Mark 8

Yesu boda 'ie'enidi

(Madiu 15:32-39)

1Tuta gote 'ena boda sinabwana wate siegogonama Yesu 'enaya ta nigeya 'adi masulamo. 'Enega 'ina tononoyao 'ibwauyedima ga 'ieonedi, 'igwae, 2“Tomota getedi ya'atenuwa 'ole'oleyedi manuna ni'atu 'asiyata 'etoi bada ma'egwao 'amiyami ta nigeya 'adi masulamo. 3'Enega 'eguma mabotanidi yaetune iledi 'etamo 'edaya sitatai, manuna 'aidi 'edasolega simai.”

4'Enega Yesu 'ina tononoyao sieonena, sigwae, “Mwa'adega sena mwatui daita 'ena tomota yaudi getedi 'adi masula taloba'ese?”

5Ta Yesu 'ienaidedi, 'igwae, “'Eisa 'ami belediyao simiyami?” Ga sigwae, “Sebeni namo.”

6'Enega boda 'iloinedi be bale'uya simiyatowa, ga beledi sebeni nidi 'i'ewedi ta manudi 'iona lokagutoki Yaubada 'ena, ga 'igitomwedi ga 'ina tononoyao 'i'ebwa'edi be tomota 'ediya sieguyai, ga sieguyai sakowasiyedi.

7Ta 'aina iyana gidalidi wate simiyami, 'enega manudi Yesu 'iona oboboma, ga 'ina tononoyao 'iloinedi be sieguyaiyedi wate tomota 'ediya.

8'Enega maibo'adi si'ai ga gamwadi 'ipawa, ga muliyega masula tupwatupwadi siegogonedi ga kodo sebeni siloemaedi. 9Ta boda nidi 'adi yau powa tausani nadigega.

10'Enega 'ietune ilediya, ga ma ina tononoyao silomanini ga 'idi waga sigeluna ga Dalimanuta senanaya sitauya.

Palisiyao nuwanuwadi we'iwe'iyaya sida 'ita

11'Enega Palisiyao simai ga Yesu 'ena siegewagewana ga sitoona be 'aene we'iwe'iyaya 'ebweu 'ida guinuwe manudi be sida 'awa'ai'aile 'aene 'ina waiwai Yaubada 'enega 'imai. 12Ta Yesu ma ina nuwamwau 'ieonedi, 'igwae, “Mwa'adega ga 'enega 'epata gete 'omi nuwanuwami we'iwe'iyaya, ta esi geya'abo 'ebweu wate we'iwe'iyaya wa'ita'ita.” 13'Enega 'ipilisinedi ga wagaya 'igelu limana ga siabala mali senaya.

Elodi be Palisiyao 'idi e'ita nadigega beledi 'ana 'ebe gieseseya

(Madiu 16:5-12)

14Ta 'adi 'abwaga nigeya si'ewa'ewa manuna sinuwa pupuledi, ta beledi 'ebweuna namo wagaya 'itupwa. 15Ga Yesu 'iemataluwedi, 'igwae, “Palisiyao be Elodi 'adi beledi 'ana 'ebe gieseseya 'enega wa'ita'i'isimi.”

16'Enega tonono nidi taudimo 'ediya sigwae, “Nai Yesu 'ina ona 'alena gete, manuna 'ada 'abwaga tanuwa pupulena.”

17Ta Yesu 'idi nuwanuwa ni'atu 'imwalatonina ga 'ieonedi, “To'ase manuna waonaona 'aene nigeya 'ami 'abwagamo? Nate nigeya manuna yaonaona. Mwa'adega 'imi nuwanuwa sipotaya ga nigeya sawesawenaya be 'igu ona wasinapudi. 18Mamatami ta sa'i nigeya wa'ita'ita, ta wate matenami ta sa'i nigeya wanoono, 'enega geya'abo wanuwanuwa'i'isi 'igu guinuwa pwaluyao 'adi 'e'ai manuna aga? 19Tuta nina beledi nima 'enega tomota paibi tausani yae'enidiya, ta tupwa 'eisa kodo waegogonedi?” Ga sigwae, “Tuwelo.”

20Ta Yesu 'ienaida wate, 'igwae, “Ga tuta nina beledi sebeni 'enega tomota powa tausani yae'enidiya ta tupwa 'eisa kodo waegogonedi?” Ga sigwae, “Sebeni.”

21'Enega Yesu 'igwae, “Ona'ai'aila, ta 'omi sana nuwami nigeya 'isabwasabwalena.”

