Luke 8

Iine 'aidi Yesu 'ina lema 'ediya sie'isena

1Ga muliyega Yesu 'itoolo ga 'itauya 'asa sinabwadi be gidalidi 'ediya, Yaubada 'ina loina 'ana tetela bobo'ana sabi loguguyaena, ta 'ina tononoyao nidi site tuwelo ma'enao. 2Ta wate 'aina iine ma'ediyao, nate taudi lowa 'ediyega yaluyaluwa bi'i Yesu 'iula apwesedi ta wate 'adi le'oasao 'igie bobo'anedi. Iine nidi nate Meli Magidala, tauna lowa 'enega yaluyaluwa bi'i sebeni Yesu 'iula apwesedi, 3ta wate Yoana, tauna Kusa mwanena, Kusa nina Elodi 'ina toguinuwa, ta wate Susana be wate 'aidi iine ma'ediyao. Iine nidi taudi 'idi gwegweyega Yesu magosenao si'ita'i'isidi.

Atu 'ana onasemalimali

(Madiu 13:1-9; Maki 4:1-9)

4Tomota yaudi 'asa yauna 'ediyega simai ga siegogonama Yesu 'enaya, ga Yesu ona semalimaliyega 'ie'itedi, 'igwae, 5“Tobagula 'ebweu 'ina bagulaya 'itauya ga witi atuna 'ilelewanedi, ga 'aina atuna 'edaya sibe'u ga tomota siaebaebatudi, ta wate manuwa si'itedi ga simwa'utama ga si'enidi. 6Ta 'aina atuna bwa'a logulegulewana 'enaya sibe'u ga sitabwa ga muliyega si'oapelu, manuna bwa'a nina nigeya gonitunamo. 7Ta 'aina atuna kwakwakwala 'ediya sibe'u ga sitabwa enoenowa ta esi kwakwakwala 'iewaiwai ga 'ididi emwawasidi. 8Ta 'aina atuna bwa'a bobo'ana 'enaya sibe'u ga sitabwama ga sisinabwa ga siuwa, ta 'ediyega sesoi bobo'ana silobena, manuna atu nidi 'ebweuna 'ebweuna 'ediyega analedi silobedi.”

'Enega Yesu boda 'ieonedi, 'igwae, “'Eguma matenami ona gete wada nono.”

Atu 'ana onasemalimali 'ana li'ama

(Madiu 13:10-23; Maki 4:10-20)

9Ta muliyega 'ina tononoyao Yesu sienaidena, sigwae, “'Imu ona semalimali nidi to'ase 'adi mwalatoi?”

10Ga tauna 'igwae, “'Omi ni'atu Yaubada 'emiya 'itagwala be 'ina loina sola'ai'ailidi 'ana tomwalatoiyao, ta esi tomota yaudi onasemalimali sinono ta 'ana nuwasabwalena nigeya, ta wate 'ana mwalatoi si'ebe'ebese ta geya'abo silobaloba. 11Ta ona semalimali nina 'ana li'ama gete nadigega: Atu nina nate Yaubada 'ina ona. 12Ta atu nidi 'edaya sibe'u taudi nate tomota nidi ona sinono namo, ta Seitani 'imai ga 'atediyega ona nina 'i'ewa yaulena, 'enega geya'abo siemiemisa be 'aene Yaubada 'i'etoseyedi. 13Ta atu nidi sibe'u bwa'a logulegulewana 'enaya, tomotai nidi taudi nate Yaubada 'ina ona manuna sigwausowala, ta nigeya lamudi 'ipa'apa'ala manuna 'idi emisa nigeya sinabwana, be 'abo 'ebetoo 'ediya 'iapwesa 'iabe sibebe'u. 14Ta atu nidi kwakwakwala 'ediya sibe'uya tomotai nidi taudi ona nina sinono, ta 'idi nuwanuwa maibo'ana 'itautauya esaesao be bale'u gwausowalinao ta wate yage yauna 'ediya, ta 'enega Yaubada 'ina ona 'ediya nigeya uwana 'ida apwesa. 15Ta atu nidi bwa'a bobo'ana 'ena sibe'uya, taudi nate ma idi 'atetagwala ona nina sinonona, 'enega sie'alama'i'itana, ga Yaubada 'ina ona 'ediya 'iuwa 'ai'aila.”v15 Yo 6:28-29; Ye 1:22

