1 Timothy 3

Ekalesia babadidima adi giuma

Uma giunama yodi aba yà riuemina inam riukaua: Deḡoda aitau ekalesia debanama waibadenama e ḡoeḡoena, inam naumeki tauna noya verenama e ḡoeḡoena. Be inam baneginama tauna na yawasanama sibo umanama:

• Tauna yawasana didimanine miemieninama,

• be nam aba e voia waigewa da banaga tai giugiue.

• Be tauna waivi tenaḡa e naḡi be vutunaḡa e rabena,

• be inam baneginama miamia genuaninama, be nam voivoia yabayababina,

• be tauna na noḡotama matabudi didimanidiḡa,

• be tauna voyaḡota be vivira baneginama,

• be banaga na vadae ta tavatavana taurabe kauedima.

• Be tauna Mamaitua na damma tauwai katakataidima,

be nam tegobua banegina,

• be nam sorukeakea banegina.

• Tauna vovoyaḡotinama be nam kayokayo medimedina,

• be nam mane tauwai nuapaḡoenama banegina.

Tauna na vadama banegidima ei bada kauedina keda verene, be e kita da na sedama tauna ta voteyeteyena. Be deḡoda tauna na vadama banegidima ḡarodie nam ei bada kaua, inam tokare nam teneteneḡina da Mamaitua na damma ḡarodie ei bada.

Be tauna nam sibo waisumaḡa vaunama banegina, baninama deḡoda tauna noponama rauguyaguyau e moḡavu, be tokare kovoḡa e banavina maika Seitan.

Be banaga nam waiwaisumeḡidi mate tauna sibo a vivivivirena be a kawakawa saḡena, be deḡoda ibewa, inam tokare banaga tai giugiue be Diaboro na kwaroe e raukaisaḡa be e tikonina.

Be kauinama teneḡinama ekalesia taurabedima nama.

• Banaga matedie taudi banaga viviviredima,

• be nam banaga tauriu waimatakoedi.

• Be nam tegobua banegidi,

• be nam kaiyovue a rarau mane bo a rarau purapura.

Taudi adi noḡotama didimanine waisumaḡa waikatakataidima ta kaididina. Inam vutuna Mamaitua yai maḡatarina ḡarode.

10 Noḡone ko kita wairuvedi, be deḡoda nam aba gewagewanama ḡarodie ko banavi, naumeki da taudi Mamaitua na damma ta rabedina.

11 Be kauinama teneḡine adi waiwaivima nama.

• Banaga matedie taudi waiwaivi viviviredima,

• be nam tawai mena bo tawai karakarakutu.

• Be taudi miamia genuanidima, be nam voivoia yabayababedi,

• be taudi waiwaivi patupatutudima.

12 Be ekalesia taurabenama tauna waivi tenaḡa kavakava ya naḡina. Be tauna na sedama be na vadama banegidima ei bada kauedina keda verene. 13 Deḡoda ekalesia taurabenama e noya kauana, banaga tauna tokare ta kawa saḡe, be tauna ma raudebatorana Bada Yesu Keriso ei matematena banaga noḡodie.

Mamaitua waikatakatai riuriukauinama ewai maḡatarina

14 Taugu yà noḡonoḡotina da raḡan ḡaubonaḡa yà verauna ḡaromie, be taugu yaḡoro uma letanama yà girugirumina tam ḡarome, 15 baninama deḡoda taugu nam yà verau, tam kaite kuya kataiena da Mamaitua na vadae tauwai sumaḡa nema sibo a vivira bakona. Taudi vutudi riukaua Mamaitua miamia nonoḡinama na damma, vutuna aubainama taudi Mamaitua na waikatakataima kadi tuatuama.

16 Mamaitua waisumaḡa riuriukauinama yai maḡatarina ḡarode, nam aniriuriu nuababaḡe, baninama inam umanama,

Keriso tubuḡe ya maḡatarana,
be Arua Babau ewai maḡatarana da Keriso tauna naumeki didimana baneginama.
Be anea tauna a kitana.
Be tauwai sumaḡa dam matabuna ḡarodie tauna a rauguguyena,
be banaga dobu matabuna tauna ai sumaḡe,
be Mamaitua ya nawena marae.
Copyright information for `DWW