Revelation of John 3

Me Salidisa 'idi leta

Anilose nina totapwaloloyao Salidisa 'ena 'i'ita'ita'i'isidi 'ina leta 'uda 'etoladi Me Salidisa nidi manudi be 'uda gwae: Ale gete 'imai tai nina 'enega, tauna tai nina Yaubada Yaluyaluwana sebeni be wate kwadima sebeni 'ena simiyami. Tauna gete 'ina simana 'emiya, 'igwae, “'Imi guinuwao ni'atu yamwalamwalatonidi, ta wate tetelimi yanononaya 'aene mayawasimi wamiyami, ta nigeya sa'i, manuna yaluyaluwami ni'atu simwawasa. 'Enega 'eno'enoega wada toolo be to'ase gidalina 'emiya 'imiyami wada giesinabwa, ta geya'abo maibo'ana 'imwawamwawasa.

“Ta wate yamwalatonina 'aene 'imi guinuwao Yaubada matanaya 'aina nigeya palupaludi.
Ta lowa e'ita nina sie'itemiya ga wanononaya, 'enega wada nuwa'i'isi be wasanaila, ta wamuliya 'ai'aila. Ta 'abo nigeya 'eno'enoega watootoolo, 'etamo 'emiya yawawai be yaloesalutuimi nadigega to'ipwala, ta nigeya wamwalamwalatoni to tuta 'ena yawawa.

“Ta 'aimi Me Salidisa ma 'ami 'oama 'esasedi, 'etamo 'omi ma'egwao tada tauya leleleya ma 'ada 'oama wakewakekena, nate 'ami lobwene.

“Nadigega tuga 'abo yaisigedi 'omi waewaiwai, 'omi wate 'ami 'oama wakewakekedi wada 'otedi, be geya'abo 'ami esana yawasi bukina 'enega yakweukweu yauledi, ta esi 'ami esanao yada 'inanedi Tamagu be 'ina aniloseyao 'ediya, 'aene 'omi 'igu boda.

“'Enega 'abo 'omi yaita matenana, Yaluyaluwa Tabuna 'ina ona ekalesiyao 'ediya 'ida nono.”

Me Piladelipia 'idi leta

Anilose nina totapwaloloyao Piladelipia 'ena 'i'ita'ita'i'isidi 'ina leta 'uda 'etoladi Me Piladelipia nidi manudi, be 'uda gwae: Ale gete 'imai tauna 'esasena ta palupaluna 'enega, ta wate tauna Debida 'ina 'ebe gigege nimanaya 'igiyagiyai, ta 'abo 'awa 'igigege nigeya 'ebweu yaita sawesawenaya be 'igibode, ta wate 'abo 'igibode geya'abo 'ebweu yaita 'igigegigege.

Tauna gete 'isimana 'emiya, 'igwae, “'Imi guinuwao ni'atu yamwalatonidi, ta wate yamwalamwalatoni 'aene 'imi waiwai tupwana 'imiyami, manuna 'igu e'itao wamuliyedi, ta wate 'agu esana nigeya waeyaseyaseye. Ni'atu 'awa yagigegena manumi, ta nigeya 'ebweu yaita sawesawenaya be 'ida gibode.

“Ta wada enono 'ai'aila taudi Seitani 'ina bodao manudi, manuna sikabo ga sigwae 'aene taudi me Yudia, ta nigeya sa'i. 'Enega 'etamo yaloinedi be simamai matamiya be 'emiya sida bwagobwago, be 'enega maibo'adi sida mwalatoni 'aene 'omi yaobobomemi.

10 “Ta 'etamo tuta mwau 'ida apwesa bale'uya, be tomota yaudi 'ida toodi, ta 'omi esi mwau nina 'enaya yada 'ita'i'isimi, manuna 'igu ona waematamatanena, ga manugu wae'alama'i'itanemi.

11 “'Iabe yawawa, ta to'ase nadigega 'emiya 'imiyami wada giyai'i'isidi, be geya'abo yaita pali nina 'emiyega 'i'ewa'ewa yaule.

12 “Ta 'abo yaita 'omi 'iewaiwai, yada loina be 'ida e'ola Yaubada 'ina Anuwa Tabu manuna, be geya'abo wate 'ipilipilisine, ta 'emiya Yaubada 'ana esana yada 'etoladi, ta wate Yaubada 'ina 'asa 'ana esana yada 'etoladi, nate Yelusalema auwauna, tauna 'etamo galewega 'ida mwa'utama 'igu Yaubada 'enega. Ta wate 'emiya 'agu esana auwauna yada 'etoladi.

13 “'Enega 'abo 'omi yaita matenana, Yaluyaluwa Tabuna 'ina ona ekalesiyao 'ediya 'ida nono.” Et 14:1

Me Laodisia 'idi leta

14 Anilose nina totapwaloloyao Laodisia 'ena 'i'ita'ita'i'isidi, 'ina leta 'uda 'etoladi Me Laodisia nidi manudi, be 'uda gwae: Ale gete 'imai Topalupaluna 'enega, tauna Tosimana 'ai'aila, ta wate tauna Yaubada 'ina mweluluwa 'aledi, 'ina simana 'emiya 'igwae:

15 “'Imi guinuwao ni'atu yamwalatonidi 'aene nigeya yaiyai nai gonitu, ta ma igu nuwayaina 'aene 'ebweu sena 'ena wamiyami. 16 Ta 'omi tuga gamwagamwanaya, nigeya yaiyai nai gonitu 'idi senaya wamiyami. 'Enega 'awaguyega 'aene yada giwala apwesemi.

17 “Ta 'omi wagwae, ‘'Abo'agu toesaesa, ta yage yauna sawesaweguya,’ ta nigeya wamwalamwalatoni 'aene 'omi gomagomabesomi tuga, ta nuwa'ole'olemi sa'i, ta wate matakebokebomi be mabubugewami. 18 'Enega yaemataluwemi be 'eguyega goula 'ai'aila wada gimwane be 'enega wada eesaesa, ta wate 'oama wakewakekedi wada gimwanedi be wada 'otedi ta geya'abo mabubugewami watautauya, ta wate mulamula wada gimwane be matamiya wada sa'udi be 'enega matami sida 'esasa.

19 “Ta wada nuwa'i'isi 'aene yaisigedi 'omi yaobobomemi, 'enapa'alega be loinega yagiepaepaluyemi. 'Enega wada ewaiwai be 'imi to'umalina 'enega wada nuwa'ebuni.

20 “Ta wa'ita, 'abo'agu 'imi 'awa 'ena yatootoolo ta ya'au'aukeke. Ta 'abo yaita 'oyo 'enagu 'unono be 'awa 'ugigege, 'imu anuwaya yalulugu be 'abo'agu ta 'oyo taegosigosiyana, be 'oyo ma'iyagu tada 'e'ai leleleya.

21 “Ta 'abo yaita 'omi 'iewaiwai, yada tagwala 'enaya be ma'iyagu 'ada miyatowa 'igu 'ebemi esaesa 'ena, nadigega tuga 'abo'agu yaewaiwai, ga Tamagu 'ina 'ebemi esaesa 'ena ma'iyagu 'amiyatowa.

22 “'Enega 'abo 'omi yaita matenana Yaluyaluwa Tabuna 'ina ona ekalesiyao 'ediya 'ida nono.” 12:21; Ye 2:5v18 Ais 55:1v19 Ib 12:7v20 Yo 14:23v21 Md 19:28

Copyright information for `DOB