Philippians 1

Lokagutoki

'Abo'agu ta Timoti ma'iyagu 'aguiguinuwa To'etoseyana Yesu manuna, 'imi leta 'a'etoladinawa 'omi me Pilipai Yesu Keliso 'ina toekalesiyao, be wate 'imi toanuganao be 'imi dikoniyao ma'emiyao. Tamada Yaubada ta 'Inapwana Yesu Keliso 'idi obobomega wada miya gwausowala.

Paulo 'ina sidasida me Pilipai manudi

Tuta yauna Yaubada 'ena yalokagutoki, 'abo tuta nina yanuwami, ta ma igu gwausowala manumi 'igu sidasidao 'ediya, be ma igu lokagutoki 'ama lemao 'emiyega 'alobalobadi, tetela bobo'ana 'ana simana'unuyega ga batuwa.

Wate ma igu emisa 'aene Yaubada 'ina guinuwa bobo'adi ni'atu 'emiya 'ie'alena be tauna 'ida losaloni, ma'etamo Yesu Keliso 'ina 'asiyata sinabwana 'enaya. Ona'ai'aila, 'ilobwenena be manumi to'ase yalotolotoona nadigega, manuna 'omi nuwagu wa'ewena, manuna 'omi ma'egwao Yaubada 'ilemelemeda gete tuga deliya yamiyamiya, ta 'ilemelemeda wate tetela bobo'ana 'ana e'ita be 'ana 'ebe ewaiwai 'ediya.

Yaubada wate 'imwalatonigu 'aene Yesu Keliso 'ina obobomega nuwanuwagu 'omi, ta ma igu sidasida manumi be 'aene 'imi eobooboboma 'isinasinabwa, ma imi sinasinapu be ma imi mwalatoi, 10 be 'enega yage bobo'adi wada esinuwedi, be Keliso 'ina 'asiyata ma'etamo 'enaya adelimi bobo'ami ta 'esasemi, 11 ta ma imi guinuwa bobo'adi Yesu Keliso 'ina waiwaiyega, manudi tomota Yaubada sida tupui be sida 'awa eseese.

Paulo 'ina 'atetagwala Keliso 'enaya

12 Gosegwao, nuwanuwagu be wada mwalatoni 'aene mwau nidi ni'atu yalobedi 'ediyega tetela bobo'ana 'i'elelewana tomota yaudi 'ediya, 13 'enega sena gete 'enaya Sisa 'ina tolosaiyao be tomota maibo'adi ni'atu sinonona 'aene Keliso manuna sisa'ugu deliya. 14 Ta wate tasidao yaudi 'igu miya deliya si'itena, 'enega sietaetapewa 'Inapwana 'ina guinuwa 'ena, ta Yaubada 'ina ona sisimasimane ma idi 'atepatu.

15 'Aina tologuguyao e'ipi'ipiyega siloguloguguya Keliso manuna, ta 'aidi wate obobomega siloguloguguya, 16 taudi siobobomegu 'aene 'abo'agu deliya yamiyami tetela bobo'ana 'ana e'ita manuna, 17 ta esi toe'ipi'ipi nidi nuwanuwadi be sigienuwa mwauyegu gete tuga deliya yamiyami, 'enega 'idi kaboega Keliso tetelina siguguyae taudimo 'idi gilagata manuna.

18 Ta tuwa tuga Keliso nina tetelina 'ana loguguya yauna manuna yagwaugwausowala, 'eguma kaboega nai ona'ai'ailega. 19 Ta wate yada gwausowala, manuna yamwalamwalatoni 'aene Yesu Keliso yaluyaluwana 'ina lema 'enega, be 'imi sidasidao manugu 'ediyega, sida li'amigu miyamwau gete 'enega.

20 Wate 'abo'agu ma igu emisa ta ma igu nuwayaina 'aene geya'abo yaomayamaya, ta esi yanuwayaina 'aene ma igu 'atepatu gete tuga ta tuta yauna Keliso 'ana esana yada giesinabwa, nai 'igu miya bale'u mayawasigu 'enega, nai 'igu mwawasa 'enega.

21 Ona'ai'aila, 'igu miya bale'uya nate Keliso ma'iyagu, ta esi 'igu mwawasa 'enaya loeposeyana Keliso 'enega yalobai. 22 'Eguma bale'uya yamiyami 'igu guinuwao bobo'adi Keliso manuna siapweapwesa, 'enega nigeya yamwalamwalatoni to'ase nuwanuwagu be yaesinuwe. 23 Ona'ai'aila, yage 'eluwa 'ediyega 'adi esinuwa 'eguya mwau wawasae. Nuwanuwagu be bale'u gete yapilisine be Keliso ma'iyagu 'amimi, nate 'ebe gwausowala sinabwana. 24 Ta esi 'ilobwenegu be bale'uya yada miyami be 'enega yada lemelememi. 25 'Enega yamwalatoi 'ai'ailina 'aene 'omi ma'egwao tada miyami be yada lememi be wada gwausowala 'imi emisa Keliso 'ena manuna, 26 be wate 'igu ayausa limana 'emiya manuna wada gwausowala sinabwana, nate Yesu Keliso 'ina lema 'edaya manuna. 27 Ta wada 'ita'i'isimi 'aene 'imi guinuwao 'ediyega tomota Keliso tetelina sida 'awabobo'ane, 'enega 'eguma yayausimi, nai 'eguma yamiyaila, tuwa tuga tetelimi bobo'ana yada noono 'aene ma imi 'atetagwala watoolo pa'ala, ta ma imi nuwanuwa leleleya ga 'enega waetaetapewa tetela bobo'ana 'ana emisa manuna, 28 ta geya'abo wate wamatamatauta 'ami talauwalao 'ediya. Gete manuna taudi sida mwalatoi 'ai'aili 'aene sida esilae, be 'omi 'ami 'etoseyana wada loba Yaubada 'enega.

29 Manuna Yaubada ni'atu 'itagwala 'emiya be Keliso 'ena waemiemisa, be tauna wate manuna wada 'elouya, 30 nadigega 'abo'agu 'igu losaiya Keliso manuna be 'igu 'elouyao wa'itedi, ta gete tuga wanonodi, ta 'omi wate 'imi losaiya be 'imi 'elouyao nadigega waloba'esedi.v21 Ga 2:19-20v23-24 2 Ko 5:8v27 Ep 4:1v29 Gu 5:41v30 1 Te 2:2

Copyright information for `DOB