Mark 3

Yesu tai nimameyomeyo 'igiebobo'anena

(Madiu 12:9-14; Luke 6:6-11)

'Enega muliyega Yesu 'iila limana anuwa tapwalolo 'enaya ga nada 'ebweu tai nima meyomeyona 'ilobena. Ta Palisiyao Yesu silomata'i'isi, be 'eguma tai nina 'igiebobo'ane Sabate 'enaya ma'etamo 'enega sida e'ewa. 'Enega Yesu tai nina 'ieonena, “'Utoolo be 'ulagama,” ga tai nina 'itoolo ga 'ilaga.

Ga Yesu 'inapwanao 'ieonedi, 'igwae, “Gete 'igu enaida 'emiya: To guinuwa bobo'ana 'edaya? Sabate 'ena talelema nai tagie'elouya? Ta'etoseyana nai taloemwawasa?” Ga 'ina ona nigeya sie'ie'isa. Ta Yesu 'idune masimasiyedi ma ina gamwasowala ta ma ina nuwamwau 'idi debapa'ala manuna, ga tai nina 'ieonena, 'igwae, “Nimayo 'uyasitoto,” ga tai nimana 'iyasitotona ga 'ibobo'ana.

'Enega Palisiyao ma idi gamwasowala siapwesa ga Elodi 'ina bodao ma'ediyao siloiloina be mwa'adega Yesu sida loemwawasa'ese.

Boda Galili le'awinaya

'Enega Yesu 'ipilisinedi ga ma ina tononoyao sidolo Galili le'awinaya, ta pwalu sinabwana simuliyenama. Boda nidi getedi Yesu alena sinononaya ta Galiliyega be Yudiaega be Yelusalemega be Idumea senanega be Yolidani mali senega ta 'aina 'asa nidi Taiya be Saidoni selabediyega siegogonama.

Ta Yesu tole'oasao 'igiebobo'anedi, 'enega tole'oasao yaudi siegigigilama sabi gitoona, 'enega Yesu 'ina tononoyao 'ieonedi, “Waga manugu wame'e be 'abo tomota siegigigila wawasae yagegelu wagaya.”

11 Ta tomotai nidi 'ediya yaluyaluwa bi'i siluguya, 'eguma Yesu si'itai, sibe'u sanamwa'uta matanaya ta sibwaubwau, sigwae, “'Oyo Yaubada Natuna.” 12 Ta Yesu 'iloina pa'aledi, 'igwae, “Geya'abo wabwaubwau apwesa 'aene 'abo'agu Yaubada Natuna.”

Yesu site tuwelo 'iesinuwedi

(Madiu 10:1-4; Luke 6:12-16)

13 'Enega muliyega 'oyaya 'itu'e ga 'ina tononoyao nidi 'iesinuwediya ga 'ibwauyedi ga situ'ema 'enaya, 14 ga 'ieonedi, 'igwae, “'Omi wate tuwelo yaesinuwemiya be 'omi ma'egwao tamiyami be muliyega yaetunemi 'aina sena 'ediya be wada loguguya 15 ta waiwaiyega yaluyaluwa bi'i tomota 'ediyega wada ula apwesedi.”

16 Ta 'adi esanao getedi: Saimoni (tauna wate 'ieesena Pita); 17 ta wate Yemesa matasina Yoni, taudi Sebedi natunao, ta Yesu 'ieesedi Bowanage (ta Bowanage 'ana mwalatoi 'aene taudi 'atuwa wepalala nadigega); 18 ta wate Anidulu be, Pilipi be, Batolomiu be, Madiu be, Tomasi be, mali Yemesa tauna Alipio natuna be, Tadiasi be, mali Saimoni, tauna togewana 'ebeloina manuna; 19 ta wate Yudasa Isikaliota, tauna ma'etamo Yesu 'ida sipupuye.

