Matthew 15

Me Yudia tubudiyao 'idi bubuna

(Maki 7:1-23)

Muliyega Palisiyao be loina 'ana toe'itao Yelusalemega simai Yesu 'ena, ga sieonena, sigwae, “To'ase manuna 'imu tononoyao 'abo 'e'ai mulinaya nigeya nimadi sida 'utudi, nate tubudao 'idi loina sile'oale'oa?”

Ta 'ieonedi, “'Omi wate Yaubada 'ina loina wale'oale'oa, manuna tubumiyao 'idi bubuna wamulimuliyedi. Yaubada 'ina loina 'eluwa getedi: 'ebweuna 'igwae, ‘Tamayo be sinayo 'uda 'amayabedi’, ta 'eluwena wate 'igwae, ‘'Eguma yaita tamana nai sinana 'i'awa to'umaliyedi, 'ilobwenena be waloemwawasi.’ Ta 'omi 'imi e'ita kabokabo, wagwae, ‘'Eguma yaita tamana be sinana 'ieonadi, 'igwae, “'Igu gwegweyao ni'atu yatagwaledi Yaubada 'enaya, 'enega nigeya sawesaweguya be yalememi” ’, 'enega 'imi nuwanuwa 'aene tai nina 'ina lema nai 'ina 'amayaba tamana 'enaya nigeya yage sinabwana. Tubumiyao 'idi loina gete 'enega Yaubada 'ina loina waeyage besobesoena.

“Ona'ai'aila 'omi tokabokabo. Lowaenei Aisea palopita manumi 'ionaupaupa 'ai'aila, tuta nina Yaubada 'ina ona 'isimanena, 'igwae,

‘Tomota getedi 'awadiyega si'ama'amayabegu ta 'atediyega nigeya,

ta wate 'eguya sitapwalolo besobeso,

manuna 'idi e'itao 'abo'agu nigeya 'eguyega,

ta esi tomota tuga 'idi nuwenuwega.’”

10 'Enega tomota 'ibwauyedima ga 'ieonedi, “Ona gete wanono be wada mwalatoni 'aene 11 masula nidi 'awadega silugulugu nigeya sawesawenaya be sigiegie bailida ta esi ona nidi 'awadega siapweapwesama taudi esiya sigiebailida.”

12 'Enega 'ina tononoyao Yesu 'ena simai ga sieonena, “'Inapwana, 'unonona 'aene Palisiyao 'imu ona gete manuna ni'atu sinuwa mwau.”

13 Ta Yesu 'igwae, “Kaiwe nidi Tamagu nigeya 'iasoasodi, ma'etamo 'idabu yauledi. 14 Ta tuwa tuga, Palisiyao nidi sida miyami 'ana laba sibebe'u, manuna taudi toanuganao matakebokebodi, be 'eguma gosediyao matakebokebodi sianuganedi, 'iabe maibo'adi gaulaya sibebe'u.”

15 'Enega Pita 'ilolagata ga 'igwae, “Onasemalimali gete 'ana mwalatoi 'uda li'ami 'emaya.”

16 Ta Yesu 'igwae, “Nai 'omi wate 'etamo nuwami nigeya 'isabwasabwalena, 17 'enega nigeya wamwalamwalatoni 'aene to'ase 'awadega 'ilugulugu gamwadaya 'itatauya, be muliyega 'itatauya sumwana 'enaya. 18 Ta esi to'ase tomota 'awadiyega siapweapwesama nate 'atediyega simeema ta sigiegie bailidi, 19 nate nuwanuwa to'umalidi be loemwawasa be loelata be sogala be 'ipwala be onakabokabo be sinala be. 20 Yage getedi 'ediyega tomota 'igiegie bailidi, ta 'abo nimada geya'abo ta'utu'utudi tuta 'e'ai 'enaya, nate yaluyaluwada geya'abo 'igiegie baili.” Md 23:16v19 Ga 5:19-21

Kenani wainena 'ina emisa

(Maki 7:24-30)

21 'Enega Yesu sena nina 'ipilisinena ga 'itauya Taiya be Saidoni senadiyao 'ediya. 22 Ta sena nina 'enega Kenani wainena 'ebweu 'iapwesa ga Yesu 'ieonena, 'igwae, “'Inapwana, 'oyo Debida 'ina susu, 'uda 'atenuwa 'ole'oleyegu, manuna natugu mewainena ni'atu yaluyaluwa bi'i 'igiekabaleyena,” 23 Ta Yesu waine nina 'ina bwau nigeya 'ie'ie'isa, 'enega 'ina tononoyao simai ga Yesu sisidena, sigwae, “Waine nina 'ue'idi'idiye be 'itatauya, manuna 'ibwaubwau wawasae.”

