Revelation of John 9

1'Enega anilose enimana 'ina yoguli 'imu'ena, ga 'ebweu kwadima ya'itena ni'atu galewega 'ibe'uma bale'uya, ta kwadima nina gaula sinabwana 'ana 'ebe gigege 'i'ewena, 2ga gaula nina 'igigegena, ga solanega bwawa 'iapweapwesama, 'atuwa nadigega kwau sinabwana, ga sinala 'iguguyoi, ta wate bale'u maibo'ana 'iguguyoi gaula nina bwawana 'enega.

3Ta bwawa nina solanega kipawa simwa'umwa'utama bale'uya, ta 'idi waiwai silobena nadigega ganiyeya 'idi waiwai, 4ta wate Yaubada 'i'etobodedi be geya'abo pwatula sigiegie to'umaliyedi, nai kaiweyao, nai bagula, ta esi tomotai nidi taudi nigeya Yaubada 'ana we'iwe'iyaya 'ediya, taudi sida gieto'umaliyedi. 5Ta kipawa nidi nigeya 'adi tagwala be tomota siloemwawasidi, ta tuga sigie 'elouyaedimo nawalae nima namo 'ediya. Ta 'elouya nidi sinabwadi, nadigega tuga ganiyeya 'idi go'i.

6Ta nawalae nidi 'ediya to'elouya nidi mwawasa sida 'ala'ala'i'imi, ta geya'abo simwawamwawasa, manuna mwawasa si'ebesa yogeyena. 7Ta kipawa nidi 'adi 'ita 'atuwa osi ni'atu sigibubudi saiya manuna, ta debadiya 'atuwa peyaula esaesa sisa'udi, ta maninidi 'atuwa tomota maninidi, 8ta wate 'uya'uyadi 'atuwa iine 'uya'uyadi, ta saladi 'atuwa laiyoni saladi. 9Ta lumalumadi si'aubodedi 'ana 'ita 'atuwa kainumu 'ediyega. Ta papediyao 'idi dudu 'atuwa osi ma idi wagalisilisi sipilipili saiya 'enaya. 10Ta wate mayuyudi, 'atuwa ganiyeya yuyudi, manuna yuyudiyega sawesawediya be tomota sibadidi, be nawalae nima 'ediya si'elo'elouya. 11Ta wate ma idi toloina, tauna anilose nina gaula nina 'ana to'ita'i'ita, 'ana esana Ibeliu 'enadiyega sigwae, “Abadoni,” ta 'ena Gilisi sigwae “Apoloni,” ta 'adi gibui nate “Toepe'u.” 12Ta ni'atu mwau 'ebweuna 'igumwala, ta 'etamo wate mwau 'eluwa simeema.

13'Enega anilose esikisina 'ina yoguli 'imu'ena, ga 'ebweu 'enana yanonona 'imai 'ebe taliya kunanao ata 'ediyega, 'ebe taliya goula nina Yaubada matanaya 'itootoolo. 14Ta 'enana nina anilose esikisina ma ina yoguli 'ena, 'igwae, “Anilose nidi site ata yoniyonidi 'awabwasi sinabwana 'ana esana Yupeletisi 'enaya 'uli'amidi, be sitatauya.” 15Ta ni'atu anilose nidi ata 'ili'amidi ga sitauya, manuna tuta nina 'ana 'asiyata, be nawalae nina, be yakwala nina manuna ni'atu sigibubuna, be 'aene tomota yau wawasae sida loemwawasidi. Nate 'abo tomota 'ana maibo'ana bale'uya taweyalidi boda 'etoi, be 'ebweu boda siloemwawasidi, ta boda 'eluwa situtupwa.

16Ta ni'atu tolosaiyao nidi 'idi bodao 'adi sawasawa yanonona 'aene 'eluwa analedi miliyonao, maibo'adi osi 'ediyega sipilipili. 17Ta gete nadigega madawaliguna 'ena osi nidi ya'itedi, ta 'adi togeluyao nidi ma 'adi 'aubodaboda lumalumadiya sisa'udiya, 'aidi bweyabweyalidi ta 'aidi kalakalawidi ta 'aidi laulaudi. Ta osi nidi bulubuludi 'atuwa laiyoni bulubuludi, ta kaiwe sabelulu be 'asu be gulewa yaiyaidi 'awadiyega siapweapwesa. 18Boda 'etoi nidi bale'uya 'ediyega, boda 'ebweu siloemwawasidi, gete yage 'etoi nidi 'ediyega, nate kaiwe sabelulu be 'asu be gulewa yaiyaidi, ta boda 'eluwa simiyami. 19Manuna osi nidi 'idi waiwai 'awadiya be yuyudiya simiyami, ta yuyudi nidi 'atuwa mwata ma'awadi, ta 'ediyega tomota sigie'elouyaedi.

20Ta tomota nidi maibo'adi, taudi nigeya siesiesilae yage nidi to'umalidi 'ediyega, nigeya sinuwanuwa'ebuni be 'aene 'idi 'ebe emisa kabokaboyao sida guitoyasedi, ta esi sigiyai pa'alidi ga sibwagobwago 'ediya. Yage nidi nadigega Taumudumudulele be welabanao, be wate yage nidi taudimo nimadiyega siguinuwedi, nadigega tokwaluiyao nate goula be siliba be kopa be gulewa be kaiwe be. 'Ebe emisa nidi getedi nigeya sawesawediya be sidudune nai sienono nai silopili dadana. 21Ta wate tomotai nidi getedi nigeya sinuwanuwa'ebuni loemwawasa be nabwasuwa be loelata be 'ipwala 'ediyega, ta sa'i debadi 'ipa'ala. Et 8:7-12v20 Et 16:9,11; Sam 135:15-17

Copyright information for `DOB