Mark 10

Sa'ila manuna

(Madiu 19:1-12)

Ga Yesu sena nina 'ipilisinena ga Yudia 'ina senaya 'itauya ga 'iabala bwasi Yolidani mali esenaya, ga boda sinabwana siegogonama 'enaya, ta 'enega 'ina bubuna nadigega 'ie'ita 'ediya.

Ta Palisiyao simai ga nuwanuwadi be Yesu sitoo, 'enega 'ena sienaida, sigwae, “'Inapwana, mwa'adega 'ida loina sa'ila manuna? Kapekapeyana be tai mwanena 'isa'ilei?”

Ta Yesu 'igwae, “Mwa'adega Mosese loina 'i'ebwaya'esemi?”

Ga Palisiyao sigwae, “Mosese 'itagwala be 'abo tai nuwanuwana be 'isasa'ila, nugana pwepwai 'ena 'ina guitoyasa 'isimane be mwanena 'i'ebwa'e ta 'enega 'isa'ile.”

Ga Yesu 'ieonedi, 'igwae, “Mosese loina nate 'i'etoladina 'omi 'imi debapa'ala manuna. Ta esi wada nuwa'i'isi Yaubada 'ina mweluluwa 'unu 'enega tomota 'eluwa 'imweluluidi, me'olotona ta mewainena. Gete 'alena 'enega tai tamana be sinana 'ida pilisinedi be mwanena ma'iyana simiyaluwa, be siteluwa nidi oodi 'ebweuna tuga. Lowa siteluwa nidi simiya dumaduma ta gete tuga ni'atu sie'ebweu. Yaubada ni'atu 'isa'u luwedi 'enega geya'abo 'ebweu yaita 'iemiya dumedumedi.”

10 'Enega muliyega Yesu ma ina tononoyao siilama anuwaya ga tonono nidi sienaida limana sa'ila manuna. 11 'Enega Yesu 'ieonedi, “'Eguma yaita tai mwanena 'isa'ile be 'iaibala mali waine 'ena, tai gete gimimwanena 'ena 'iguinuwa to'umalina, manuna 'iloelata. 12 Ta wate 'eguma waine mwanena 'isa'ile be 'iaibala mali tai 'ena, waine nina 'iloelata.” 5:31v11 1 Ko 7:10-11

Yesu gogama 'iona obobomedi

(Madiu 19:13-15; Luke 18:15-17)

13 Ta 'enega tomota gogama sime'edi Yesu 'enaya be 'aene 'ida gitoodi. Ta 'ina tononoyao esi gogama nidi si'etobodedi. 14 Ta Yesu 'ina tononoyao 'i'itedi ga 'ienapa'aledi, 'igwae, “Geya'abo gogama wa'eto'etobodedi, ta esi wada tagwaledi be 'eguya sida mai, manuna gogama getedi nadigega Yaubada 'ina 'ebeloina 'ilobwene 'ai'ailidi. 15 Manuna 'abo yaisigedi taudi geya'abo gogama getedi nadigega 'idi emisa, geya'abo sa'i Yaubada 'ina 'ebeloina 'ena silugulugu.”

16 'Enega Yesu gogama nidi 'i'aalidi ta 'igitoodi ga 'iona obobomedi.

Esaesa manuna

(Madiu 19:16-30; Luke 18:18-30)

17 Ga Yesu 'itoolo be 'aene 'itatauya, ta 'ebweu tai 'ipilima ga 'i'aetulasa Yesu matanaya ta 'igwae, “'Inapwana, yamwalamwalatoni 'aene 'oyo toe'ita bobo'ana, 'enega to'ase yada guinuwe be 'enega yawasigu ataya yaloba?”

18 Ga Yesu tai nina 'ieonena, 'igwae, “Mwa'adega ga 'enega 'u'awa bobo'anegu? Manuna nigeya 'ebweu yaita bobo'ana; nate namo Yaubada. 19 Ta Yaubada 'ina loinao ni'atu 'umwalamwalatonidi, nate 'aene:

Geya'abo loemwawasa.

Geya'abo loelata.

Geya'abo 'ipwala.

Geya'abo simana kabokabo.

Geya'abo kaboega tomota 'idi gwegwe 'u'ewa'ewadi.

Ta wate tamayo be sinayo 'uda 'amayabedi.”

