Mark 5

Yesu yaluyaluwa bi'i 'iula apwesedi

(Madiu 8:28-34; Luke 8:26-39)

1'Enega siabala ga silugu me Gelasine 'idi le'awaya, 2ga wagega Yesu 'isuya dabalaya, ta tai 'ebweu 'ilobena mayaluyaluwa bi'ina 'ina 'ebemiya duluwa, 'enega 'iapwesama, ta duluwa nina tomota 'adi 'ali'ali.

3Ta tai gete lowa tomota sitoo be 'aene sida yoni malakwa kainumu 'enega, ta nigeya sawesawediya, 4manuna malakwa nidi nimanaya be 'aenaya tuta yauna 'ilasalasadi ta nigeya 'ebweu sawesawenaya be 'igiyai, 5ta 'idena sinedi ga 'itauya mitawaya ta boiboiya be 'asiyataya 'ali'aliya be 'oyaya 'iemagamagana, ta tauna gulewega 'iunuunu.

6Ta tai nina ni'atu 'edasolega Yesu 'i'itenama, 'enega 'ipili ga Yesu matanaya 'ilobwagoena, 7ta 'imagana toila, 'igwae, “Yesu ye, 'oyo Yaubada Toewaiwai sana Natuna, to'ase 'utootoo be 'uguinuwe 'eguya? Tuwa! Yaubada 'ana esanega yasida 'emuya be geya'abo 'uda giegie'elouyagu.”

8Ona gete 'i'inanena manuna Yesu ni'atu 'ieonena, “Yaluyaluwa bi'i niyo tai gete 'enega 'uapwesama.” 9Ta Yesu wate 'ienaida yaluyaluwa nina 'ena, 'igwae, “Mwa'adega 'amu esana?” Ga tauna 'igwae, “'Agu esana Tomoyauyau, manuna mabodama tai gete solanaya 'amiyami.” 10Ga 'isidasida gewagewana Yesu 'ena 'aene geya'abo 'asa gote 'enega 'ietuetune apwesedi. 11Ta sena gote 'enaya bawe yauna siduwaduwala 'oyaya. 12Ta yaluyaluwa bi'i nidi sisida Yesu 'enaya ga sigwae, “Uetunema be 'alulugu bawe gotedi 'ediya.”

13'Enega Yesu 'itagwaledi ga yaluyaluwa bi'i tai nina 'enega siapwesa ga bawe 'ediya silugu, 'enega bawe nidi siekabaleya ga maibo'adi sipili bulibuliyasu ga babagega sisobu olaya ga sidamana. Ta bawe nidi 'adi yau nadigega tu tausani.

14'Enega bawe 'adi to'ita'i'itao 'idi matautega sidena ga sitauya 'asaya, ga yage nidi si'itedi maibo'ana sisimanedi 'asa sinabwana be 'asa gidalidi tomotenidi 'ediya. 'Enega toni'asa nidi simai be 'aene taudi matadiyega sida 'ita to'ase 'iapwesa.

15Ta Yesu 'ena simai ga tai nina bada si'itena, lowa yaluyaluwa bi'i solanaya simiyami ni'atu debana 'ipalupalu ga 'oama 'i'otena ta 'imiyami. Gote 'ena maibo'adi simatauta.

16'Enega toepilialeale nidi tomotai 'ediya siemwasala mwa'adega tai nina 'ibobo'ana'esa, ta mwa'adega bawe siesilae'esa.

17Ta toni'asa nidi silolagata ga Yesu sie'idi'idiyena 'aene 'idi sena 'ida pilisine. 18'Enega Yesu wagaya 'idolodolo sabi gelu, ta tai nina ni'a 'igiebobo'anena Yesu 'ena 'isida, 'igwae, “'Inapwana, sawesawenaya yamuliyeyo?” 19Ta Yesu 'igwae, “Nigeya sawesawenaya, ta esi 'uila be 'utatauya 'imu susuyao 'ediya be Yaubada 'ina 'atenuwa'ole'oleyega 'igiebobo'anemuya 'uemwasali be sida nono.”

20'Enega tai nina 'itauya 'ebeloina Dekapoli 'ana 'asa sanau 'ediya ga Yesu 'ina guinuwa waiwaina manuna 'ietetela ga tomota maibo'adi sinonona ga nuwadi 'iowana.

Yesu iine 'eluwa 'igiebobo'anedi

(Madiu 9:18-26; Luke 8:40-56)

21Ga Yesu ma 'ana tomuliyao siabala limana, ga boda sinabwana siegogonama le'awa nina 'enaya.

