Romans 13

Toloinao tada 'amayabedi

Maibo'ada 'ilobweneda be 'ida toloinao tada 'amayabedi, manuna 'idi 'ebe toolo nina Yaubada 'i'ebwa'edi. Manuna 'abo 'idi 'ebe toolo nina nigeya Yaubada 'enega, nigeya sawesawediya be 'edaya sietoloina. 'Enega 'abo yaita toloinao nidi 'isinalidi, ni'atu nate Yaubada 'ina guinuwa 'isinalina, 'enega e'isa to'umalina 'ida loba.

Ta toloinao nidi nigeya 'idi paisewa be 'aene tobobo'adi 'ediya sigiematauta, ta esi toto'umalidi 'ediya. 'Enega 'eguma geya nuwami be toloinao wada matautedi, 'ilobwenena wada bubuna palupaluna, be 'enega toloinao nidi sida 'awabobo'anemi. Manuna taudi Yaubada 'ina toguinuwao 'iaseyedi sabi lememi. Ta 'eguma wabubuna to'umalina, 'iabe wamatauta, manuna taudi toloinao be siloinemi. Manuna ni'atu Yaubada 'idi 'ebe toolo 'i'ebwa'edi be 'aene loina sida sa'u toto'umalidi 'ediya.

'Enega 'ilobwenena be toloinao tada 'amayabedi, 'abo loina tamatautena, ta wate 'abo bubuna bobo'ana nuwanuwada. Wate 'ilobwenena be 'ida takisi tada 'ebwa'edi, manuna taudi Yaubada 'iesinuwedi ga 'ida bobo'ana manuna sipaipaisewa. 'Enega takisi maibo'adi 'ediya tada tagwala be 'ana to'ewao 'ediya tada takisi, ta wate toloinao nidi be 'inapwanao tada 'amayabedi, be manudi tada gwausowala.

Oboboma

'Ami lowagao wada yotuli egumwalidi, ta 'ami lowaga eobooboboma nigeya sawesawenaya be wayotuli egumwali, manuna 'abo gosedao taobobomedi, loinao maibo'adi ni'atu taguiguinuwedi, loina nidi nadigega geya'abo loelata be, geya'abo loemwawasa be, geya'abo 'ipwala be, geya'abo matagwegwe be, ta wate loinao 'aidi simiyami, ta esi loina nidi 'adi bwagila gete nadigega 'igwae,

“Gosemwao 'uda obobomedi nadigega tauyo 'amu oboboma.”

10 Ta 'abo loina gete 'umuliyena, Mosese 'ina loinao maibo'adi ni'atu 'uguinuwedi, manuna 'abo yaita oboboma 'atenaya 'imiyami, geya'abo wate gosenao 'igiegie to'umaliyedi.

11 'Enega gete tugai 'ilobwene 'ai'ailimi be nadigega wada guinuwa'esa, manuna tuta 'iabe 'igugumwala. Yesu ni'atu waemisena, 'enega geya'abo wa'eno'eno, ta esi wada yaweyawe, manuna tuta gidalina namo 'ena be 'ada To'etoseyana nina 'iapwesama. 12 Ta ona'ai'aila, ni'atu be tomwa 'iulisi, 'enega gete tuga guguyoi 'ana guinuwa tapilisine be maedana 'ana guinuwa taguinuwe. 13 'Enega tada 'ita'i'isida be geya'abo bwasi waiwaidi tanumanumadi be taekaekabaleya, be geya'abo taloeloelata, ta wate geya'abo taegewagewana be talosalosaiya. 14 Ta esi 'ilobweneda be 'ida 'Inapwana Yesu Keliso 'ina bubunega tada bubuna, be geya'abo bubuna bale'u manuna tanuwanuwa.

Copyright information for `DOB