1 Corinthians 12

Arua Babau na puyoma

1Be yodi yau bana, puyo Arua Babaue na kauama yà riuemina, inam kauinama sibo koya kataiena aubainama. 2Ko noḡoti da taumi nam kowai sumaḡana raḡanine, taumi kokoitau awai bademina, be uma kokoitaudima taudi nam giugiudi be taudi awai keda doka waigewemina. 3Be yodi deḡoda banaga ko banabanavidina aitauḡa Mamaitua na kauama ta giugiuena, taumi nema ko katai bake da uma banegidima ta riuriu kaua bo ta kaikaiyovu? Naumeki da umanama tokare ko kataiena: Deḡoda ai banaga Arue e giugiuna, tauna tokare nam aba gewagewanama Yesu ḡarone e giue. Be teneḡinama nama aitau da Arua Babau ḡarone, tauna tokare e riuna, “Yesu tauna Bada.”

4Arua Babau tenaḡa, be puyo tabu be tabu banaga e uteutedana. 5Be noya inam tabu be tabu, be Bada tenaḡa aubainama tà noyanoyana. 6Be Mamaitua tenaḡa, be noya tabu be tabu banaga nopode e voivoiedina. 7Uma kauidima Arua tauwai sumaḡa e uteutedana da ekalesia anisagudima aubainama.

8Arua tauwai sumaḡa tenatenaḡaḡa uma puyodima e uteutedina:

  • Waria nuauyauya taugiuedima,
  • waria katai taugiuedima,
9waria tauwai sumaḡa,

  • waria Tauwai yawasana,
10waria mataira tauvoiedima,

  • waria tauwai peroveta,
  • waria arua tabu be tabu adi yawasanama taukataiedima,
  • waria bona tabu be tabu taugiuedima,
  • waria bona tabudima tauvitaredima.
11Arua Babau tauna tenaḡa, be uma kauidima matabudi na ḡoane nama tauwai sumaḡa tenatenaḡaḡa e uteutedina.

Tubuḡa tenaḡa be ragaraganama toitoi

12Tubuḡa tenaḡa be ragaraganama toitoi. Be avedi da ragaraganama toitoi, tubuḡa yaḡoro inam tenaḡa. Be kauinama teneḡinama nama Keriso ḡarone, 13baninama Arua Babau tenaḡa. Be inam Arua babaune tauda matabuda tè babataitona da tauda yodi tubuḡa tenaḡa, avedi da noḡone tauda Jiu, bo Gurik banegidama, bo taunoya yababa bo deḡo da nam taunoya. Matabuda Arua teneḡinama tè paḡona.

14Tauda tè kataie da tubuḡa nam raganama tenaḡa, ibewa da ragaraganama toitoi. 15Deḡoda yodi sibo kaḡa ya riuna, “Taugu nam nima, vutuna aubainama taugu nam tubuḡa ḡarona.” Be inam nam nama. Kaḡa yaḡoro tubuḡa ḡaronama. 16Be deḡoda yodi sibo bea ya riuna, “Taugu nam mata, vutuna aubainama taugu nam tubuḡa ḡarona.” Be inam nam nama. Bea yaḡoro tubuḡa ḡaronama. 17Be yodi ko noḡoti, deḡoda tubuḡa matabuna i rawamatana, nema tokare kuyai beavaia bako? Be deḡoda tubuḡa matabuna i rawabeana, nema tokare pana bo ḡabu kuya vaia bakedi?

18Be Mamaitua tubuḡa ya voiena be na ḡoane nama rageragedima tabu be tabu ya biridina. 19Deḡoda rageragedima matabudi sibo raga tenaḡa, tubuḡa tokare deḡo? 20Vutuna aubainama raga toitoi, be inam yaḡoro tubuḡa tenaḡa. 21Mata nam teneteneḡina da nima sibo ya riuena, “Taugu è tuaḡaiemna.” Be deba nam teneteneḡina da kaḡa sibo ya riuena, “Taugu è tuaḡaiemna.”

22Ibewa, be tubuḡa raganama anikitanama maika kabe nam aiyaba, ibewa da adi noyama yaḡoro ta kenakenana. 23Be deḡo ragedima tà noḡonoḡoti da nam aniviviviredi, taudi tà vivira kauedina. Be deḡo ragedima waitunimayamayaḡidima, tàwai gara kauedina, 24be deḡo ragedima nam waitunimayamayaḡidi, tauda nam tamawai gara kauedina. Be teneḡinama nama Mamaitua tubuḡa rageragedima yai rawateḡeidi da taudi tubuḡa tenaḡa, be raga ḡesaudima kamai ragaraga ya voiedi da banaga ta viviviviredina. 25Mamaitua nama ya voiena, baninama nam sibo tubuḡa ya daberara be raga matabuna sibo turanama turanama mate ai rabaraba vivirana. 26Vutuna aubainama deḡoda raga tenaḡa ei nuatoitoina, naumeki da raga ḡesaudima mate tai nuatoitoi saguna. Be deḡoda raga tenaḡa isanama banaga ta kaisuḡuna, naumeki da raga ḡesaudima mate tai nuaverena.

27Be yodi yà riuemi da taumi matabumi inam Keriso tubuḡinama, be taumi tenatenaḡaḡa inam raganama. 28Be ekalesia nopone Mamaitua noya tabu be tabu tauwai sumaḡa ya utedina:

Noḡone apasol noyanama,

murine waiperoveta noyanama,

murine tauwai katakatai noyanama,

da mataira tauvoiedima,

da Tauwai yawasana,

da tauwai sagu,

da waibada noyanama,

da bona tabu be tabu taugiuedima.

29Be yodi banaga matabudi inam apasol, bo? Bo matabudi tauwai peroveta? Bo matabudi tauwai katakatai? Bo matabudi mataira ta voivoiedi? 30Bo matabudi Tauwai yawasana? Bo matabudi bona tabu be tabu taugiuedi? Bo matabudi bona tabudima tauvitaredi? Ibewa! 31Ko raurubu gurata da puyo dosidima ko ragaudina.

Be yodi keda vere vavasaḡinama yài kataimina da nema sibo inam puyodima koya noya bakedina.

Copyright information for `DWW