Romans 12

Ooda maibo'ana Yaubada 'ena tada tagwalena

Tasigwao, wada nuwa'i'isi 'aene Yaubada 'ina 'atenuwa'ole'ole 'edaya sinabwa wawasae, 'enega gete 'igu loguguya 'emiya be 'aene tuta mayawasimi wada taliyaemi Yaubada 'enaya, manuna Yaubada nuwanuwana be oomi maibo'ana wada tagwaledi 'ina guinuwa 'enaya. Gete tapwalolo 'ai'aila Yaubada matanaya 'abo nadigega waguinuwa'esa.

Ta geya'abo bubuna bale'u 'ediya watagwatagwalemi, ta esi oomi maibo'ana wada tagwaledi Yaubada 'enaya, be 'enega Yaubada 'imi nuwanuwao 'ida gieauwaudi, be tauna 'ina nuwena bobo'adi, be gwaugwausowalidi, ta palupaludi wada mwalatonidi.

'Abo'agu Yaubada 'enega 'atenuwa'ole'ole yalobena, 'enega 'ilobwenegu wate yada loguguya 'emiya be 'aene geya'abo wanuwanuwatu'e, ta esi ma imi mwalatoi wada nuwanuwa 'ai'aila, manuna 'ida emisa maibo'ana talobena Yaubada 'ina eguyai 'enega.

Ta ooda 'ebweuna namo tuga, ta esi welawela'adao 'idi guinuwao dumadumadi be dumadumadi. Ta 'abo'ada wate nadigega Yesu Keliso welawela'anao, ta 'idi guinuwa dumadumadi, ta esi maibo'ada Keliso 'ena taeboda 'ebweuna, ta taelemalema.

'Ebweuna 'ebweuna 'abo'ada 'ida mwalatoi be 'ida waiwai Yaubada 'i'ebwa'eda, ta wate 'aidi 'adi egueguyai dumadumana 'i'ebwa'edi. Manuna 'abo yaita 'emiyega ma ina emisa be wate ma ina mwalatoi guguya manuna, ni'atu 'ana lobwene 'ai'aila be nadigega 'ida guinuwa. Ta 'abo yaita 'ietolema, 'ina guinuwa 'ida guinuwa tuga. Ta 'abo yaita e'ita 'imwalamwalatoni, nadigega 'ida e'ita tuga. Ta 'abo yaita etaetapewana be gosenao tuta yauna 'igiewaiwaiyedi, nadigega 'ida guinuwa'esa. Ta 'abo yaita tuta yauna 'i'ebwa'ebwaya daita, ma ina 'atetagwala 'ida guinuwa nadigega. Ta 'abo toanuganao paisewa 'ilobwenedi, sida paisewa tuga. Ta wate 'abo yaita 'ina 'atenuwa 'ole'oleyega gosenao 'ilemelemedi, ma ina gwausowala 'ida guinuwa.

Oboboma 'eda'eda 'ai'aila

Wada oboboma 'ai'aila ta to'umalina wada guitoyase, ta esi bubuna bobo'ana wada giyai. 10 Gosemiyao wada oboboma 'ai'ailedi be wada 'amayabedi, 11 ta geya'abo Yaubada 'ina guinuwa 'ena waloogwautoyasa, ta esi ma imi 'atetagwala wada guinuwa.

12 Ta wanuwayai 'aene ma'etamo Yaubada 'ina lema 'iapwesa 'edaya be manuna wada gwausowala, 'enega 'imi miyamwau 'ediya wada sidasida Yaubada 'enaya ma imi 'alama'i'itana. 13 Ta 'abo tasimiyao mwau 'ediya 'iapwesa, 'imi gwegweyega wada lemedi, be wada bwauyedi 'imi anuwaya. 14 Ta 'abo yaisigedi siguitoyasemi geya'abo waba'eba'edi, ta esi wada onaobobomedi.

15 Ta 'abo togwausowalao wa'itadi, ma'emiyao wada egwausowala. Wate nadigega 'abo todedoi wa'itadi, ma'emiyao wada dedoi, 16 be 'enega maibo'ami wada eoboobobomemi. Ta geya'abo wanuwanuwatu'e nai watootoo be waetoloina, ta esi taudi nigeya 'adi esanamo wada egosigosiyanedi. 17 Ta 'abo yaisigedi sietalauwalemi, geya'abo bubuna to'umalina 'enega wae'ie'isa 'ediya, ta esi wada e'isadi bubuna nidi tomota maibo'adi si'awa bobo'anedi 'ediyega. 18 Ta wate wada toowaiwai be bubuna bobo'ana 'enega miya siwalowa manuna wada e'ita tomota maibo'adi 'ediya. 19 Ta geya'abo toto'umalidi 'ediya waetoetoloina be 'aene 'idi to'umalinao wae'isadi, manuna yage getedi Yaubada tauna 'ana toloina, manuna Buki Tabu 'ena ni'atu 'isimana, 'igwae,

“Tebweugu tomota 'idi to'umalina manuna yada loina”.

Gete nadigega 'ida 'Inapwana 'ina ona.
20 Ta 'abo 'ami talauwalao sibobotana, masula wada 'ebwa'edi, nai 'abo tona'adi 'iyayapasa, bwasi wada 'ebwa'edi, be 'enega 'idi to'umalinao nidi 'ediyega siomayamaya be sida nuwa'ebuni.

21 'Enega geya'abo to'umalina watagwatagwale be 'emiya 'iewaiwai, ta 'omi esi wada ewaiwaisine 'imi bubuna bobo'ana 'ediyega.

Copyright information for `DOB