Mark 14

'Inapwanao nuwanuwadi be Yesu siloemwawasi

(Madiu 26:1-5; Luke 22:1-2; Yoni 11:45-53)

Ataona Sagalina 'ana 'ebe nuwa'i'ita 'ida apwesa 'asiyata 'eluwa mulidiya. Sagali nina 'enaya pwalawa daisina, nigeya 'ana 'ebe gieseseyamo, si'a'ani. Ta totaliyao sinabwadi be loina 'ana toe'itao sinuwanuwa edaedadama mwa'adega Yesu sida kabo'ese be 'aene sida giyai be sida loemwawasi, ta sigwae, “Geya'abo sagali solanaya Yesu tagiyagiyai 'abona nai tomota sigamwasowaleda be silosaiya 'edaya.”

Waine Yesu 'ieoloina 'asa Betani 'enaya

(Madiu 26:6-13; Yoni 12:1-8)

Tuta nina Yesu Betani 'ena 'imiyami, ta 'i'e'ai Saimoni 'ina anuwaya, tauna lowa tolepelo 'ebweu; ga waine 'ebweu ma ina bunama 'iluguma; ta bunama nina 'ana esana nadi, 'ana maisa sinabwana, ta 'ana botolo bobo'ana wawasae 'enaya 'isiwena. Ta waine botolo 'awana 'i'aulasena ga bunama nina Yesu debanaya 'isiwena.

Ta 'aina tomota si'itena ga waine silomugiyena, sigwae, “To'ase manuna bunama 'imudalina? 'Ilobwenena be bunama nina 'igimwaneye be 'ana maisa 'etoi analedi kina nadigega 'i'ewa be 'ieguyaiye togomabeso 'ediya.” 'Enega waine nina si'ena pa'alina.

Ta Yesu 'ieonedi, 'igwae, “Tuwa! Walosa'u! Geya'abo waine wagie dededoni, manuna 'ina lema gete 'eguya bobo'ana wawasae. Togomabeso nidi waoneonedi tuta maibo'ana selabemiya simiyami, be 'abo to tuta nuwanuwami wada lemedi, ta 'abo'agu esi nigeya tuta dudulana ma'emi tamiyami. Ta waine gete to'ase sinabwana nadigega 'enaya 'iguinuwena 'eguya, nate bwalagu 'igimi eoloina sabi gibubu 'agu sa'u'ali'ali manuna. Ta ona'ai'aila, ma'etamo teteligu 'ana loguguya tomota sinoonoi bale'u maibo'ana 'enaya, ta waine gete 'ina guinuwa 'eguya tetelina sida emwasali wate.”

Yudasa 'ina tagwala Yesu 'ana telesipupu manuna

(Madiu 26:14-16; Luke 22:3-6)

10 'Enega Yesu 'ina tonono 'ebweu site tuwelo 'ediyega, tauna Yudasa Isikaliota, 'itauya totaliya sinabwadi 'ediya ga nuwanuwana be Yesu 'ediya 'ida telesipupuye. 11 Ga Yudasa 'ina ona sinonona ga sigwausowala ga 'ena siona upaupa be 'aene 'ana maisa si'ebwa'e. 'Enega Yudasa tuta bobo'ana 'iyamwena be 'aene Yesu 'ediya 'ida telesipupuye be sigiyai.

Yesu ma ina tononoyao si'e'ai

(Madiu 26:17-25; Luke 22:7-14, 21-23; Yoni 13:21-30)

12 Ataona Sagalina solanaya beledi daisina nigeya gieseseinamo sie'ani ga sagali 'ana 'asiyata nugana 'ena lamiyao siunudi Ataona 'ana 'ebe nuwa'i'ita manuna, ga 'asiyata nina 'ena Yesu 'ina tononoyao sieonena, sigwae, “'Inapwana, mane 'ena nuwanuwayo be Ataona Sagalina manuyo 'agibubu?”

13 'Enega 'ina tononoyao 'eluwa 'ietunedi ta 'ieonedi, “Watatauya Yelusalema, be 'abo tai 'ebweuna ma ina 'ebe gobwasi 'i'aalina waloba, tai nina wamuli 'oayabu 14 be ma'emi walulugu anuwaya, be toni anuwa waeona, wagwae, ‘'Ima toe'ita gete nadigega 'iona'esa, “To sena 'utagwale be 'ena ma igu tononoyao Ataona masulina 'a'a'ani?” ’ 15 Be 'enega 'iabe sena sinabwana etanaya gibugibubuna 'ie'itami, tauna 'ena Ataona masulina wagibubu manuda.”