Mayale 'ana ona semalimali

(Maki 4:21-25)

16Ta Yesu wate 'ediya 'igwae, “Nigeya 'ebweu yaita mayale loeloe'abina 'isa'usa'u kwaiye 'ule nai sita 'ediyega, ta esi 'atamanaya 'isa'u be 'enega anuwa 'ana tomiyanao 'imaedanidi. 17'Enega 'eguma to yage 'atemiya wakwaiyedi, ma'etamo maedana nina 'igieapwese. Ta to'ase sa'usa'ukwaiyina, ma'etamo yage nidi 'iloapwese 'atamanaya.

18'Enega wanuwa'i'isi be ona waenono 'ai'aila. Manuna 'eguma yaita 'enaya Yaubada 'ina gwegwe 'imiyami 'iabe gwegwe nina 'iloeposeyane. Ta yaita 'enaya nigeya Yaubada 'ina gwegwe 'imiyami, ta taunamo 'inuwena 'aene Yaubada 'ina gwegwe 'ena 'imiyami, 'iabe Yaubada gwegwe nidi 'enega 'i'ewa yauledi.

Yesu sinana be tasinao si'ebesena

(Madiu 12:46-50; Maki 3:31-35)

19Ga muliyega Yesu sinana be tasinao simai sabi 'itana, ta pwalu sinabwa wawasae, 'enega nigeya sawesawenaya be silulugu Yesu 'enaya. 20Ta ona namo sietunena, sigwae, “'Inapwana, sinayo be tasimwao wa'ita apwesa 'atamanaya sitootoolo, ta nuwanuwadi 'oyo.”

21'Enega Yesu 'ieonedi, 'igwae, “Nigeya taudimo, ta esi 'eguma yaisigedi Yaubada 'ina ona sinono be siematamatane taudi sinagwao nai tasigwao.”

Yesu yagila be lisu 'iba'edi

(Madiu 8:23-27; Maki 4:35-41)

22'Ebweu tuta Yesu ma ina tononoyao sigelu ga 'ediya 'isimana, 'igwae, “Taabala mali esenaya.” 'Enega situpa, 23ga sipilipili ta Yesu 'i'eno'eno ga 'i'eno mwataya. 'Enega wediliya sinabwana 'itowama ga lisu sinabwana sisiwasiwa taona wagaya ta selabenaya be sidadamana. 24'Enega tomotai nidi Yesu silowanowanona ga sigwae, “'Inapwana 'utoolo, 'iabe tadadamana!” 'Enega Yesu 'itoolo ga yagila be lisu 'iba'edi, 'igwae, “Walosa'u!” 'Enega silosa'u ga 'isiwalowa.

25Ga Yesu 'ina tononoyao 'ieonedi, 'igwae, “Mwa'adega? Nai nigeya waemiemisegu, aga?” Ta taudi siomayamaya ta wate nuwadi 'iowana, ga taudimo 'ediya sigwae, “To tai sana gete? Ga yagila be lisu 'iloinedi ga 'enana siematamatanena!”

'Ebweu tai solanega yaluyaluwa bi'i yaudi siapwesa

(Madiu 8:28-34; Maki 5:1-20)

26Ta ni'atu Galili mali senaya siabala ga silugu me Gelasine 'idi le'awaya. 27'Enega Yesu 'isuya dabalaya ta 'ebweu tomiya'asa 'iapwesama. Tai nina lowa solanaya yaluyaluwa bi'i silugu ga 'ena simiyami. Ta tai nina tuta dudulana 'oama nigeya 'ida 'otena, ta anuwa 'ediya nigeya 'ida miyana, ta esiya 'ina 'ebemiya 'ali'ali duluina 'ediya.