20 Ga tai nina 'igwae, “'Inapwana, 'igu tuta gwamega ga batuwa loina nidi getedi yamuliya 'ai'ailedi.”

21 'Enega Yesu ma ina gwausowala tai nina 'iduneyena ta 'igwae, “Nate namo 'ebweuna yage 'ilogegesemu. 'Enega 'uila 'imu 'asaya be 'imu gwegwe maibo'adi 'uegimwaneyedi be 'adi maisa 'ueguyaiyedi togomabeso 'ediya, ta 'enega 'umamai be 'umuliyegu, be 'enega ma'etamo 'imu esaesa galewaya 'uda loba.”

22 Ona gete tai nina 'inonona ta 'ina esaesa sinabwana 'iegagalena, 'enega nuwana 'imwau 'ai'aila, ta 'iila.

23 'Enega Yesu 'ilo'ita dadana ga 'ina tononoyao 'ieonedi, 'igwae, “'Abo yaisigedi ma idi esaesa sinabwana 'idi lugu Yaubada 'ina 'ebeloina solanaya mwauna.”

24 Ta 'ina tononoyao nuwadi 'iowana 'ina ona gete manuna. 'Enega Yesu 'ieonedi, 'igwae, “Natugwao, Yaubada 'ina 'ebeloina 'ana lugu mwau wawasae. 25 Ona'ai'aila kameli tauna yobai sinabwana, 'enega tupwana mwauna be siyaluma 'ana lobwalena 'enega 'ilulugu, ta esi toesaesao 'idi lugu Yaubada 'ina 'ebeloina 'enaya mwau wawasae.”

26 Yesu 'ina ona gete manuna 'ina tononoyao sinuwa owana wawasae ga sieonena, “'Eguma gete nadigega, yaita sana sawesawenaya be 'ebe gwausowala 'iloba?”

27 'Enega Yesu 'iduneyedi ga 'igwae, “Yage gete mwau wawasae tomota 'ediya, ta esi nigeya mwauna Yaubada 'enaya, manuna Yaubada 'enaya yage maibo'ana kapekapeyana.”

28 'Enega Pita 'ilolagata ga 'igwae, “'Inapwana, 'abo'ama mwa'adega? Manuna 'ima gwegweyao maibo'adi ni'atu 'apilisinedi ta 'amuliyemu.”

29 Ta Yesu 'igwae, “Ona'ai'aila, 'eguma yaisigedi 'omi 'imi anuwao, tasimiyao, nuumiyao, sinamiyao, tamamiyao, natumiyao be 'imi bwa'ao wate wapilisinedi, ta wate 'elouya wada loba manugu be tetela bobo'ana 'ana simana manuna, 30 'ami e'isa gete tuga wada loba nadigega analedi anuwao, tasimiyao, nuumiyao, sinamiyao, natumiyao be 'imi bwa'ao, ta wate ma'etamo galewaya yawasimi ataya waloba. 31 Ta gete tuga toanuganao yaudi ma'etamo sida muliya be taudi simulimuliya ma'etamo sida nugana.”

Yesu 'ina mwawasa 'ana simana 'etonina

(Madiu 20:17-19; Luke 18:31-34)

32 'Enega ma'etamo 'edaya situ'etu'e Yelusalema manuna, ga Yesu 'inuganugana ta 'ina tononoyao simulimuliya, be ma idi nuwaowana, ta 'aina tomota wate ma idi matauta 'edaya simulimuliyedi. 'Enega 'ina tononoyao site tuwelo nidi 'ibwau egogona limedi ga 'iemataluwedi to'ase 'iabe 'iapwesa 'enaya, 33 'igwae, “Gete tuga tatu'etu'e Yelusalema. 'Abo'agu Tomota Natuna ta 'agu tosipupu nina 'ida telesipupuyegu totaliyao sinabwadi be loina 'ana toe'itao 'ediya, be 'igu mwawasa manuna sida loina, be muliyega sida 'ebwayaegu taudi nigeya me Yudia 'ediya, 34 be sida tuyeyegu be sigiwaligu be balaeyega sisapigu be 'enega siloemwawasigu, be 'asiyata 'etoi yatoolo limana.”

Yemesa be Yoni 'idi sida Yesu 'ena

(Madiu 20:20-28)

35 'Enega Yemesa be Yoni, taudi Sebedi natunao, Yesu 'ena simai ga sieonena, sigwae, “'Inapwana, 'amai sabi sida 'emuya.”

