Romans 10

Ta gosegwao, ona'ai'aila 'igu bodao nidi manudi yanuwanuwa sinabwana be 'aene 'etoseyana sida loba, 'enega tuta yauna manudi yasidasida waiwai Yaubada 'ena.

Yamwalatonidi 'aene Yaubada manuna sietapewa sinabwana, ta esi nigeya 'ana 'eda 'ai'aila 'enega sitautauya. 'Eda nina siemwagemwageyena, 'enega taudimo 'idi nuwanuwa simuliyena, be 'enega Yaubada 'ida 'awapalupaluyedi, ta sa'i sitooyogena, manuna Yaubada 'ina nuwanuwa nina 'adi 'awapalupalu manuna nigeya siemiemise. Manuna ni'atu Keliso 'ena Mosese 'ina loina 'ilosalowa, ga gete tugai tauna 'ina loina 'ie'alena, 'enega 'abo yaita Keliso 'iemise 'iabe 'ana 'awapalupalu 'ida loba Yaubada 'enega.

Yaubada 'ina 'etoseyana tomota maibo'ada manuda

Gete nadigega Mosese 'iona'esa 'ada 'awapalupalu manuna, ga 'i'etoladina, 'igwae, “'Abo yaita loina maibo'ana 'imuliyedi, yawasina bobo'ana 'iloba, gete tuga be tuta simeema 'ediya.” Ta gete tuga 'abo'ada 'ida emisa 'aene Yaubada tauna 'iabe 'igie'esaseda, manuna yage gete manuna Buki Tabu 'ina simana 'ena 'igwae, “Geya'abo 'ebweu yaita 'emiyega 'ida nuwanuwa be 'ida gwae, ‘Yaita 'iabe 'itu'e galewaya?’ 'ana mwalatoi 'aene ‘Yaita Keliso 'i'au'ewenama?’ Ta wate geya'abo yaita 'emiyega 'inuwanuwa be 'igwae, ‘Yaita 'ida mwa'uta bale'u 'ubuninaya?’ 'ana mwalatoi 'aene ‘Yaita Yesu mwawasega 'igietoolo limenama?’ ” Ta esi Buki Tabu 'ina simana palupaluna 'igwae, “Ona nina ni'atu selabemiya 'imiyami nate 'awamiya ta wate 'atemiya.”

Ona gete emisa manuna, 'enega 'emiya 'aloguloguguya,
be 'enega Yaubada 'ida 'etoseyeda 'abo 'awadega tatagwala, tagwae, “'Igu 'Inapwana tauna Yesu”, be 'atedega taemisa 'aene Yaubada Yesu mwawasega 'igietoolo limena.

10 Manuna 'atedega Yaubada taemisena ga 'enega 'igie'esaseda, 'enega taetosimana manuna, ga 'i'etoseyeda, 11 nadigega Buki Tabu 'isimana, 'igwae,

“'Abo yaisigedi siemisa, geya'abo omayamaya silobaloba,”

12 Gete 'enega nigeya 'ebweu weyala 'edaya 'imiyami, 'abo'ama me Yudia be 'omi nigeya me Yudia gamwagamwanidaya, manuna maibo'ada tauna 'ida 'Inapwana, 'enega 'abo ta'awanoi 'enaya tauna 'ina esaesa 'ida 'ebwa'eda. 13 Manuna 'abo yaita 'Inapwana nina 'enaya 'isidasida, 'ida 'etoseye tuga. 14 Ta ona'ai'aila, tomota nigeya sawesawenaya be 'etoseyana manuna sisisida 'enaya, 'abo nigeya siemiemise. Nigeya siemiemise manuna nigeya 'Inapwana 'ina ona sida nonona. Ta nigeya sinoono manuna nigeya 'idi tologuguyamo. 15 Ta 'abo 'Inapwana tologuguyao 'ietunedi, be sitatauya 'ediya, 'iabe Yesu tetelina sinono, be siemise, be 'enega 'abo 'ana esanega sisidasida, 'ida 'etoseyedi. Manuna ni'atu Buki Tabu 'ena nadigega 'isimana'esa, 'igwae,

“Tologuguya nidi taudi tetela bobo'ana sime'ena 'edaya, manudi tada gwausowala.”

16 Ta esi tomota maibo'adi nigeya siemiemisedi, manuna ni'atu Aisea 'isimana manudi, 'igwae,

“'Inapwana ye, 'imu ona gete manuna nigeya siemiemisegu.”

17 Ta 'eguma Keliso manuna taloguguya, 'iabe tomota 'aidi sinono be siemisa. 18 Ga mwa'adega me Yudia nidi ni'atu 'ina ona sinononaya, nai nigeya? Na, ni'atu sinonona, manuna ni'atu Buki Tabu 'ena 'isimana, 'igwae,

“'Idi loguguya ni'atu sena maibo'adi sinonona manuna bale'u maibo'ana 'enaya ona nina 'i'elelewana.”

19 Ta mwa'adega? Ona gete manuna me Isileli sinuwa sabwalenaya? O, ni'atu simwalamwalatoni, manuna Yaubada 'ina ona lowa Mosese 'ena 'isimanena, 'igwae,

“'Omi me Isileli, 'iabe 'igu guinuwa 'enega mali tomota mwagemwagedi wae'ipi'ipiyedi, ta wate 'iabe wagamwasowaledi, manuna taudi 'aene nigeya 'igu boda 'ai'ailao.”

20 Ga Aisea nina wate Yaubada 'ina ona manuna 'iona waiwai, 'igwae,

“Tomotai nidi, taudi nigeya si'ebe'ebesegu, nai nigeya sienaenaidegu, ni'atu 'ediya yaapwesa.”

21 Ta wate 'ina ona pa'alina me Isileli manudi 'igwae,

“Tuta maibo'ana 'ediya yabwaubwau be 'aene sida mai 'eguya, ta esi siguitoyasegu, manuna taudi tuga adelidi tologwautoyasa.”v13 Ioe 2:32v15 Ais 52:7v16 Ais 53:1v18 Sam 19:4v19 2 Loi 32:21v20 Ais 65:1v21 Ais 65:2

Copyright information for `DOB