28'Enega tai nina Yesu 'i'itena, ga 'ibwau ta 'ibe'usana mwa'uta, ga 'ibwautoila, 'igwae, “Yesu ye, 'oyo Yaubada To'ewaiwai sana Natuna, to'ase 'utootoo be 'aene 'uguinuwe 'eguya? Tuwa! Geya'abo 'uda giegie 'elouyaegu.” 29Ona gete 'i'inanena manuna Yesu ni'atu 'ieonena, 'igwae, “Yaluyaluwa bi'i niyo, tai gete 'enega 'uapwesama.”

Ta wada nuwa'i'isi 'aene tai nina lowa tuta yauna yaluyaluwa nina 'igiegie kabaleyae, 'enega sigiyaina ga nimana be 'aena siyoniyonidi malakwa kainumu 'ediyega, ta tuga kainumu nidi 'ilasalasadi ta wate yaluyaluwa nina tai nina 'itauyena sena mwatui daitaya.

30'Enega Yesu tai nina 'ienaidena, 'igwae, “Mwa'adega 'amu esana?” Ga tauna 'igwae, “'Agu esana Tomoyauyau”, manuna yaluyaluwa bi'i yaudi ni'atu silugu solanaya ga simiyami.

31Ta yaluyaluwa nidi 'enadi Yesu 'enaya sisida waiwai sigwae, “Geya'abo 'uulaula mwa'utema gaula 'ebe esilae 'enaya, 32ta esi 'uda etunema be 'alulugu bawe mabodadi gotedi siduwaduwala 'oyaya 'ediya.” 'Enega Yesu 'itagwala, 33ga siapwesa tai nina 'enega ga bawe 'ediya silugu. Gote 'ena bawe nidi siekabaleya ga maibo'adi sipili bulibuliyasu, ga babagega sibe'u ga olaya sidamana.

34Ta bawe 'adi to'ita'i'itao bawe nidi 'idi esilae si'itena ga simatauta, 'enega sidena ga sitauya 'asaya ga ale nina to'ase nadigega si'itena sisimanedi 'asa sinabwana be 'asa gidalidi tomotenidi 'ediya. 35'Enega tomotai nidi simai be 'aene taudi matadiyega sida 'ita to'ase 'iapwesa. 'Enega Yesu 'ena simai ga tai nina si'itena lowa yaluyaluwa bi'i solanaya simiyami ni'atu 'ibobo'ana ga 'oama 'i'otena ta Yesu 'aena selabenaya 'imiyatowa. Gote 'ena maibo'adi simatauta.

36Ta toepilialeale nidi tomotai 'ediya siemwasala mwa'adega tai nina 'ibobo'ana'esa. 37'Enega me Gelasine maibo'adi simatauta sinabwana ga Yesu sie'idi'idiyena be 'aene 'ida ebesinedi. 'Enega Yesu wagaya 'idolo sabi gelu be sitatauya.

38Ta tai nina ni'a 'igie bobo'anena Yesu 'ena 'isida, 'igwae, “Sawesawenaya yamuliyeyo?” 'Enega Yesu 'ieonena, 39“Nigeya. Ta esi 'uila be 'utauya 'asaya be to'ase nadigega Yaubada 'emuya 'iguinuwena 'uda simana dadane.” 'Enega tai nina 'itauya 'asa nina solanega ga Yesu 'ina guinuwa waiwaina 'ietetela tomiya'asa maibo'adi 'ediya.

Yailo natuna 'ile'oasa

(Madiu 9:18-19; Maki 5:21-24)

40Ta Yesu ma ina tononoyao siabala limana, ga boda sinabwana ma idi gwausowala siaesotena, manuna tauna tuga manuna siyamwayamwa.

41'Enega 'ebweu tai 'iluapwesama, 'ana esana Yailo, tauna 'idi anuwa tapwalolo 'ana to'ita'i'ita. 'Imai ga Yesu 'aenaya 'ibwago sanamwa'uta ta 'igwae, “'Inapwana tatauya 'igu anuwaya, 42be natugu 'ile'oasa sinabwana 'ugie bobo'ane. Tauna tuga 'ebweuna namo natuguna, 'ana yakwala tuwelo, anuwaya 'i'eno'eno, tuta gidalina be 'imwamwawasa.” 'Enega ma'iyana sitauya.

