Revelation of John 19

Ga muliyega galala sinabwana galewega yanonona 'atuwa pwalu sinabwana 'enadi, sigwaegwae,

“Yaubada tada tupui, tauna To'etoseyana ta Toesaesa ta Toewaiwai sana.
Ta 'ina loina maibo'ana palupaluna ta bobo'ana, manuna tosogala diidiga nina 'ina sogalega bale'u maibo'ana 'igie to'umaliyenaya, ni'atu 'ana e'isa 'ilobena. Ta wate 'asa nina 'ena Yaubada 'ina tomotaiyao siloemwawasidi, 'enega 'igieto'umaliyena.”

Ta wate sibwau, sigwae, “Yaubada tada tupui, manuna 'asa nina sinabwana 'i'ala'alasi, ta 'asuna tuta maibo'ana 'itu'etu'e.”

'Enega 'inapwanao nidi site tuweniti powa be wate yobai nidi site ata sibe'u sanamwa'uta tauna Yaubada nina 'ebemi esaesa 'ena 'imiyatowa matanaya, ga 'ena sigwae, “Nadigega. 'Atupuyo!”

Lami nina 'ina ai sagalina

'Enega 'ebemi esaesa nina 'enega 'ebweu 'enana 'imai ga 'igwae,

“'Omi Yaubada 'ina toguinuwao be 'ana to'amayabao, gidalimi be sinabwami, wada lotuputupu 'enaya.”

Ta wate yanonona 'atuwa boda sinabwana 'enadi, ta wate 'atuwa bwasi daudauna 'enana, ta wate 'atuwa wepalala 'enana, sigwaegwae,

“Yaubada wada tupui, manuna tauna 'ida 'Inapwana Toewaiwai sana, ga ni'atu 'ietoloina.
Tada gwausowala be tada uyawana 'ai'aila ta wate tada 'awabobo'ane, Lami 'ina ai manuna, ta mwanena ni'atu 'ieiyalina 'idi ai manuna, ta waine nina ni'atu 'ana 'oama wakewakekena ta 'esasena Yaubada 'i'ebwa'ena.”

Ta 'oama nina 'ana mwalatoi nate Yaubada 'ina tomotaiyao 'idi bubuna palupaluna.

'Enega anilose nina 'eguya 'igwae, “Ona gete 'uda 'etoladi 'aene ‘Yaisigedi 'omi Yaubada 'ibwauyemi Lami nina 'ina ai sagalina 'enaya, wada gwausowala.’ ”

Ta wate anilose nina 'iona limana, ta 'igwae, “Gete Yaubada 'ina ona 'ai'aila.”

10 Ta 'aenaya yabe'u sanamwa'uta ga yabwagobwago 'enaya, ta 'enega 'igwae, “Geya'abo nadigega. 'Abo'agu tuga Yesu 'ina toguinuwa, 'oyo nadigega, ta wate nadigega tasimwao taudi Yesu 'ana tosimanao, Yaubada esi 'ena 'uda bwagobwago.” Manuna Yesu 'ana tosimanao 'adi lotoona nadigega palopitao 'adi lotoona Yaubada yaluyaluwana 'enega.

Osi wakewakekena be 'ana togelu

11 Ta galewa ya'itena 'i'egegena, ta 'enaya osi wakewakekena, ta 'ana togelu nina sieesena Togwaunuwa palupaluna. Ga 'ina loina palupaluna 'enega 'ibwa'omatana, ta wate 'ilosalosaiya. 12 Ta matana 'adi 'ita 'atuwa kaiwe sabesabeluluna, ta debanaya 'ana peyaula esaesao yaudi simiyami. Ta wate 'ana esana si'etoladina nigeya sawesawenaya be yaita 'imwalatoni. Taunamo tuga 'imwalamwalatoni. 13 Ta 'ana 'oama nina 'i'otenaya, lala 'enega 'iepwasena, ta 'ana esana sieesena, sigwae, “Yaubada 'ina Ona.”

14 Ta galewa 'ana tolosaiyao 'idi osi wate wakewakekedi sigeludi, ga simuliyena, ma 'adi 'oama wakewakekedi, ta 'esasedi. 15 Ta 'idi toanugana nina 'awanega sisisaiya mamatana 'iapweapwesa, tauna 'etamo sisisaiya nina 'enega sena yauyaudi 'iewaiwai sinedi be 'ediya 'ida loina pa'ala, be wate oine 'ebeida 'ena 'ida idadi, nate Yaubada Toewaiwai sana 'ina gamwasowala sinabwana. 16 Ta 'ana 'oama 'ena be wate 'aenaya 'ana esana si'etoladina, sigwae, “Tai gete toloinao 'idi toloina, ta wate 'inapwanao 'idi 'inapwana.”

17 'Enega 'ebweu anilose ya'itena sinala 'ena 'itootoolo ga 'ibwau manuwao maibo'adi mwatuiya sitaetaeya 'ediya, 'igwae, “Wadelima Yaubada 'ina sagali sinabwana 'enaya, 18 be 'enega wa'a'a 'inapwanao esiyodi, be saiya 'adi toanuganao esiyodi, be tolosaiyao esiyodi, ta wate osiyao be 'adi togeluyao esiyodi, be wate tomota yauyaudi esiyodi, taudi 'inapwanao be 'idi toguinuwao wate, sinabwadi be gidalidi.”

19 'Enega yobai nina olega 'imai, ta wate bale'u 'ana 'inapwanao ma idi tolosaiyao, ya'itedi siegogona sabi losaiya osi 'ana togelu nina ma ina tolosaiyao 'ediya.

20 Gote 'ena yobai nina ma ina palopita kabokabo sigiyaidi, ga mayawasidi siuledi yaiyai sinabwana solanaya. Palopita kabokabo nina tauna lowa 'ina guinuwa waiwaidi 'iguinuwedi yobai nina matanaya ga 'ediyega tomota 'ikaboediya, taudi yobai nina 'ana we'iwe'iyaya 'ediya 'imiyami, ta 'ina tokwalui nina 'ana tobwagobwagoyao.

21 Ta sisisaiya osi nina 'ana togelu 'awanega 'iapweapwesa, 'enega yobai nina be 'ina palopita kabokabo 'idi tolosaiyao 'iloemwawasidi. 'Enega manuwa yaudi simai ga kokowadi si'enidi, ga gamwadi 'ipawa. Et 17:14v19 Sam 2:2v20 Et 13:11-17, 20:10v21 Et 19:17-18

Copyright information for `DOB