Romans 8

Yaubada yaluyaluwana yawasida 'ai'aila 'alena

'Enega 'eguma Yesu Keliso ma'edai, nigeya sawesawenaya be Yaubada 'ina ona mwauna 'edaya 'isa'u.

Yesu Keliso ma'edai, 'enega Yaubada yaluyaluwanega to'umalina be mwawasa 'idi loina 'ediyega 'ili'amida, ga yawasi auwauna talobena. Li'ama gete Mosese 'ina loina nigeya sawesawenaya, manuna bubuna tomota nenetana, ta esi Yaubada 'iguinuwena, manuna natu 'ai'ailina 'itagwalena ga 'imai bale'uya ga 'abo'ada toto'umalida bwalada 'i'otena, ga 'ida to'umalina manuna 'italiya ga to'umalina nina 'iewaiwai sinena, be gote 'enega Yaubada Yaluyaluwanega loina bobo'ana tamuliyedi, ta geya'abo bubuna tomota 'enega. Manuna 'abo yaisigedi bubuna tomota simulimuliyedi taudimo manudi sinuwanuwa, be 'enega 'adi e'isa mwawasa siloba, ta yaisigedi 'abo Yaluyaluwa Tabuna simuliye, taudi Yaubada 'ina nuwanuwa siguiguinuwe, 'enega 'adi e'isa gwausowala be miya bobo'ana sida loba.

Ta 'abo bubuna tomota tamuliye, nate ni'atu Yaubada taetaetalauwale, 'enega nigeya sawesawedaya be Yaubada 'ina loina tamuliye, 'enega nigeya sawesawenaya 'igwausowala manuda. Ta esi 'omi Yaubada yaluyaluwana 'iloiloinemi, manuna 'emiya 'imiyami, be 'enega taumimo 'imi nuwanuwa nigeya 'iloiloinemi. Manuna 'abo yaita nigeya Keliso yaluyaluwana 'ena 'imiyami, tauna nigeya Keliso 'ina boda.

10 Ta ona'ai'aila, ooda mwawamwawasidi bubuna to'umalinega, ta esi 'abo Keliso 'edaya 'imiyami, yaluyaluwada geya'abo simwawamwawasa, ta esi mayawasida 'ida miya bobo'ana, manuna ni'atu 'igiepaepaluyeda.

11 Ta Yaubada Yaluyaluwanana 'enega Yesu mwawasega 'igietoolo limena, 'abo 'emiya 'imiyami, Yaubada 'iabe wate Yaluyaluwana nina 'enega oomi mwawamwawasidi 'ediya yawasi auwauna 'ida 'ebwa'emi. 12 'Enega gosegwao, nigeya 'ilobwelobweneda be 'ida bubuna tomotai tamuliye, 13 'abona nai tamwamwawasa. Ta esi 'eguma bubuna tomotai taguitoyase be Yaubada Yaluyaluwana tamuliye, 'iabe Yaluyaluwanana 'enega 'ida bubuna tomotai nina taloemwawasi, be 'enega yawasida bobo'ana taloba, 14 ta wate Yaubada 'i'awa natuneda 'abo Yaluyaluwana tamuliye.

15 'Enega Yaubada nigeya tamatamataute, manuna ni'atu 'i'awa natuneda ga 'abo'ada nigeya nadigega 'ina topaisewao tuga, ta esi 'abo'ada ma ida 'atepatu ta'awatamane, tagwae, “Aba!
*Aba: Ona gete me Yudia 'enadi, 'ana mwalatoi, Tamagu.
Tamagu!”

16 Be wate yaluyaluwanana 'enega yaluyaluwada mwalatoi 'i'ebwa'edi, be 'enega tamwalamwalatoni 'aene 'abo'ada Yaubada natunao.

17 Be 'enega oboboma nidi natuna Yesu Keliso manuna 'isa'u bubuna, 'iabe Yesu ma'edai oboboma nina leleleya taloba Yaubada 'enega. Manuna 'abo Keliso ma'edai 'elouya taloba, ma'etamo wate ma'eda 'ida esaesa talobai.

18 Ta 'elouyao gete tuga talobalobadi yanuwena 'aene nigeya yage sinabwana, manuna miya bobo'ana nidi ma'etamo talobadi, bobo'ana wawasae, 19 manuna Yaubada 'ina mwelumweluluwao maibo'adi siyamwayamwa be nuwanuwadi sinabwana be 'aene natunao nida 'ida gieapweseda be sida 'itada.

20 Ta Yaubada 'ina mwelumweluluwao nigeya to'umalidi, ta esi 'iloinedi be gete tuga sida eyage besobeso, ta esi mwelumweluluwa nidi ma idi emisa, 21 manuna 'etamo Yaubada 'igieauwaudi be geya'abo sidaudaula, ta esi 'idi miya bobo'ana 'ida 'ebwa'edi, nadigega 'abo'ada natunao nida.

22 Ona'ai'aila, Yaubada 'ina mwelumweluluwao nidi tuta maibo'ana 'idi 'elouyao 'ediyega sisidasida, nadigega waine 'ina 'elouya enatuna 'enaya. 23 Ta 'abo'ada ni'atu Yaluyaluwa Tabuna lotoona bobo'ana gidalina tuga 'i'ebwa'eda be muliyega miya bobo'ana taloba 'ai'aili, 'enega gete tuga ma ida 'elouya tasidasida ta tayamwayamwa, be 'enega to tuta 'ena ooda 'ida gieauwau, be 'ida 'awanatuna 'ai'aileda.