Yesu tomata kebokebo 'igie bobo'anena

22'Enega Beteseida 'ena simai, ga tai tomata kebokebo tomota si'au'ewena Yesu 'enaya, ga sisidena be 'aene 'ida gitoo be 'ida bobo'ana. 23Ta Yesu tomata kebokebo nina nimanaya 'igiyaina ta 'i'au'ewena, ga 'asa nina 'enega siapwesa. 'Enega Yesu tai nina matana 'igiwalidi ta nimanega matana 'igitoodi ga 'ieonena, “Sawesawenaya to'ase 'u'itadi?”

24'Enega tai nina 'ilo'ita dadana ga 'igwae, “Tomota ya'itedi, ta 'adi 'ita 'atuwa nadigega kaiwe siloopili dadana.”

25Ta 'enega Yesu wate tai nina matana 'igitoo limedi, 'enega 'idune ga matana si'esasa 'ai'ailidi, ga yage yauna 'i'itedi.

26'Enega Yesu 'ietunena, 'igwae, “Geya'abo 'uilaila 'asa sinabwana 'enaya, ta esi 'utatauya tauyo 'imu anuwaya.”

Pita 'isimana Yesu manuna

(Madiu 16:13-20; Luke 9:18-31)

27Gote 'ena Yesu ma ina tononoyao sitautauya Sisalia Pilipai 'asanao manudi, ga 'edaya 'ina tononoyao 'ieonedi, 'igwae, “Mwa'adega tomota 'idi ona manugu 'aene 'abo'agu yaita?”

28Ga tonono nidi sigwae, “Tomota 'aidi siona 'aene 'oyo Yoni togiebapitaiso, ta 'aidi sigwae 'aene 'oyo Ilaitiya, nai gimipalopita 'ebweu tuga.”

29'Enega wate 'ienaidedi, 'igwae, “Ta 'omi mwa'adega 'imi nuwanuwa 'aene 'abo'agu yaita?” 'Enega Pita 'ilolagata ga 'igwae, “'Oyo Keliso, To'etoseyana niyo.”

30Ta Yesu 'iloina pa'aledi, 'igwae, “Geya'abo 'ebweu yaita 'ena wasimasimanegu.”

Yesu 'isimana 'ina 'elouya ta 'ina mwawasa manudi

(Madiu 16:21-28; Luke 9:22-27)

31Ta wate 'ilolagata be to'ase ma'etamo 'ilobai 'ie'itaena 'ediya, 'igwae, “'Abo'agu Tomota Natuna ma'etamo 'elouya sinabwana yaloba. Manuna 'inapwanao be totaliyao sinabwadi be loina 'ana toe'itao 'iabe sie'idi'idiyegu be siloemwawasigu ta 'asiyata 'etoi mulinaya yada toololimana.”

32Yesu 'ina ona gete 'enega 'isa'uapwese 'ai'ailina 'ina mwawasa manuna. 'Enega Pita Yesu ma'alenaya 'itauyena ga 'i'etobodena be 'aene geya'abo yage nidi siapweapwesa Yesu 'enaya.

33Ta Yesu 'iasakowasi ga 'ina tononoyao 'iduneduneyedi ga 'i'enapa'ala Pita 'ena, 'igwae, “'Oyo Seitani, gete tuga 'upilisinegu! Manuna 'imu nuwanuwa tomota 'idi nuwanuwa, ta nigeya Yaubada 'ina nuwanuwa nadigega.”

34'Enega Yesu boda maibo'adi be 'ina tononoyao ma'ediyao 'ibwauyedima ga 'ieonedi, 'igwae, “Yaita 'eguma nuwanuwana be 'imuliyegu, 'ilobwenena be tauna 'ina nuwanuwa 'ida guitoyase be tauna 'ana kelose 'i'aali be 'enega 'imwamwawasa, nate nadigega 'agu muliya nina 'ana 'eda.

35“Ta 'eguma yaita yawasina 'iegagale, ma'etamo yawasi nina 'iloseye. Ta 'eguma yaita manugu be tetela bobo'ana manuna yawasina 'itagwale be 'imwamwawasa, tauna 'iabe yawasina bobo'ana 'iloba.

36“'Eguma 'ida esaesao bale'uya sinabwa wawasae talobadi nate yage besobeso, ta esi yage sinabwana nate yawasida bobo'ana. 37Manuna 'eguma yawasida bobo'ana taloseyedi, nigeya 'ebweu wate 'ana lopa'elu 'imiyami.

38“'Abo'agu Tomota Natuna, ta 'abo yaita 'oyo manugu 'uomayamaya ta wate 'igu e'ita manuna 'uomayamaya be 'ueyaseyaseyegu 'epata gete to'umalidi ta sogasogalidi matadiya, ma'etamo yada eyaseyaseyo, tuta nina Tamagu 'ina esaesa tuyatuyayalina 'enega yaila limanama, ta wate aneloseyao ma'egwao.

Copyright information for `DOB