Romans 2

Yaubada 'ina bwa'omatana

Tasigwao, geya'abo gosemiyao 'idi bubuna manuna walo'alo'aegila, manuna 'abo wanuwanuwa manudi 'omi wate taumi walo'aegilemi, manuna 'omi tuga nadigega taudi. Ta esi tamwalatonina 'aene Yaubada 'ilobwenena be toguinuwa geyogeyoi nidi 'ida loinedi. Ta gosegwao 'omi, 'abo mali tomota walo'aegiledi wanuwena 'aene Yaubada 'ina bwa'omatana geya'abo walobaloba. Nigeya! 'Ida loinemi wate, manuna bubuna nidi 'omi tuga nadigega waguiguinuwedi.

Ta geya'abo Yaubada 'ina oboboma wa'awa'awa yage besobesoe, manuna 'i'atenuwa 'ole'oleyemi, ga manumi 'ie'alama'i'itanena, be 'aene 'imi to'umalinega 'ida giesana ilemi.

Ta 'omi wadeba pa'ala wawasae, 'enega 'abo tuta nina Yaubada 'ina loina palupaluna 'igieapwese, 'ida loina 'ai'ailimi, manuna tomota 'ebweuna 'ebweuna 'edaya 'ida e'isa tuga to'ase 'ida guinuwa nadigega.

Ta 'eguma 'aida guinuwa bobo'ana 'ena tuta yauna tae'alama'i'itana, be nadigega tuga taguiguinuwa be 'aene 'awabobo'ana be yawasi ataya tada loba Yaubada 'enega, ona'ai'aila ma'etamo yawasida miyamiya atayana 'ida 'ebwa'eda. Ta sa'i, 'aidi tomota egewagewana 'aledi be 'eda bobo'ana siguitoyase, ta 'eda to'umalina simulimuliye, 'enega Yaubada 'ida gamwasowaledi be 'ida loinedi. 'Enega taudi guinuwa to'umalina 'ana toguinuwao mwau be 'elouya sinabwana sida loba, nugana me Yudia be muliyega sena maibo'adi tomoteninao. 10 Ta nadigega tuga taudi 'idi bubuna bobo'ana, Yaubada nugana me Yudia 'adi tupu be 'amayaba be 'idi gwausowala 'ida 'ebwa'edi, be muliyega sena maibo'adi. 11 Manuna Yaubada maibo'ada 'ida loineda leleleya.

12 Ta 'ina loina 'aene mali bodao Mosese 'ina loina nigeya simwalamwalatoni, tuwa tuga Yaubada 'ida loinedi 'idi to'umalinao manudi. Nadigega wate taudi me Yudia Mosese 'ina loina simwalatonina, be Yaubada 'ida loinedi 'idi to'umalinao manudi, Mosese 'ina loinao 'ediyega.

13 Ta nigeya 'aene loina 'ana nono namo 'enega Yaubada 'ida 'awa palupaluyeda, ta esi 'ina loina 'ana guinuwa 'enega. 14 Ta sa'i, taudi nigeya me Yudia, loina nina Mosese 'enega nigeya 'ediya, ta tuwa tuga taudimo 'idi nuwenuwega siguinuwa to'ase bobo'ana, nate tuga taudimo 'idi loina. 15 'Enega 'idi guinuwa 'ediyega tamwalamwalatoni 'aene 'atediya loina bobo'ana 'imiyami, ga 'enega taudimo 'idi bubuna simwalamwalatoni, 'aene 'aina tuta to'umalina, nai 'aina tuta bobo'ana.

16 Nadigega tuga tetela bobo'ana yaguguyaena 'emiya, 'aene bwa'omatana 'ana tutaya Yaubada Yesu Keliso 'ida loine, be tauna tomota 'idi nuwanuwa kwaikwaiyidi manudi 'ida 'awato'umaliyedi nai 'ida 'awabobo'anedi. Md 7:21 Ye 1:22v16 1 Ko 4:5

Me Yudia manudi

17 Ta 'omi? Taumi watupumi ga wagwae, “'Abo'ama me Yudia, Yaubada 'ina loina 'i'ebwa'ema Mosese 'enega.” 18 'Enega Yaubada 'ina nuwanuwa ni'atu wamwalamwalatoni, manuna loina nina ni'atu 'igiesinapumi, bubuna bobo'ana wawasae manuna. 19 'Enega taumi wa'awa tosinasinapuyemi 'aene tomata kebokeboyao 'adi toanuganao, ta taudi sena guguyoi 'ana tomiyanao wagiemaedanedi, 20 ta toeuwauwa be toemwagemwageyao be gogama 'ediya waetoe'ita, 'aene 'omi Mosese 'ina loina 'enega mwalatoi 'ai'aila wa'ewena.

21 'Eguma 'ebweu yaita 'oyo tomota 'ediya 'ue'ita, ta mwa'adega 'oyo? Ta 'eguma 'ediya 'ugwae, “Geya'abo 'u'ipwa'ipwala,” ta 'oyo, 'ebweu to'ipwala. 22 Ta wate 'abo 'ediya 'ugwae, “Geya'abo 'uloyaloyawe,” ta 'oyo wate 'ebweu toloyawe. Ta 'oyo 'ugwae, “'Abo'agu 'ebe bwagobwago kabokabo yaguitoyasedi,” ta sa'i, 'ebe bwagobwago nidi 'idi anuwega 'u'ipwa'ipwala.

23 'Omi waona gagasa, ga wagwae, “Mosese 'ina loina 'emaya 'imiyami,” ta esi loina nina nigeya wamulimuliye, ga 'enega 'aina tomota 'ida Yaubada si'awa to'umaliyena. 24 Nadigega Buki Tabu 'ina simana 'igwae,

“'Omi me Yudia, 'imi bubuna manuna, taudi nigeya me Yudia Yaubada si'awa to'umaliyena.”

25 Ona'ai'aila, 'omi me Yudia Ebelaamo 'ina we'iwe'iyaya lodaba* bwalamiya 'imiyami. Ta 'abo Mosese 'ina loinao wamuliyedi, lodaba nina yage bobo'ana 'emiya, ta esi 'eguma loina nidi nigeya wamulimuliya 'ai'ailidi lodaba 'emiya 'ieyage besobeso.

26 Ta esi taudi nigeya me Yudia Ebelaamo 'ina lodaba nigeya bwaladiya 'imiyami, ta 'abo loina nidi si'amayabedi taudi nadigega tuga lodaba nina 'ediya 'imiyami.

27 'Enega 'omi me Yudia 'etamo taudi nigeya me Yudia sida bwa'omatami, manuna Mosese 'ina loinao be Ebelaamo 'ina lodaba nina 'emiya simiyami, ta nigeya loina nidi wamulimuliyedi, ta sa'i taudi nigeya me Yudia 'anabwa'ayoi nigeya Ebelaamo 'ina lodaba bwaladiya, ta esiya Mosese 'ina loinao simuliyedi.

28 Ta goma Yudia 'ai'aila 'aene lodaba nina nigeya yage apweapwesana bwaladiya, ta esi yage kwaikwaiyina 'atediya, Yaubada Yaluyaluwana 'enega, ta nigeya tomota 'ediyega. 'Enega taudi 'abo tomota nigeya si'awa'awa bobo'anedi, Yaubada esi 'ida 'awabobo'anedi.

Copyright information for `DOB