Romans 9

Yaubada 'ina tomotaiyao me Isileli manudi

Yasimana palupalu 'emiya 'aene 'igu susuyao me Isileli manudi nuwagu 'imwau wawasae, 'enega tuta yauna 'ategu 'iuyauya manudi. 'Igu simana gete Keliso be Yaluyaluwa Tabuna simwalamwalatoni 'aene ona 'ai'aila. Ta yanuwanuwa sinabwana 'igu susu nidi manudi be 'aene Yaubada 'ina oboboma nina 'i'ebwa'egu, nate Yesu Keliso, 'aene 'eguyega 'ida 'ewa be 'igu bodao nidi 'ida 'ebwa'edi, ta 'abo'agu yada miyaila Keliso 'enega, taudi manudi.

Ta ona'ai'aila, 'igu bodao nidi Yaubada lowa ni'atu 'i'awa natunedi, ga wate 'ina esaesa be 'ina onaupaupa be 'ina loina bobo'adi 'i'ebwa'edi, ta wate tapwalolo be yage bobo'adi manudi 'ionaupaupa gimi 'inapwanao 'ediya, taudi nadigega Ebelaamo be, Aisake be, Yekobe be, ga muliyega 'idi boda nina 'enega Keliso 'iapwesa. Be yage gete manudi Yaubada tauna Toloetana sana tada tupuna tuta maibo'ana 'ediya. Eimeni.

Yaubada 'ina ona getedi geya'abo manudi tanuwanuwa 'aene ona 'eetete, ta esi ona getedi 'adi 'ai'aila siapwesa taudi me Isileli 'ai'aila 'ediya, taudi Yaubada 'ina bodao esiesinuwadimo, ta esi nigeya me Isileli maibo'adi 'ediya. Ta ona'ai'aila, nigeya 'aene Ebelaamo 'ina susuyao maibo'ana Yaubada 'i'awa natunedi, manuna Yaubada ni'atu Ebelaamo 'ieonena, 'igwae, “'Imu susuyao Aisake natunao 'ediyega,” ta esi nigeya Aisake tasina 'enega. Ona gete 'ana mwalatoi ni'atu 'ie'ita 'ai'ailida 'aene Yaubada natunao nigeya Ebelaamo 'ina susu 'enega, ta esi taudi Yaubada 'iona upaupaedi. Manuna lowa Yaubada Ebelaamo 'ena 'ionaupaupa, 'igwae,

“Ma'etamo tuta yaesinuwena 'ena, yailama be natuyo me'olotona ya'ebwa'eyo, mwaneyo Sela 'enega.”

10 Ga wate nadigega tubumai nina Aisake 'ietai ga Libeka 'iaina, ga natunao didiluwaluwa gamwanaya, 11 ta muliyega be Libeka 'ienatuna, Yaubada 'ieonena, 'igwae, “'Abo natumwao 'uenatunedi, megwamana 'ida etoloina tomatuwa 'ena.” Taudi Yekobe be Iso. Gete 'enega tamwalatoi 'ai'ailina 'aene gogama nidi nigeya 'idi guinuwa bobo'ana nai to'umalina 'ediyega 'iesiesinuwedi, ta esi tauna 'ina onaupaupa 'enega, manuna Yaubada nigeya tomota 'idi guinuwega 'ida esinuwedi, ta esi taunamo 'ina nuwenuwega. 13 Nadigega wate Yaubada 'isimana Buki Tabu 'enaya, 'igwae,

“Yekobe yaesinuwena ga yaobobomena, ta esi Iso yaguitoyasena.”

14 'Enega mwa'adega tada ona'esa Yaubada 'ina guinuwa gete manuna, 'aene nigeya palupaluna, aga? Nigeya! 15 Manuna Mosese 'ina loina 'enaya, Yaubada 'igwae,

“'Abo yaita nuwanuwagu be yaobobome yada obobome tuga, ta wate 'abo yaita ya'atenuwa 'ole'oleye, yada leme tuga.”

16 Gete 'enega 'ie'iteda 'aene Yaubada 'ina oboboma nigeya 'ida apwesa daita, tomota 'ida nuwanuwao nai 'ida guinuwao 'ediyega, ta esi tauna tuga 'ina 'atenuwa 'ole'oleyega.

17 Ta gete wate 'ebweu 'ebe'ita Pelo 'enega, manuna lowa Yaubada 'ina ona Pelo nina manuna, 'igwae,

“Ni'atu 'ebeloina ya'ebwa'emu be 'aene 'uda losaiyegu be 'enega 'igu waiwai 'uda 'ita, be gote 'enega 'agu esana 'ida sinabwa bale'u maibo'ana 'ena.”

