Romans 6

'Abo'ada be Keliso taeleleleya

Mwa'adega? To'ase 'ilobwenena, nai 'ida to'umalina 'ena tabubuna ataya be 'aene Yaubada 'ina 'ebwayadaita 'edaya 'ida sinabwa? Nigeya sa'i! Manuna bubuna to'umalina ni'atu 'edega 'igumwala, 'enega nigeya sawesawenaya be 'edaya wate 'ida miyami.

Ta wada nuwa'i'isi 'aene 'eguma to tuta 'ena tabapitaiso Yesu Keliso 'ana esanega, Yesu nina 'ina mwawasa 'enaya tauna ma'edai taeleleleya, manuna 'ina bapitaiso 'enega, 'atuwa nadigega 'abo'ada be Yesu Keliso 'ida mwawasa, be 'ida sa'u'ali'ali, ta 'ida toololimana wate nadigega leleleya. Manuna Keliso nina Tamana 'ina waiwaiyega 'itoolo limana, 'abo'ada nadigega 'igietoolo limeda ga yawasida auwauna talobena.

Manuna 'abo 'ina mwawasa nina 'abo'ada nadigega tamwawasa, 'iabe wate tatoolo limana nadigega tauna mwawasega 'itoolo limana. Ta wada nuwa'i'isi 'aene 'ida bubuna kadekadelina ni'atu kelose 'enaya 'iloemwawasina, be 'aene tauda 'ida loina 'igugumwala, be 'enega geya'abo wate bubuna to'umalina 'ina loina 'ena tamiyami, manuna 'abo to tuta 'ena tamwamwawasa, geya'abo wate to'umalina 'ina loina 'edaya 'imiyami. Ta 'abo tanuwena 'aene Keliso ma'eda tamwawasaya, tada emisa 'aene ma'edai mayawasida tamiya ataya. Manuna tamwalatonina Keliso ni'atu mwawasega 'itoolo limana be geya'abo wate 'imwawamwawasa limana, manuna mwawasa ni'atu 'iewaiwai sinena. 10 Keliso nina ma'ebweuna 'imwawasa 'ida to'umalina manuna, ga gete tuga mayawasina 'imiyami Yaubada 'enaya.

11 'Omi wate nadigega wada nuwa'i'isi 'aene Yesu Keliso ma'edai tamwawasaya, 'enega bubuna to'umalina 'edega 'ilosa'u, 'enega Yesu Keliso ma'edai Yaubada 'ena mayawasida tamiyami. 12 'Enega gete tuga geya'abo to'umalina bwalami 'iloiloinedi be 'aene 'imi yalakwaiyao wamulimuliyedi. Geya'abo sa'i! 13 Ta wate geya'abo 'ebweu welawela'ami watagwatagwale guinuwa to'umalina manudi, ta esi Yaubada 'ena wada tagwalemi manuna mwawasega 'igietoolo limemi, ga batuwa mayawasimi, be 'enega welawela'ami maibo'adi watagwaledi Yaubada 'ina guinuwa palupaluna manuna. 14 'Enega gete tugai to'umalina geya'abo 'iloiloinemi, manuna Yaubada 'ina 'atenuwa'ole'ole 'ena wamiyami, ta nigeya Mosese 'ina loina 'ena. 1 Pi 3:18v11 1 Pi 2:24v13 Lo 12:1

Bubuna palupaluna 'ana toguinuwao

15 'Enega mwa'adega tada bubuna'esa? Lowa loinao tale'oedi ta Yaubada 'ida to'umalinao 'inuwataudi, mwa'adega sawesawenaya be to'umalina tuga 'ena tamiyami? Nigeya 'ai'aila! 16 Ta wada nuwa'i'isi 'aene 'abo yaita 'ina loina 'ena watagwalemi, tauna 'enana wamuliye. 'Abo to'umalina wamuliye mwawasa waloba, ta 'abo emisa wamuliye bubuna bobo'ana waloba.

17 Ta ona'ai'aila, 'omi lowa bubuna to'umalina 'ana toguinuwao, ta esi tetela bobo'ana wanononaya ga 'atemi watagwaledi 'enaya, ga 'enega 'imi to'umalina 'igumwala. Ta Yesu 'ili'amimi be 'aene 'omi bubuna palupaluna 'ana toguinuwao, 'enega tada lokagutoki sinabwana Yaubada 'enaya, yage gete manudi.

19 Bale'u yagenao 'ediyega yae'itemi, manuna nuwami nigeya 'isabwasabwalena 'ai'aila. Lowa welawela'ami watagwaledi be 'aene sida bubuna to'umalina, be wate 'aene 'imi guinuwa to'umalina 'ida sinabwa 'ai'aila, 'enega gete tuga welawela'ami wada tagwaledi be sida bubuna palupaluna, be wate 'imi guinuwa 'ida bobo'ana 'ai'aila.

20 Manuna lowa 'omi to'umalina 'ana toguinuwao, ta nigeya bubuna palupaluna 'ana toguinuwao, 21 'enega gete tuga 'imi to'umalina nidi manudi waomayamaya. Manuna nigeya 'ebweu wate e'isa bobo'ana 'ediyega walobaloba, ta esi 'ana e'isa nina mwawasa. 22 Ta gete tuga to'umalina nina 'ina loina 'enega ni'atu wagumwala, ga 'omi batuwa Yaubada 'ina toguinuwao, be 'enega e'isa bobo'ana waloba, nate bubuna bobo'ana be wate yawasi ataya. 23 Manuna to'umalina 'ana e'isa mwawasa, ta esi Yaubada 'ina oboboma 'ida 'Inapwana Yesu Keliso 'enega, nate yawasida ataya. 7:5v23 Lo 5:12,15

Copyright information for `DOB