Luke 9

Yesu 'ina tononoyao 'ietunedi sabi paisewa

(Madiu 10:5-15; Maki 6:7-13)

Ta Yesu 'ina topaisewao site tuwelo 'ibwau egogonedima ga 'adi loina be waiwai 'i'ebwa'edi be 'enega sawesawediya yaluyaluwa bi'i tomota 'ediyega sida ula apwesedi, ta wate 'adi le'oasao sida giebobo'anedi. 'Enega 'ietunedi be 'aene Yaubada 'ina etoloina tomotai 'ediya sida loguguyae, ta wate le'oasao sida giebobo'anedi. Ta wate 'ina guguya 'ena 'iloinedi, 'igwae, “Geya'abo 'ebweu to'ase wa'ewa'ewa. Geya'abo 'etoguna nai tana nai masula nai mani, nai 'ami 'oama 'eluwena. Ta 'abo to anuwa 'ena sibwauyemi be walulugu, anuwa nina 'ena wae'owaga be 'ana laba sena nina wapilisine. Ta 'eguma to 'asa 'ena nigeya si'au'au'ewami 'idi anuwa 'ediya, 'asa nina nedilina 'aemiyega waloutuutu yauledi ta wapilisinedi be 'enega wae'itadi 'aene 'iabe mwau 'ediya 'iapwesa.”

Ta 'enega tononoyao nidi sitauya ga sena maibo'adi 'ediya sisakowasi ga tetela bobo'ana siloguguyaena, ta wate tole'oasao sena 'ebweuna 'ebweuna 'ediya sigie bobo'anedi.

Elodi nuwana 'iowana Yesu manuna

(Madiu 14:1-12; Maki 6:14-29)

Gote 'ena Elodi, tauna Galili 'ana toloina, yage getedi siapweapwesa aledi 'inonodi ga nuwana 'iowana sinabwana manuna 'aidi tomota sigwae, “Yoni togiebapitaiso 'aene ni'atu mwawasega 'itoolo limana,” ta 'aidi sigwae, “Nigeya, Ilaitiya 'iapwesama,” ta wate 'aidi sigwae, 'aene “Tauna 'ebweu palopita lowaenei 'imwawasa ga gete tuga 'itoolo limanama.” 'Enega Elodi wate 'igwae, “Yoni ni'atu 'abo'agu 'igu loinega ga 'otona si'upwena. Ta to tai sana gete sionaonae.” Gote 'ena Elodi 'itoo waiwai be 'aene Yesu 'ida loba.

Yesu tomota yaudi 'ie'enidi

(Madiu 14:13-21; Maki 6:30-44; Yoni 6:1-14)

10 Ta ni'atu Yesu 'ina toguinuwao nidi 'idi sakowasiyega siilama ga 'idi guinuwa maibo'ana siemwasalina Yesu 'enaya. Ga muliyega 'idi 'inapwana nina 'i'au'ewedi ga ma'enao sitauya 'ebweu 'asa, 'ana esana Beteseida 'enaya, be 'aene taudimo nada sida miyami. 11 Ta nigeya sawesawediya, manuna boda ale sinonona, ga wate Yesu nina simuliyena ga simai 'enaya. 'Enega Yesu 'ediya 'itagwala ga Yaubada 'ina loina manuna 'ie'itedi, ta wate 'adi le'oasao 'igie bobo'anedi.

12 Simiyami ga sinala 'isuguwa, ta site tuwelo nidi simai ga Yesu sieonena, sigwae, “'Inapwana, boda getedi 'uda etunedi be siila 'asa selabedaya 'ediya, be nada masula be 'ebe'eno si'ebesa, be 'enega 'ediya sieyawai'ata. Manuna bada sa'i sena mwatui daita.”

13 'Enega Yesu 'ediya 'igwae, “Mwa'adega, 'omi geya'abo wae'enidi, aga?”

Ta taudi sigwae, “Mwa'adega sana batu 'a'e'ai'esedi? Manuna 'ama masula nigeya yauna. Beledi nima ta iyana 'eluwa situpwa. Nai nuwanuwayo 'aene 'atatauya be boda nidi 'adi masula 'agimwane, aga?”

14 Ta boda nidi 'ediyega tai dimo 'adi yau nadigega paibi tausani. 'Enega Yesu 'ina tononoyao 'ieonedi, 'igwae, “Tomotai nidi waweyalidi be 'idi boda 'ediya wasa'udi, nadigega tomotai pipiti boda 'ebweuna 'ebweuna 'ediya, be nadigega simiyatowa'esa.” 15 Ta 'ina loina nina maibo'ana nadigega siguinuwena, ga simiyatowa 'idi boda 'ediya.