18 'Enega ona'ai'aila, 'abo Yaubada nuwanuwana be yaita 'iobobome 'ida obobome tuga, ta 'abo yaita nuwanuwana be 'igie debapa'ali, 'iabe 'ida debapa'ala.

Yaubada 'ina gamwasowala be 'ina 'atenuwa'ole'ole

19 Nai 'aimi yage gete manuna wanuwanuwa, 'aene 'eguma maibo'ada 'ida bubuna nina Yaubada 'ina nuwenuwega, to'ase sana manuna 'ie'ewada? 20 Gosegwao, 'abo'ada geya'abo Yaubada gete nadigega talo'alo'aegile, 'atuwa nadigega 'ule 'ana to'abi, 'ebweu tuta tai nina 'ulena 'i'abidi, ga 'ebweu 'ule to'abi 'ieonena, 'igwae, “To'ase 'alena nigeya 'u'abi'abigu gosiyagu nadigega?” 21 Ta sa'i to'abi 'ulena tauna 'ina guinuwa 'ida loine, 'abo nuwanuwana be bwa'a 'ebweuna 'enega 'ule 'eluwa 'i'abidi, 'ebweuna 'ana 'ita kausala, ta 'ebweu nigeya.

22 Yaubada wate nadigega 'ina guinuwa tauna 'iloina, manuna tuta yauna toto'umalidi 'ediya 'ie'alama'i'itana sinabwana, be 'enega 'idi to'umalinao geya'abo 'ida e'ie'isadi, ta sa'i nigeya sida ematamatana, 'enega 'inuwena 'aene 'ilobwenena be 'ida loinedi, be 'enega 'ina gamwasowala be 'ina waiwai sida 'ita. 23 Ta wate nuwanuwana be 'ina esaesao nidi lowa 'igibubudi 'abo'ada 'iobobomeda manuda, be 'aene 'ida e'itada. 24 'Enega boda 'eluwa 'ediyega 'ibwauyeda, me Yudia 'emega, ta 'omi nigeya me Yudia 'emiyega. 25 Nadigega palopita Osia 'ina buki 'ena 'isimanena, 'igwae,

“Tomota nidi taudi nigeya 'igu bodao yada bwauyedima be 'igu boda 'ena sida lugu, manuna lowa nigeya 'igu oboboma 'ena simiyami, ta gete tugai yaobobomedi.
26 Lowa Yaubada 'ieonedi, 'igwae, ‘'Omi nigeya 'igu bodao, ma'etamo ona nina 'ida sa'ugelasa be taudi sida eesedi, ‘Yaubada miyamiya atayana natunao.’”

27 Aisea wate nadigega me Isileli manudi 'isimana, 'igwae,

“Ma'etamo Isileli bodanao sida susaila 'atuwa kaukau le'awaya, ta esi 'ediyega 'iabe pu'epu'edimo Yaubada 'i'etoseyedi.
28 Manuna Yaubada nuwanuwana be me bale'u maibo'adi 'ida loina maniniyedi.”

29 Nadigega wate Aisea 'ina simana 'igwae,

“Yaubada Toewaiwai sana, 'enega 'eguma nigeya 'edega 'ina bodao pu'epu'edi

'i'ate'atenuwa 'ole'oleyedi, 'iabe maibo'ada 'ipe'uda, nadigega Sodoma be Gomola maibo'adi 'iloemwawasidi.”

Me Isileli nigeya siemiemisa

30 Gete 'enega tamwalamwalatoni 'aene taudi nigeya me Yudia nigeya sitootoo be 'aene Yaubada 'ida 'awapalupaluyedi, ta esi 'idi emisa tuga 'enega 'awapalupalu silobena. 31 Ta esi me Isileli nidi sitootoo be loina 'ana muliya 'enega Yaubada 'ida 'awapalupaluyedi, ta sa'i sitooyogena.

32 Taudi situila 'idi guinuwa 'enaya, ta nigeya 'idi emisa 'ena, be 'aene Yaubada 'ida 'awapalupaluyedi. Nate 'idi loegesi be 'atuwa nadigega gulewa 'enaya sieseesetupedi. 33 Buki Tabu 'ena 'ebe esetupe gete manuna 'isimanena, 'igwae,

“Wa'ita'i'isimi manuna gulewa nina 'iabe Sayoni 'ena yasa'ui, be tomota yaudi 'ena siesetupedi be sibebe'u, ta 'abo yaisigedi tauna gulewa nina siemisei, geya'abo wate omayamaya silobaloba.”

Copyright information for `DOB