Yesu ta Bielisibubi

(Madiu 12:22-32; Luke 11:14-23, 12:10)

20 'Enega muliyega Yesu 'iila 'ina 'asaya, ta boda sinabwa wawasae siegogona 'enaya ga nigeya sawesawenaya Yesu ma ina tononoyao sieyawai'ata be si'a'a. 21 Ta 'ina susuyao sinonona 'aene Yesu nigeya 'ida eyawai'ata, 'enega sitauya sabi 'au'ewenama, manuna sinuwena 'aene, “Ni'atu 'ikabaleya.”

22 Ta loina 'ana toe'itao 'aidi ni'atu Yelusalemega simwa'utama ga Yesu 'ina paisewa sinabwana si'itenaya ga sigwae, “Tai gete 'ietoguinuwa manuna Bielisibubi,
*Bielisibubi: Yaluyaluwa bi'iyao 'idi 'inapwana, 'ebe matauta ta to'umalina, tauna Seitani 'ana tolema, nai Seitani tauna. Lowa me Ekiloni sibwagobwago 'enaya.
yaluyaluwa bi'i 'idi 'inapwana 'ina waiwaiyega yaluyaluwa bi'i 'iula apwesedi.”

23 'Enega Yesu tomota nidi 'ibwauyedima ga onasemalimaliyega 'ie'ita 'ediya, 'igwae, “To'ase manuna Seitani 'aene tauna 'ana bodao 'ediya 'ida etalauwala?” 24 Ta wate 'igwae, “'Eguma 'ebweu 'ebeloina 'enaya tomotai siweweyala be taudimo silosalosaiya ma'etamo 'ebeloina nina 'ineneneta be 'ibebe'u. 25 Wate 'eguma susu 'ebweuna ta siweweyala be taudimo silosalosaiya ma'etamo sineneta be 'idi miya 'ito'umali. 26 Seitani wate nadigega, 'eguma ma gosenao taudimo silosaiya 'iabe 'ina 'ebeloina nina 'ibebe'u be 'igugumwala.

27 “'Ebe'ita gete tai waiwaina nadigega Seitani 'ina anuwaya. Nigeya sawesawenaya 'ebweu yaita 'ilulugu be 'ina gwegwe 'ilo'ewadi, ta esi 'eguma 'ebweu tai balaeyega toewaiwai nina nimana be 'aena 'iyona nuganedi ta 'enega muliyega sawesawenaya 'ilulugu 'ina anuwaya be 'ina gwegwe nidi 'ilo'ewadi.

28 'Enega gete yaeona 'ai'ailimi 'aene tomota 'idi loegesiyao be 'idi ona to'umalina maibo'ana Yaubada 'ida nuwataudi, 29 ta 'abo yaita Yaluyaluwa Tabuna 'i'awa to'umaliyei, geya'abo sa'i Yaubada 'inuwanuwatau, ta gete bubuna to'umalina nina 'enaya 'ida miyaataya.”

30 Gete nadigega Yesu 'iona'esa manuna sionaona 'aene tauna 'ina waiwai yaluyaluwa bi'i 'enega. 1 Yn 3:8v28-30 Ib 6:4-6

Yesu sinana be tasinao 'enaya simai

(Madiu 12:46-50; Luke 8:19-21)

31 'Enega ni'atu Yesu sinana ta tasinao simai ga 'atamanaya sitoolo, ta 'enega ona namo sietunena be 'aene Yesu 'ida apwesama 'ediya. 32 Ga tomota nidi Yesu selabenaya simiyatowa sieonena, “'Inapwana, sinayo be tasimwao wa'ita apwesa, ta nuwanuwadi 'oyo.”

33 Ga Yesu 'ieonedi, 'igwae, “Yaita sinagu ta yaisigedi tasigwao?” 34 Ga taudi nidi selabenaya simiyami 'iduneyediya ta 'igwae, “Gete taudi sinagu be tasigwao. 35 'Enega 'eguma yaisigedi Yaubada 'ina nuwanuwa simulimuliye taudi tasigwao be nuugwao be wate sinagwao.”

Copyright information for `DOB