16 'Enega tonono nidi sitauya ga 'asa Yelusalema 'ena silugu ga to'ase nadigega Yesu 'isimanena 'ediya yage nidi maibo'adi silobedi, ga anuwa nina 'ena Ataona masulina sigibubuna manudi.

17 Ta 'asuinuwanuwaya Yesu ma ina tononoyao simai 18 ga site tuwelo simiyatowa sabi 'e'ai. Ta 'idi 'e'ai solanaya Yesu 'ieonedi, “Gosegwao yaona 'ai'aila 'aene 'ebweuna tai gete tuga ma'edai ta'e'ai, ta sa'i 'iabe 'itelesipupuyegu.”

19 Ta Yesu 'ina ona gete manuna sinuwa mwau, ga 'ebweuna 'ebweuna Yesu 'ena 'ienaida, 'igwae, “'Inapwana, yaita? Nai 'abo'agu?”

20 Ga Yesu 'igwae, “'Agu tosipupu nina 'omi wate tuwelo 'emiyega, ta tauna ma'iyagu gaeba 'ebweuna 'enega 'a'e'ai. 21 'Abo'agu Tomota Natuna ma'etamo yatatauya 'eda nina lowa Buki Tabu 'ena 'igimisimanena, ta esi 'agu totelesipupu nina nuwa'ole'olena sa'i; ta bobo'ana 'abo lowa sinana geya'abo 'ida enaenatune, manuna 'ina tubuwa 'enega 'ienuwa'ole'ole 'ina guinuwa to'umalina manuna.”

'Inapwana 'ina 'e'ai

(Madiu 26:26-30; Luke 22:15-20; 1 Kolinita 11:23-25)

22 'Etamo si'e'ai ta Yesu masula 'i'ewena ga manuna 'iona oboboma ta 'igitomwena ga 'i'ebwa'edi, 'igwae, “Gete wa'ewa oogu.”

23 Ta oine makeigana wate 'i'ewena ga manuna 'ilokagutoki Yaubada 'ena ga 'i'ebwa'edi, ga maibo'adi sinuma. 24 Ta wate 'ieonedi, 'igwae, “Gete lalagu 'idaudau tomota yaumi manumi, nate loina auwauna. 25 Ta yaeonemi tuta gete be mulinaya oine gete geya'abo 'enega yanumanuma limana ga 'ana laba oine auwauna yanunuma Yaubada 'ina senaya.”

26 'Enega wali 'ebweuna siwaliyena ta siapwesa ga situ'e 'Oya Olibe 'enaya.

Yesu 'isimana apwesa eyaseyase manuna

(Madiu 26:31-35; Luke 22:31-34; Yoni 13:36-38)

27 Ta Yesu 'ieonedi, “'Iabe maibo'ami wada denasinegu, nadigega Buki Tabu 'ina simana, 'igwae,

‘To'ita'i'ita sipi yaloemwawasi be sipi nidi sida 'elelewana.’

28 Ta 'igu toololimana mulinaya Galili 'ena yatatauya be 'omi muliguyega wawawai.”

29 'Enega Pita 'ilolagata ga 'igwae, “'Iabe maibo'adi sidena sineyo ta tebweugu ma'iyayo.”

30 Ta Yesu Pita 'ieonena, “Yaona 'ai'aila, boiboi batuwa muliyega be kakaleko 'igwagwane maluwa, ta 'oyo 'uda gimi eyaseyaseyegu matoi.”

31 Ta 'enega Pita ma ina 'awapa'ala 'igwae, “'Inapwana, geya'abo sa'i yaeyaseyaseyeyo. 'Eguma siloemwawasiyo 'abo'agu wate ma'iyayo siloemwawasida.” Tononoyao maibo'adi wate nadigega siona'esa.

Yesu Gedesemane 'ena 'isidasida

(Madiu 26:36-46; Luke 22:39-46)

32 Ga sitauya 'ebweu sena 'ana esana Gedesemane 'ena, ga 'ina tononoyao 'ediya 'igwae, “Gete 'ena wamiyami, ta 'abo'agu yasisida Yaubada 'ena.” 33 Ta site toi ma'enao 'i'au'ewedi, taudi Pita be Yemesa be Yoni, 'enega Yesu ma ina 'ateuyauya ta ma ina nuwamwau, 34 'ieonedi, 'igwae, “'Ategu 'iuyauya sinabwana nai 'iabe yamwamwawasa, 'enega bada wamiyami ta walomata'i'ita.”