Waine 'ebweuna Yesu 'ana 'oama 'igitoona

(Madiu 9:20-22; Maki 5:25-34)

Ta ni'atu Yailo ma'iyana 'edaya sitautauya ta boda sinabwana simuliyedi, ta siegigigila.

43Ta boda nidi soladiya 'ebweu waine ma'edi, ma 'ana le'oasa. Le'oasa nina nate lalana 'idaudau yakwala tuwelo 'ediya, ta tuga 'etamo 'idaudau. Tuta yauna togile'oasa sitootoo be 'aene sigie bobo'ane, ta nigeya sawesawediya.

44'Enega waine nina Yesu mulinega 'imai ga 'ana 'oama tupitupina 'igitoona, ga lalana 'ina dau 'iyapasa manini.

45'Enega Yesu 'ilosuyaena, 'igwae, “Eei! Yaita 'igitoogu?” Ga maibo'adi sieyaseyaseya, ta esi Pita 'ieonena, 'igwae, “'Inapwana, nai boda nidi siegigigila ga siesetupedi 'emuya.”

46Ta Yesu 'igwae, “Nigeya! 'Ebweu yaita nai 'agu 'oama 'igitoona, manuna yalotoona 'aene 'eguyega waiwai 'iapwesa ga togitoona nina 'ena 'iabala.”

47Ta waine nina 'imwalatonina 'aene Yesu ni'atu 'ina guinuwa 'isinapuna, 'enega 'imai ga ma ina dedela 'ibe'u sanamwa'uta Yesu 'aenaya, ga boda matadiya 'ina gitoona 'alena 'isimana apwesena, 'igwae, “'Inapwana, nuwanuwagu be yabobo'ana, 'enega 'amu 'oama yagitoona, ga yabobo'ana manini.”

48Ta Yesu waine nina 'ieonena, 'igwae, “Natugu, 'imu emisa 'enega ni'atu 'ubobo'ana. 'Utoolo be ma imu gwausowala 'utatauya.”

Yailo natuna mwawasega Yesu 'igie toolona

(Madiu 9:23-26; Maki 5:35-43)

49Tuta nina Yesu 'ionaona waine 'enaya Yailo anuwega 'ina toguinuwa 'ebweuna ale 'ime'ena Yailo nina 'ena, 'igwae, “'Ena'i, natuyo ni'atu yawasina 'igumwala, ta geya'abo toe'ita nina 'ina tuta 'umudamudali.”

50Ale gete Yesu 'inonona ga Yailo 'ieonena, 'igwae, “Geya'abo 'u'ate'ate sa'ala. Ta esi 'uemisegu 'aene natuyo 'iabe 'ibobo'ana.” 51'Enega sitauya ga 'asaya siapwesa, ga Yesu boda maibo'adi 'i'etobodedi be geya'abo anuwa nina 'ena silugulugu, nate namo nuwanuwana Pita, be Yoni, be Yemesa, ta wate gwama nina tamana be sinana ma'enao silulugu.

52Ta boda anuwaya 'etamo tuga sidedoi ta wate si'ewabamu gwama manuna. 'Enega Yesu 'i'etobodedi, 'igwae, “Tuwa! Dedoi walosa'u. Manuna gwama nigeya 'imwawamwawasa, ta esi 'i'eno mwataya tuga.”

53Ta maibo'adi Yesu siedagiyena manuna simwalatonina 'aene gwama nina ni'atu 'imwawasa.

54'Enega Yesu gwama nimanaya 'igiyaina ta 'ieonena, 'igwae, “Negeyo, 'utoolo.” 55Ta gwama palupaluna yawasina 'iilama ga 'itoolo. Ga Yesu gwama nina sinana be tamana 'ediya 'igwae, “Masula wa'ebwa'e be 'i'a'a.” 56Gote 'ena tamana be sinana nuwadi 'iowana 'ai'aila. Ta Yesu wate 'iemataluwedi, 'igwae, “Geya'abo 'ebweu yaita 'ena wasimasimana 'igu guinuwa gete manuna.”

Copyright information for `DOB