24 Ona'ai'aila, 'etoseyana gete emisega talobaloba, manuna gete tuga ooda nigeya 'adi gieauwau talobaloba, 'enega ma ida emisa tada yamwayamwana 'ana laba 'ida emisa nina uwana taloba, be 'enega 'ida emisa 'ida losa'u.

25 Ta 'abo 'ida emisa uwana nigeya talobaloba, tuwa tuga ma ida 'alama'i'ita tada yamwayamwa 'ana laba talobai.

26 Yaluyaluwa Tabuna wate 'ida neneta 'ediyega 'ilemelemeda, manuna 'ida 'awanoi 'ediya nigeya tamwalamwalatoni mwa'adega tasidasida'esa, ta esi Yaluyaluwa Tabuna manuda 'ietaetapewa, ta ma 'enana 'isida waiwai Yaubada 'enaya. 27 Yaubada tauna 'ida nuwanuwa 'imwalamwalatoni, ta wate Yaluyaluwana 'ina nuwanuwa 'imwalamwalatoni, manuna Yaluyaluwanana Yaubada 'ina tomotaiyao nida manuda 'i'awa'awanoi, manuna Yaubada be yaluyaluwana ma'iyana 'idi nuwanuwa 'ebweuna. 28 Gete 'enega tamwalatonina 'aene 'abo Yaubada taobobome 'iabe to'ase be to'ase talobaloba maibo'ana 'igiepaepaludi, manuna tauna 'ina nuwanuwa nadigega ga 'ibwauyeda. 29 'Enega yaisigedi 'abo'ada 'ibwauyeda ni'atu 'iona upaupaeda be 'aene natunao, 'abo'ada tuga nadigega Natunana, 'enega tauna 'ada tomatuwa, ta 'abo'ada 'ana pwedeuyao. 30 Yaubada nina 'iesinuweda, 'enega 'ibwauyeda, ga 'i'awa palupaluyeda, ta wate 'ida 'ebemi esaesa 'i'ebwa'eda. Ga 6:8v15 2 Ti 1:7; Ga 4:6v16 1 Yn 4:13v17 Ga 4:7; Et 21:7v18 2 Ko 4:17v20 Nug 3:17-19v21 Et 21:1v23 2 Ko 5:2-4v27 Sam 139:1v28 Ep 1:11v29 1 Yn 3:2v30 2 Te 2:13-14

Yaubada 'ina oboboma

31 Ona'ai'aila, Yaubada 'ina oboboma manuna geya'abo tagwaegwae, manuna 'abo Yaubada ma'edai 'ilemeda, nigeya yaita sawesawenaya 'ilosaiyeda, nai 'igie to'umaliyeda. 32 Manuna Yaubada natu 'ai'ailina nigeya 'iegagale, ta esi maibo'ada manuda 'itagwalena ga 'i'ebwa'eda, 'enega yage maibo'ana wate 'iabe 'edaya 'ida 'ebwaya daisida.

33 'Enega nigeya sawesawenaya be 'ebweu yaita 'ie'ewada, manuna Yaubada nina ni'atu 'iesinuweda ga 'i'awa palupaluyeda. 34 Ga wate nigeya sawesawenaya be 'ebweu yaita 'ina ona mwauna 'edaya 'isa'u, manuna Yesu Keliso ni'atu manuda 'imwawasa ga mwawasega 'itoolo limana, 'enega gete tuga Yaubada 'atainaya 'imiyami, ta manuda 'isidasida.

35 'Enega nigeya 'ebweu to yage sawesawenaya be Keliso 'ina oboboma 'edega 'iabodebodedi, nadigega taudi mwau nidi talobadi, 'elouya be, wasegigi be, botana be, egomabeso be, esilae be, mwawasa be, 36 manuna Buki Tabu 'ena onaupaupa 'ebweu 'igwae,

“'Asiyata 'ebweuna 'ebweuna 'ediya 'imu guinuwa manuna 'ebe mwawasa 'ena 'atootoolo, 'atuwa nadigega sagali bawenao sabi loemwawasidi.”

37 Ta esi yage maibo'adi getedi 'ediyega taewaiwai, manuna Yesu 'ina oboboma be 'ina lema 'edaya sinabwa wawasae. 38 Ni'atu yamwalatoi 'ai'ailina 'aene nigeya 'ebweu to yage sawesawenaya be Yaubada 'ina oboboma 'edega 'i'ewa yauledi, 'abo mayawasida nai mwawamwawasida, ta wate aniloseyao nai Taumudumudulele magosenao 'idi guinuwao 'ediyega, tuta gete 'enaya nai tuta 'imeemai 'ediya, 39 nai toloinao galewaya nai bale'uya 'idi waiwaiyega. Manuna nigeya 'ebweu yaita sawesawenaya Yaubada 'ina oboboma nina, 'ida 'Inapwana Yesu Keliso 'enega, 'ida 'ewayaule 'edega. 44:22v38-39 Yo 10:38

Copyright information for `DOB