi. Ta wate nuwanuwadi 'idi 'ebemiya bobo'adi Anuwa Tapwalolo 'ediya, be wate sagali 'adi tutaya nuwanuwadi be bwaimaya sida miyatowa. 47 Ta wate tuta yauna tomota matadiya Yaubada 'ena sisidasida dudulana, ta esi 'idi sida nina nigeya bobo'ana, manuna 'atediya sinuwanuwa mwa'adega 'iabe kwabulao sikabo'esedi be 'idi gwegweyao si'ewadi. 'Enega ma'etamo Yaubada e'isa to'umalina 'i'ebwa'edi.”

Copyright information for `DOB