35 Ta Yesu 'ialaga tupwana ga 'ibe'u sanamwa'uta ga 'isidasida 'aene 'abo kapekapeyana 'elouya gete Yaubada 'ida 'ewayaule, 36 'igwaegwae, “Tamagu ye, guinuwa yauna sawesawemuya, 'enega nuwanuwagu be 'elouya keigana gete 'eguyega 'u'ewayaule, ta geya'abo 'abo'agu 'igu nuwena 'enega ta 'oyo esi 'imu nuwena 'enega 'uda guinuwa.”

37 'Enega 'iila ga site toi nidi 'ilobedi ni'atu si'eno mwataya, ga Pita 'iloanoanona, 'igwae, “Saimoni, mwa'adega 'u'eno'eno. Nigeya sawesawemuya be tuta gidalina namo manuna 'umata pa'ala, aga?”

38 Ga wate 'ieonedi maibo'adi, 'igwae, “'Ilobwenemi be wamata pa'ala be wasidasida be 'enega geya'abo Seitani 'itootoomi. Ona'ai'aila, yaluyaluwami nuwanuwana ta tuga manuna oomi sitaba.”

39 'Enega Yesu 'ilaga limana ta 'ina sidasida ni'a 'ilolimena.

40 Ta Yesu wate 'iila 'ina tononoyao 'ediya ga 'ilobedi wate si'eno mwataya, manuna matadi ni'atu si'eno'eno. Ta 'iloanoanodi ga sitoolo ma idi omayamaya, ga nigeya 'idi 'ebe onamo.

41 Ga Yesu wate 'ilaga ga 'isidasida, ta 'ina ilama 'etonina 'enaya 'ilobedi si'eno mwataya, ga 'ieonedi, “Mwa'adega, ma'etamo tuga wa'eno'eno ta waeyawai'ata, aga? Ta wa'ita, 'abo'agu Tomota Natuna 'igu tuta ni'atu 'iapwesa be sida sipupuyegu toto'umalidi 'ediya. 42 Watoolo be tatatauya, manuna 'agu totelesipupu nina ni'atu gete 'imeema.”

Yesu 'ana giyaina

(Madiu 26:47-56; Luke 22:47-53; Yoni 18:2-12)

43 Yesu 'etamo 'ionaona ga Yudasa 'iapwesama, tauna Yesu 'ina tononoyao site tuwelo 'ebweuna 'ediyega. Ta wate totaliya sinabwadi be loina 'ana toe'itao be 'inapwanao tolosaiyao Yudasa ma'edi sietunedi be 'aene Yesu sida giyai, ta boda nidi ma idi sisisaiyao be wepasiyao wate sime'edi.

44 Ta Yudasa we'iwe'iyaya ni'atu 'ediya 'isimanena, 'igwae, “'Abo yaita ya'atubwaili, nate tauna Yesu, be wagiyai ta walomata'i'isi be watauye.” 45 'Enega 'itauya palupaluna Yesu 'ena ga 'ilokagutokiyena ta 'i'atubwailina. 46 'Enega boda nidi siapwesama ga Yesu sigiyaina.

47 Ta Yesu 'ina bodao 'ebweuna 'ediyega 'itootoolo selabenaya ga 'ina sisisaiya 'ilisilolona ga totaliya sinabwana 'ina toguinuwa tenana 'i'upwa yaulena.

48 Ta Yesu boda 'ieonedi, 'igwae, “Sana 'abo'agu to'ipwala ga 'enega ma imi sisisaiya be ma imi wepasi wamai sabi giyaigu. 49 Ta to'ase 'alena ga 'enega nigeya wagiyagiyaigu 'asiyata nidi yaudi gamwagamwanimiya yamiyami Anuwa Tabu 'ena ta yae'ie'ita tomota 'ediya? Ta tuwa tuga yage getedi siapwesama be 'aene palopitao 'idi gimisimana Buki Tabu solanaya sida apwesa.”

50 'Enega Yesu 'ina tononoyao maibo'adi sidena sinena. 51 Ta 'ebweu tubuwau ma 'ana 'oama 'ebweuna namo Yesu 'i'oayabuna, ta tolosaiyao nuwanuwadi sigiyai, 52 ta sigisa'ilina ga 'ana 'oamamo si'ewena, ta mabubugewana 'idena.

Yesu si'au'ewena toloinao 'ediya

(Madiu 26:57-68; Luke 22:54-55, 63-71; Yoni 18:13-14, 19-24)

53 Ta Yesu si'au'ewena ga siluguyena totaliyao 'idi 'inapwana 'ina anuwaya, manuna anuwa nina 'ena totaliya sinabwadi be 'inapwanao be loina 'ana toe'itao ni'atu siegogonama ga simiyami. 54 Ta Pita 'edasolega Yesu 'imuliyena ga 'imai totaliya sinabwana nina 'ina 'asaya, ga Pita nina to'ita'i'itao ma'ediya simiyatowa, ta kaiwe 'ena sisiyasiyata.