16 'Enega Yesu beledi nima ta wate iyana 'eluwa 'i'ewedi, ga galewaya 'i'itatu'e, ga masula nidi manudi 'iona oboboma. Ta muliyega 'igitomwedi ga 'ina tononoyao 'i'ebwa'edi be sida eguyaiye tomota 'ediya. 17 'Enega maibo'adi si'ai ga gamwadi 'ipawa, ta masula tupwatupwadi siegogonedi, ga kodo tuwelo siloemaedi.

Pita 'ina simana 'aene Yesu tauna To'etoseyana nina

(Madiu 16:13-19; Maki 8:27-29)

18 'Enega Yesu ma ina tononoyao sitauya, ga muliyega Yesu tebweuna 'imiyami, ga Yaubada 'ena 'isidasida. Ta 'ina sidasida 'igumwalaya ga 'ina tononoyao 'ienaida 'ediya, 'igwae, “Mwa'adega tomota 'idi ona manugu, 'aene 'abo'agu yaita?”

19 Ta tonono nidi sigwae, “Tomota 'aidi siona 'aene 'oyo Yoni togiebapitaiso, ta 'aidi sigwae 'aene 'oyo Ilaitiya, ta 'aidi sigwae 'aene 'oyo 'ebweu gimipalopita mwawasega 'utoolo limanama.”

20 'Enega wate 'ienaidedi, 'igwae, “Ta 'omi mwa'adega 'imi nuwanuwa 'aene 'abo'agu yaita?”

Ga Pita 'igwae, “'Oyo To'etoseyana, Yaubada 'enega.”

21 Gote 'ena Yesu 'ina tononoyao 'iloina pa'aledi be geya'abo sisimasimane tomota 'ediya. 22 'Enega wate 'ieonedi, 'igwae, “'Abo'agu Tomota Natuna be ma'etamo 'elouya sinabwana yaloba. Manuna 'Inapwanao be totaliyao sinabwadi ta wate loina 'ana toe'itao 'iabe sie'idi'idiyegu be siloemwawasigu, ta 'asiyata 'etonina 'enaya Yaubada 'ida gietoolo limagu.”

Yesu 'ana muliya manuna

(Madiu 16:20-28; Maki 8:30, 9:1)

23 'Enega muliyega maibo'adi 'ediya 'igwae, “'Eguma yaita 'oyo nuwanuwayo be 'umuliyegu, geya'abo tauyo manuyo 'unuwanuwa. Ta esi tauyo 'amu kelose 'u'aali 'asiyata 'ebweuna 'ebweuna, be 'enega 'umuliyegu. 24 Ta 'eguma yaita yawasi 'iegagale, ma'etamo yawasi nina 'iloseye. Ta 'eguma yaita yawasina manugu 'itagwale be 'imwamwawasa, tauna 'iabe yawasina bobo'ana 'iloba. 25 'Eguma 'ida esaesao sinabwa wawasae talobadi nate yage besobeso, ta esi yage sinabwana nate yawasida bobo'ana. Manuna 'eguma yawasida bobo'ana taloseyedi, nate mwau wawasae.

26 “'Abo'agu Tomota Natuna, ta 'abo yaita 'oyo manugu 'uomayamaya ta wate 'igu e'ita manuna 'uomayamaya be 'ueyaseyaseyegu, ma'etamo yada eyaseyaseyeyo tuta nina 'abo ma 'agu tupu yailama, ta wate Tamagu be 'ina aniloseyao ma idi esaesa ma'egwao. 27 Yaona 'ai'aila 'emiya 'aene tomota 'aimi geya'abo wamwawamwawasa ga 'ana laba Yaubada 'ina loina mamata 'ite'itemiya 'iapwesama bemi.

Yesu 'ana 'ita 'idumaduma

(Madiu 17:1-8; Maki 9:2-8)

28 Ona nidi getedi sigumwala ga nadigega wiki 'ebweuna mulinaya, ga Pita be Yoni ta wate Yemesa Yesu 'i'au'ewedi ga ma'enao situ'e 'ebweu 'oya 'ena sabi sidasida Yaubada 'enaya. 29 Ta 'etamo tuga Yesu 'isidasida ga maninina 'ana 'ita maibo'ana 'idumaduma, ta wate 'ana 'oama 'ana 'ita wakewakeke 'ai'ailina. 30 Gote 'ena tai 'eluwa siapwesa, ga Yesu ma'ediya si'awa'awagwae, taudi nate Mosese be Ilaitiya. 31 Taudi wate 'ediyega maedana 'isaesae, ta Yesu ma'ediya sieonaona Yesu nina 'ina mwawasa 'etamo Yelusalema 'enaya manuna.

