Revelation of John 13

Yobai 'eluwena

'Enega yadunedune ga 'ebweu wate yobai tauna olega 'itu'ema, kunanao 'adi yau sanau, ta bulubulunao 'adi yau sebeni, ta kunanao nidi maibo'adi ma 'adi peyaula esaesa, ta wate bulubulunao 'ediya esana to'umalina si'etoladidi. Ta yobai nina ya'itena 'ana 'ita 'atuwa sipu, ta sinabwana, ta 'aenao 'adi 'ita 'atuwa beya 'aedi, ta 'awana 'atuwa laiyoni 'awadi. Ta gimi yobai nina bweyabweyalina 'ina waiwai yobai nina olega 'i'ebwa'ena, ta wate 'ina 'ebemi esaesa be 'ina loina sinabwana 'i'ebwa'ena.

Ta yobai nina olega bulubuluna 'ebweuna 'ana 'ita 'atuwa esiesilaena, ga ni'atu mwawasega 'ibobo'ana limana. Ga gote 'ena tomota maibo'adi nuwadi 'iowana 'ai'aila, ga yobai nina olega simuliyena. Ta wate tomota yauyaudi gimi yobai 'enaya sibwagobwago, manuna ni'atu loina 'i'ebwa'ena yobai nina olega 'ena. Ta wate yobai nina olega 'ena sibwagobwago, ga sigwae, “Nigeya 'ebweu yaita 'ina waiwai yobai gete nadigega, be 'enega 'ena 'ida losaiya.”

Ta yobai nina ni'atu tagwala 'ilobena be yage to'umali wawasaedi 'ida 'inanedi, ta wate ma ina loina nawalae potitu 'ediya. 'Enega yobai nina Yaubada 'i'awa to'umaliyena, ga 'ana esana be 'ina sena ta wate galewa 'ana tomiyanao 'i'awa to'umaliyedi.

Ta wate tagwala 'ilobena be 'aene Yaubada 'ina tomotaiyao 'ida losaiyedi be 'ida ewaiwai, ta wate ma ina loina bodao maibo'adi 'ediya, be susuyao be 'enanao maibo'adi 'ediya, be 'ebeloina maibo'adi 'ediya. Ta me bale'u yauyaudi ma'etamo 'ena sibwabwago, nate taudi 'abo nigeya 'adi esanao simiyami yawasi bukina solanaya, buki nina Lami nina siloemwawasina 'ina buki, manuna buki gete solanaya taudi 'adi esanao lowaenei 'igimi 'etoladidi, 'enega muliyega bale'u 'imweluluina.

'Enega 'abo 'omi yaita matenana 'ida nono, 10 manuna

“'Abo yaita sigiyai, sida giyai tuga, ta wate yaita 'abo sisisaiya 'enega siloemwawasi, sida loemwawasa tuga.”

Ona gete 'enega Yaubada 'ina tomotaiyao sida toolopa'ala be sida etapewa waiwai.

11 'Enega wate 'ebweu yobai 'etonina ya'itena bale'uyega 'iapwesama, ta kunanao 'eluwa 'atuwa lami kunana, ta 'enana 'atuwa gimi yobai nina bweyabweyalina 'enana. 12 Ta yobai olega 'ina waiwai maibo'ana yobai auwauna 'i'ebwa'ena be 'aene tauna 'ida loina, ta yobai olega 'ida dunemo. 'Enega yobai nina auwauna me bale'u maibo'adi 'iloinedi, ga yobai olega 'ena sibwagobwago, tauna lowa 'iesilae ga 'ibobo'ana limana. 13 Ta wate edeedede 'iguinuwedi, nadigega kaiwe sabesabeluluna 'iguinuwena, ga galewega 'ibe'uma bale'uya tomota matadiya. 14 Ta ni'atu tagwala 'ilobena be 'enega yobai nina olega matanaya edeedede nidi 'iguinuwedi, ga gote 'ena me bale'u maibo'adi 'ikaboedi. Ta 'ina kabo nidi 'ediya 'igwae, “Tokwalui 'ebweuna wabubu, be 'ana 'ita 'atuwa yobai nina sisisaiyega 'iesilae, ga 'ibobo'ana limana.”

15 'Enega sibubunaya ta yobai nina auwauna ma ina loina, 'enega tokwalui nina yawasina 'i'ebwa'ena ga sawesawenaya 'iona, 'enega 'iloina 'aene 'abo tomota nigeya 'ena sibwagobwago, mwawasa sida loba. 16 Ta wate maibo'adi 'iloinedi, gidagidalidi be sinasinabwadi, toesaesao be gomabesoyao, ta wate 'inapwanao be topaisewao, be 'aene nima 'ataidiya nai debadiya 'ana we'iwe'iyaya sida sa'udi, 17 ta 'ediya loina pa'alina 'isa'una, be taudi 'abo we'iwe'iyaya nina nigeya 'ediya, geya'abo wate sida egiegimwane, nai sigimwagimwane, 'ana laba yobai nina 'ana we'iwe'iyaya si'ewa bemi, nate 'ana esana nai 'ana numela. 18 Ta gete 'ana mwalatoi 'imiyami be 'abo yaita ma ina mwalatoi yobai nina 'ana numela 'ida sawa, nate 'ebweu tai 'ana numela, sikisi analedi be sikisiti sikisi (666). Et 14:12v13-14 Md 24:24v17 Et 14:9-11

Copyright information for `DOB