24 Ta Yesu 'igwae, “'Abo'agu yamai sipi kwanikwanidi Isileli namo 'ina 'ebeloina solanaya manudi.”

25 Ta esi waine nina 'imai ga Yesu matanaya 'i'aetulasa, ta 'igwae, “'Inapwana 'uda lemegu.”

26 Ta Yesu 'iona, “Nigeya sawesawenaya be gogama 'adi masula ya'ebwaya kedewa 'ediya.”

27 Ta waine nina 'igwae, “'Inapwana, nate ona'ai'aila. Ta mwa'adega masula mugumuguna 'abo sibebe'u 'inapwana 'ina 'ebe 'e'ai 'enega, sawesawenaya be 'ina kedewao si'a'ani?”

28 'Enega Yesu waine 'ina ona nina 'ie'isena, 'igwae, “Waine, 'oyo sa'i toemisa 'ai'aila. 'Enega gete tuga 'imu emisa nina uwana 'ida apwesa.” Ta tuta gote 'enaya waine nina natuna 'ibobo'ana limana.

Tole'oasao yaudi 'igiebobo'anedi

29 'Enega Yesu sena nina 'ipilisinena ga 'iawadawada'e Galili olana le'awinega, ga 'oyaya 'itu'e, ga nada 'imiyatowa. 30 Ta boda sinabwana silagama ga 'idi tole'oasao sime'edi, taudi tolopegoi be, taudi esilae 'ediyega sinenetaya be, tomata kebokeboyao be, toekabaleyao be 'aidi tole'oasao wate Yesu selabenaya sisa'udi ga 'igiebobo'anedi. 31 'Enega pwalu nidi si'itedi toekabaleya sionaona be sinonono, be taudi esilae 'ediyega sinenetaya sibobo'ana limana, be tolopegoi sitautauya palupalu, be tomata kebokebo matadi si'esasedi. 'Enega boda nidi sinuwa owana, ga me Isileli 'idi Yaubada nina situpuna.

Yesu pwalu 'ie'enidi

(Maki 8:1-10)

32 'Enega Yesu 'ina tononoyao 'ibwauyedima ga 'ieonedi, “Boda getedi ya'atenuwa 'ole'oleyedi, manuna ni'atu 'asiyata 'etoi bada ma'egwao 'amiyami ta nigeya 'adi masulamo, ta geya nuwagu be mabotanidi yaetune iledi 'abona nai 'edaya sitatai.”

33 Ta 'ina tononoyao sieonena, sigwae, “Sena getei mwatui daita, ta mwa'adega pwalu sinabwana getei 'adi masula taloba'ese?”

34 'Enega Yesu 'ienaidedi, 'igwae, “'Eisa 'ami belediyao simiyami?” Ga sigwae, “Beledi sebeni ta 'aina iyana gidalidi.”

35 'Enega boda 'iloinedi ga bale'uya simiyatowa. 36 Ga beledi sebeni be iyana nidi 'i'ewedi ga manudi 'iona lokagutoki Yaubada 'ena ga 'igitomwedi, ta 'i'ebwa'edi 'ina tononoyao 'ediya, ga taudi sieguyaiyedi boda nidi 'ediya.

37 Ta maibo'adi si'ai ga gamwadi 'ipawa, ga muliyega masula tupwatupwadi siegogonedi ga kodo sebeni siloemaedi. 38 To'e'ai nidi tai dimo 'adi yau powa tausani, ta wate iine be gogama yaudi nigeya sisawasawadi.

39 Muliyega pwalu 'ietunedi ga siila limana, ta Yesu wagaya 'igelu, ga Magadani senanaya 'itauya.

Copyright information for `DOB