55 'Enega totaliya sinabwadi be 'inapwanao nidi nuwanuwadi Yesu 'ana toe'ewao sida lobadi be 'idi e'ewa 'enega Yesu sida loemwawasi, ta nigeya 'ebweu wate silobaloba. 56 Manuna toe'ewa yaudi sisimasimana, ta esi 'idi simana nigeya leleleya. Taudi maibo'adi tokabo tuga. 57 Ta 'aidi 'ediyega sitoolo ga Yesu sie'ewa kabokaboena, sigwae, 58 “Yesu 'ina ona 'ebweu 'anononaya, 'igwae, ‘Anuwa Tabu gete tomota si'abinaya ma'etamo yalige yaulei be 'asiyata 'etoi 'ediya yada 'abilima, ta nigeya tomota nimadiyega.’ ” 59 Ta sa'i 'idi simanao yage gete manuna nigeya sieleleleya.

60 'Enega totaliya sinabwana nina matadiya 'itoolo ga Yesu 'ienaidena, 'igwae, “Nigeya 'imu e'isamo, aga? Tomota gotedi 'idi e'ewa 'emuya ni'atu 'unononaya?” 61 Ta Yesu tuga 'i'alaenono, ga nigeya 'ionaona.

Ta 'enega totaliya sinabwana Yesu 'ena 'ienaida limana, 'igwae, “Mwa'adega 'oyo Yaubada natuna To'etoseyana niyo, nai nigeya?”

62 Ga Yesu 'igwae, “'Abo'agu tauna, Tomota Natuna nigu, be ma'etamo wa'itagu Toewaiwai sana 'atainaya yamiyami be wate galewa pwananao debadiyega yamama.”

63 'Enega totaliya sinabwana nina 'igamwasowala 'ai'aila, 'enega taunamo 'ana 'oama 'isabuna ta 'igwae, “'Ina ona to'umalina wanononaya? Ona'ai'aila tai gete Yaubada 'isinalina. Tuwa! Geya'abo wate 'ana toe'ewao sionaona 'ina loegesiyao manudi. Mwa'adega 'imi nuwanuwa Yesu manuna?”

Ta 'enega maibo'adi silolagata ga sigwae, “'Ilobwenena be 'imwamwawasa!”

65 Gote 'ena 'aina tomota Yesu sigiwalina, ga matana 'oamega siwaduna ta siunu dadanena ma idi 'eetete, sigwae, “'Ueonama yaita 'isapimu.”

Ta to'ita'i'itao nidi Yesu sigiyaina ga sisapisapi ta sitautauye.

66 Ta Pita ma'etamo 'etauluya 'imiyami, ga totaliya sinabwana 'ina toguinuwa gomagweine 'ebweuna 'iapwesama, 67 ga Pita 'i'itena 'isiyasiyata. 'Enega waine nina Pita 'iduneduneye ga 'igwae, “'Oyo goma Nasaleta Yesu nina lowa ma'iyayo wamiyami, aga?”

68 Ta Pita 'ieyaseyase, 'igwae, “Yage nina 'uonaonae nigeya yamwalamwalatoni.” 'Enega Pita 'idena ga tupwana 'iaapwesa.

69 Ta gomagweine nina Pita 'ienima susuyena tomiya nidi 'ediya, 'igwae, “Tai gote Yesu 'ina boda 'ebweu.”

70 Ga Pita 'inonona ga 'ieyaseyase limana, 'igwae, “'Abo'agu nigeya.”

Tuta kukupana namo mulinaya toyo'o nidi Pita sieonena, sigwae, “Ona'ai'aila 'ukabo. 'Oyo Yesu 'ina boda 'ebweu, manuna 'oyo goma Galili.”

71 'Enega Pita 'isawatamatamana ta ona to'umalina 'enega 'ibwautu'e, 'igwae, “Yesu tauna manuna waonaona, 'abo'agu nigeya wate yamwalamwalatoni. Tamada!” 72 Ta tuta gote 'ena kakaleko 'igwane 'eluwena, ga Pita 'inuwa'i'isina Yesu 'ina ona 'aene “Muliyega be kakaleko 'igwagwane maluwa, ta 'oyo 'uda gimi eyaseyaseyegu matoi.” Ta 'enega Pita 'ina kabo to'umalina 'inuwa'i'isina ga 'idedoi. 13:26 Dan 7:13v63-64 Yo 19:7 1 Loi 24:16v65 Ais 53:5v72 Mk 14:30

Copyright information for `DOB