36 Ga Yesu 'igwae, “To'ase nuwanuwami be yada guinuwa manumi?”

37 Ta sigwae, “Ma'etamo 'imu 'ebeloina 'ena nuwanuwama be selabemuya 'ada miyatowa, 'ebweu 'ataimuya ta 'ebweu gegeumimuya.”

38 Ta Yesu 'ieonedi, 'igwae, “'Omi 'imi sida gete 'ana mwalatoi nigeya wamwalamwalatoni. Mwa'adega 'elouya keigana 'enega yanunuma, kapekapeyana be 'omi wate 'enega wanunuma? Ta wate bapitaiso mwauna nina ma'etamo yaloba, mwa'adega 'omi wate nadigega sawesawemiya be wada bapitaiso'esa?”

39 'Enega sigwae, “Sawesawemaya.” Ta Yesu 'igwae, “Ona'ai'aila, keiga nina 'enega yanunuma 'omi wate 'enega wanunuma, be wate bapitaiso nina 'enega 'iabe yada bapitaiso 'omi wate 'enega wada bapitaiso, 40 ta esi nigeya sawesaweguya be yaesinuwa yaisigedi ma'etamo 'igu etoloina 'enaya 'ataiguya be gegeumiguya sida miyatowa, manuna Yaubada tauna 'ina 'ebeloina be 'iesinuwa.”

41 Ta tononoyao site sanau Yemesa be Yoni 'idi sida sinonona ga sigamwasowaledi. 42 'Enega Yesu maibo'adi 'ibwau egogonedima ga 'ieonedi, “'Omi wamwalatonina taudi bale'uya sieesedi 'aene 'inapwanao 'idi tomotaiyao siloiloina pa'aledi. 43 Ta 'omi geya'abo wate nadigega taudi waguiguinuwa'esa. Ta 'eguma yaita 'oyo nuwanuwayo be 'emiyega 'uetoloina 'ilobwenemu be gosemwao manudi 'uda etoguinuwa. 44 Ta wate 'eguma yaita 'oyo nuwanuwayo be 'emiyega 'uetoanugana, 'ilobwenemu be gosemwao maibo'adi manudi 'uetopaisewa.

45 “Ta 'abo'agu Tomota Natuna
*Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina'itao e'ediyega tomota simwalatonina 'aene tauna To'etoseyana lKeiso.
yamai bale'uya nigeya 'aene tomota manugu siguinuwa, ta esi sabi guinuwa tomota manudi, ta wate yatagwalegu be yamwamwawasa tomota maibo'ami 'ami etoli'ama manuna.”v45 1 Ti 2:5-6

Batimio matana 'i'esasedi

(Madiu 20:29-34; Luke 18:35-43)

46 'Enega simai Yeliko 'ena, ga tuta nina Yesu ma ina tononoyao Yeliko sipilisinena, boda sinabwana si'oayabudi, ga tomata kebokebo 'ana esana Batimio silobena, tauna Timio natuna, ta tuta yauna 'eda tupitupinaya 'imiyami ta 'iesidasida mani be gwegwe manudi.

47 Ga Batimio nina ale 'inonona 'aene Yesu goma Nasaleta 'itautauya, 'enega Yesu 'ena 'ibwau, 'igwae, “Yesu ye, 'oyo Debida 'ina susu, 'uda 'atenuwa 'ole'oleyegu!”

48 'Enega tomota maibo'adi Batimio nina si'etobodena, sigwae, “Ulosa'u! Tuwa bwau!” Ta tuga 'ibwau toitoila, 'igwae, “Debida tubuna ye, 'uda 'atenuwa 'ole'oleyegu.”

49 'Enega Yesu 'itoolo, ta 'iona, “Wada bwauyenama.” Ga tomota sigwae, “Bobo'ana, 'utoolo. Yesu 'ibwauyemu.”

50 'Enega 'ana tala'apwala 'i'ewa yaulena ga 'itoolo manini, ga Yesu 'ena 'imai.

51 Ta Yesu 'ieonena 'igwae, “To'ase nuwanuwayo be manuyo yada guinuwe?” Ga tomata kebokebo nina 'igwae, “'Inapwana, kapekapeyana be matagu 'uda gie'esasedi?”

52 'Enega Yesu 'ieonena, 'igwae, “Bobo'ana! Gete tuga 'imu emisa 'enega matayo 'i'esasedi ni'atu.” Gote 'ena matana 'i'esasedi, ga 'edaya Yesu 'imuliyena.

Copyright information for `DOB