Revelation of John 4

Me Galewa Yaubada 'enaya sibwagobwago

Yage getedi ni'atu sigumwala ga yadunedune, 'enega 'ebweu 'awa ya'itena galewega 'i'egegena. Ta wate 'ebweu 'enana yanonona 'atuwa yoguli, tauna tuga lowa yanononaya, 'eguya 'ionaona 'igwae, “'Uda tu'ema be yada e'itayo to'ase 'iabe 'iapwesa.” Gote 'ena Yaluyaluwa Tabuna 'ina waiwai yalotoona, 'enega galewaya 'ebweu toloina ya'itena 'ina 'ebemi esaesa 'ena 'imiyatowa. Ta maninina ya'itena 'inamanamala 'atuwa gulewa esaesa. Ta 'ebemi esaesa nina ulele kalakalawina 'itoolo sakowasiyena. Ta 'ebemi esaesa wate 'adi yau tuweniti powa simiya sakowasiyena, ta 'ebemiya nidi 'ediya 'inapwanao site tuweniti powa simiyatowa ma 'adi 'oama wakewakekedi, ta wate ma 'adi peyaula esaesa goula debadiya. Ta 'ebemi esaesa nina gamwagamwanidiya 'enega 'aina yage siapweapwesama, namala, be 'aina 'enana, ta wate wepalala. Ta wate 'ebemi esaesa nina matanaya mayale sebeni sisabesabelulu, taudi nate Yaubada yaluyaluwanao sebeni. Ta 'ebemi esaesa nina matanaya 'ebweu yage 'inamanamala 'atuwa siwalowa bobo'ana ola debanaya, 'ana 'ita 'atuwa gelasi nadigega.

Ta wate 'ebemi esaesa nina selabenaya yobai ata sitoolo sakowasiyena, ta bwaladi maibo'ana 'ediya matadi simiyamiya.
'Ebweu yobai nina 'ana 'ita 'atuwa laiyoni, ta 'eluwena 'atuwa bulumakau, ta 'etonina maninina 'ana 'ita 'atuwa tomota, ta wate eatana 'ana 'ita 'atuwa magisubu 'itaetaeya. Ta 'ebweuna 'ebweuna papediyao 'adi yau sikisi, ta papediyao nidi maibo'adi matadi wate yauna 'atamanega ta solanega. Ta tuta maibo'ana, 'asiyata be boiboi 'ediya, siwaliwali, sigwaegwae:

“Tabu, tabu, tabu, 'Inapwana Yaubada,

Toewaiwai sana. Tauna tuta lowa, ta batuwa ta tuta simeemai 'ediya 'imiyami.”

Tomiya ataya nina 'ina 'ebemi esaesa 'enaya 'imiyatowa, ta tuta yauyauna yobai nidi getedi siwaliwali tuputupu ta si'awa'awa esaesa, ta wate silokalokagutoki 'enaya. 10 Ta tuta yauyauna 'abo yobai getedi siwaliwali, 'inapwanao site tuweniti powa nidi sibe'ube'u sanamwa'uta Tauna miyamiya atayana 'ina 'ebemi esaesa matanaya, ta sibwagobwago 'enaya. Ta 'adi peyaula goula 'ebemi esaesa matanaya sisa'u ebusiyedi, ga sigwaegwae:

11 “'Oyo 'ima 'Inapwana ta 'ima Yaubada, 'ilobwenema be 'atupuyo ta 'a'amayabeyo, manuna 'oyo 'imu waiwaiyega yage yauyauna 'umweluluidi. Tauyo 'imu nuwenuwega 'umweluluidi, ga batuwa mayawasidi.”

Copyright information for `DOB