32 Ta Pita magosenao ni'atu si'eno mwataya, ta muliyega si'enotoolo, ga maedana sinabwana si'itena 'isae Yesu magosenao 'ediya. 33 Ga muliyega be siteluwa nidi Yesu sipilisine, ta Pita 'ilolagata ga 'igwae, “'Inapwana, bobo'ana 'eguma tai nidi siteluwa ma'edao bada tada miyami, be 'enega 'imi yoeyoe 'etoi 'a'abidi, 'ebweuna 'oyo manuyo, ta 'ebweuna Mosese manuna, ta wate 'ebweuna Ilaitiya manuna.” Nate Pita 'ionaona besobeso tuga.

34 Pita 'ina ona ma'etamo nigeya 'ilosalosaloni, ta etanidiya pwana 'imwa'utama ga 'itala kabobodi, 'enega tonono nidi simatauta. 35 Ta pwana 'enega 'ebweu 'enana sinonona, 'igwae, “Gete Natugu bobo'ai'ailina, 'ina onao wada nonodi.” 36 Ta ni'atu 'enana nina 'igumwala, ga Yesu tebweuna si'itena 'itootoolo. Tuta nina gote 'enaya to'ase nadigega matadiyega si'itena nigeya 'ebweu wate yaita 'ena sisimasimane, ta sikwaiyena. 12:17-18; Lu 3:22

Yesu gwama 'igie bobo'anena

(Madiu 17:14-18; Maki 9:14-27)

37 Ni'atu tomwa 'iulisina ga Yesu ma ina tononoyao 'oyega simwa'uta 'asaya ga boda sinabwana ma'ediyao sielobaloba. 38 Ta 'ebweu tai boda nidi 'ediyega Yesu 'i'itena ga 'ibwau, 'igwae, “Toe'ita, nuwanuwagu be natugu 'uda giebobo'ane, tauna natugu 'ebweuna namo tuga. 39 Ta tuta yauna 'abo yaluyaluwa bi'i gwama nina 'igiyai, natuguna 'ibwaubwau sinabwana ta 'ana lobwebwai manuna 'itatai ta 'awanega busobuso siapweapwesa. Tuta yauyauna nadigega 'igiegie 'elouyae. 40 Ta 'imu tonono nidi ni'atu yasidedi be 'aene yaluyaluwa bi'i nina siula apwese, ta nigeya sawesawediya.”

41 'Enega Yesu 'ediya 'igwae, “'Omi sana mwa'adega? Ga debami pa'ala yaita! Nai nigeya waemiemisegu, aga? Ni'atu 'imi debapa'ala 'enega yalo'ame'ame.” 'Enega tai nina 'ieonena, 'igwae, “Natumuna 'ume'e 'eguya.” 42 Ta ni'atu gwama nina 'imai Yesu 'ena, ga yaluyaluwa bi'i gwama nina 'iula mwa'utena bale'uya ga 'itaiya. 'Enega Yesu 'iloina ga yaluyaluwa nina 'iapwesa ga gwama 'ibobo'ana. Ga muliyega Yesu gwama nina 'i'au'ewena tamana 'ena.

Yesu 'ionalimana 'ina mwawasa manuna

(Madiu 17:22-23; Maki 9:30-32)

43 Tuta gote 'enaya tomota maibo'adi Yaubada 'ina waiwai ni'atu si'itenaya, 'enega nuwadi 'iowana sinabwana.

Ta tomotai nidi 'etamo sinuwanuwa owana, ta Yesu 'ina tononoyao 'ieonedi,
44 'igwae, “'Igu ona gete 'iabe yasimane 'emiya wada nuwa'i'ita 'ai'aili, nate Tomota Natuna
*Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina e'itao 'ediyega tomota simwalatonina 'aene tauna To'etoseyana Keliso.
'iabe sisipupuye be 'ana talauwalao 'ediya si'e'ebwayae.”

45 Gote 'ena 'igiekwani 'ai'ailidi, 'enega nigeya sawesawenaya be yage gete manudi nuwadi 'isabwalena, ta Yesu 'ena nigeya sienaenaida be 'aene 'ida giemaedana 'ediya, manuna simatauta.