22'Enega 'ebweu tai, 'ana esana Yailo, tauna anuwa tapwalolo 'ana to'ita'i'ita, 'imai ga Yesu 'ilobena ga matanaya 'ibwagobwago, 23ga 'isida waiwai, 'igwae, “'Inapwana, natugu mewainena 'ana le'oasa 'imwau 'ai'aila, ta tauna gwama tuga, ta nuwanuwagu 'umama be 'uda gitoo be 'ida bobo'ana, ta geya'abo 'imwawamwawasa.”

24'Enega Yesu ma'iyana sitautauya, ga boda sinabwana simulimuliye ta siegigigila 'edaya. 25Ta boda nidi soladiya 'ebweu waine ma'edi ma ina le'oasa. Le'oasa nina nate lalana 'idaudau yakwala tuwelo 'ediya, ta tuga 'etamo 'idaudau. 26Lowa togile'oasa yaudi 'ediya 'ina mani maibo'ana 'iloegumwalina, ta sa'i 'idi guinuwa 'enega nigeya 'ida bobo'ana, ta esi 'ana le'oasa 'isinasinabwa.

27Waine nina Yesu 'imuliyena manuna lowa tetelina 'inonona, ga 'atenaya 'inuwanuwa 'aene, “'Eguma tuga Yesu 'ana 'oama namo yagitoo yada bobo'ana.” 'Enega 'iloselabena ga 'ana 'oama 'igitoona 29ga lalana 'ina dau 'iyapasa manini, ta taunamo oona solanaya 'ilotoona 'aene ni'atu 'ibobo'ana.

30Ta Yesu ni'atu 'ilotoona 'aene waiwai 'enega 'iapwesa ga 'iasakowasi ga boda 'ienaidedi, 'igwae, “Yaita 'agu 'oama 'igitoona?”

31Ta 'enega 'ina tononoyao sieonena, “'Inapwana, ni'atu 'u'itena boda sia'oabu'oabuyemu ta siegigigila, ga 'oyo 'uenaida, ‘Yaita 'igitoogu?’ ”

32Ta Yesu 'ilo'ita dadana tomota gamwagamwanidiya be 'ida 'ita yaita 'ina waiwai 'ena 'iabala. 33Ta waine nina taunamo 'ana bobo'ana ni'a 'ilobena 'imwalatonina, 'enega 'imai ga ma ina dedela 'ina matauta manuna 'ibe'u sanamwa'uta matanaya ga 'isimana 'ai'aila 'aene tauna 'iguinuwena.

34Ta Yesu 'igwae, “Natugu, 'imu emisa 'enega 'ubobo'ana. 'Utoolo be ma imu gwausowala 'utatauya. 'Imu le'oasa maibo'ana ni'atu 'igumwala.”

35Tuta nina Yesu 'ionaona waine 'enaya 'aina tomota Yailo 'ina anuwega ale sime'ena, ga sigwae, “Natuyo ni'atu yawasina 'igumwala, ta geya'abo wate toe'ita nina 'ina tuta 'umudamudali.”

36Ta Yesu wate ale nina 'inonona ga Yailo 'ieonena, 'igwae, “Geya'abo 'u'ate'ate sa'ala, ta esi 'uemisegu tuga.”

37'Enega Yesu boda yauna 'i'etobodedi be geya'abo simulimuliye, ta nate namo 'ina tononoyao sitetoi ma'enao, nate Pita be Yemesa matasina tauna Yoni 38sitautauya ga Yailo 'ina anuwaya siapwesa ga 'ewabamu be dedoi sinabwana sinonona.

39Ta Yesu 'ilugu ga 'ieonedi, “To'ase manuna wadedoi ta waegalagalala? Gwama nigeya 'imwawamwawasa ta 'i'eno mwataya tuga.” 40Ta siedagiyena. Ta esi Yesu 'ipa'idi ga siapwesa, ta gwama tamana be sinana be 'ina tononoyao sitetoi Yesu ma'edi silugu gwama 'ina 'ebe'eno 'enaya. 41Ta Yesu gwama nimanaya 'igiyaina ga 'igwae, “Talita kumi.” Ta 'ana gibui, “Negeyo 'utoolo.”

42'Enega 'itoolo manini ga 'iadadana, manuna 'ana yakwala ni'atu tuwelo 'ilobena. Ta tamana be sinana nuwadi 'iowana 'ai'aila. 43Ga Yesu 'i'etobodedi 'igwae, “Geya'abo 'ebweu yaita 'ena wasimasimana 'igu guinuwa gete manuna, ta esi gwama 'ana masula wagibubu be 'i'a'a.” 6:19v34 Mk 10:52; Lu 7:50, 17:19v39 Yo 11:11v41 Lu 7:14

Copyright information for `DOB