Tonugana taudi tomuliya

(Madiu 18:1-5; Maki 9:33-37)

46 'Enega muliyega tonono nidi siegewagewana 'aene yaita 'ediyega 'adi toanugana.

47 Ta Yesu sa'i ni'atu 'idi nuwanuwa 'imwalatonina. 'Enega 'ebweu gwama 'i'au'ewenama ga selabenaya 'ietoolona, ta 'ieonedi, 'igwae, 48 “Gwama gete wa'ita. 'Abo yaita 'oyo gwama gete nadigega manugu 'uobobome, 'oyo nate ni'atu 'uobobomegu, ta wate 'agu Toetune nina ni'atu 'uobobomena. 'Enega 'abo yaita 'emiyega 'ana esana nigeya sinabwana tauna 'iloetana sinemi.”

'Abo yaita tauna nigeya 'ietaetalauwaleda tauna 'ilemelemeda

(Maki 9:38-40)

49 Ta Yoni 'ilolagata ga 'igwae, “'Inapwana, 'ebweu tai 'a'itena ta 'amu esanega yaluyaluwa bi'i 'iulaula apwesedi. 'Enega 'a'etobodena, manuna tai nina nigeya 'ida boda.”

50 Ta Yesu 'igwae, “Geya'abo wa'eto'etobode! Manuna 'abo yaita tauna nigeya 'ietaetalauwalemi, tauna 'ami tolema.”

Me Samelia 'aidi Yesu sie'idi'idiyena

51 Ni'atu 'asiyata 'iloselabena be Yesu 'iila limana galewaya, 'enega 'ina nuwanuwa 'isa'una be 'aene 'itatauya Yelusalema. 'Enega 'itoolo ga ma ina tononoyao sitauya. 52 Sitautauya ta Yesu 'ina tononoyao 'aidi 'ietune nuganedi, me Samelia 'idi 'asaya, be 'aene 'ebe eyawai'ata manudi sigibubu. 53 Ta esi tomiya'asa nidi nigeya 'ediya sitagwatagwala, manuna sinuwena Yesu nigeya 'idi 'asa 'ena 'itautauya ta esiya 'itautauya Yelusalema.

54 Ta Yemesa be Yoni ona gete sinonona, ga Yesu 'ena sigwae, “'Inapwana, mwa'adega? Sawesawenaya taloina be kaiwe sabesabeluluna galewega 'imwa'utama be 'i'ala egumwalidi?”

55 Ta Yesu 'igwae, “Tuwa! Geya'abo nadigega.” 56 Ga 'enega mali 'asaya silaga.

Tomota sitetoi nuwanuwadi be 'aene Yesu simuliye

(Madiu 8:19-22)

57 Ta ni'atu sitautauya, ga 'ebweu tai 'imai ga Yesu 'ena 'igwae, “'Abo'agu nuwanuwagu be yamuliyeyo. To sena 'ena 'utautauya, 'abo'agu yada muliyeyo.” 58 'Enega Yesu tai nina 'ieonena, 'igwae, “Kedewa bomitawa ma idi gaula ta wate manuwa ma idi newa, ta 'abo'agu Tomota Natuna nigeya 'igu 'ebe 'enomo.”

59 'Enega 'eluwena wate 'imai ga Yesu tai nina 'ena 'igwae, “'Umuliyegu.” Ta tauna 'iona, “'Inapwana, 'uda tagwalegu be nugana yaila be tamagu yayamwa 'ina mwawasa manuna be yada sa'u 'ali'aliye ta muliyega yamuliyeyo.” 60 Ta Yesu 'igwae, “Tuwa nada tamayo, ta taudi tomwawasa 'idi tomwawasao sida sa'u'ali'aliyedi. Ta 'oyo esiya 'imu paisewa 'aene 'uda etosimana Yaubada 'ina etoloina manuna.”

61 Ta 'etonina wate 'imai, ga 'igwae, “'Inapwana, bobo'ana be yamuliyeyo, ta 'uda tagwalegu be nugana yada ila be 'igu susuyao 'ediya yada lokaiyoni ta muliyega yamuliyeyo.” 62 'Enega Yesu wate 'ieonena, 'igwae, “'Eguma yaita 'oyo nuwanuwayo be 'upaisewa ta ma imu enuwanaluwa, nigeya 'ilobwelobweneyo be Yaubada 'ina 'ebeloina manuna 'upaisewa.”

Copyright information for `DOB