Colossians 1

Pol ghe amasimasila tau ngaiesoa ngatoa eKolosae

Aghi Pol, kapuna apostolo ieghi Karisto Iesu me tale aloaloane God, me Timoti kapuita ia.

Tale taumattu ngatoa manga iem me am aimuli emasinaaili ta Karisto eKolosae, maamasinaane me luei etaimim emae sio ta God.

Nikaili emasina me nilooloo sae

Angalu kaakaili emasina ta God Tamana ia Vau eteva Iesu Karisto tale kalumami nilooloo sae, poli angalu ghe nongola uneimim niaikaaia ta Karisto Iesu me aielousiaimim ta kapuna tau manga akapa atoa God. Am aikaaia poli God eaitara aipolipoli eteva epona liu am kilakila va aue tau atu. Ngam ghe nongo vella arau tale inangari koronna, tale masi kiukiu, ange mae sio etaimim. Me tale kosa akapa ateva inangarina ateva God ekuukunea uena me epiipinosa nongina ghe gheleila etaimim nau am ghe kilala inangari koronna tale maamasinaane God. Am ghe nongoala ta masi kapumami eteva ta Epapras, masi tau ngai uungu eteva kapuna ia God, eghaaghaa liumami. Me ange aulia tau mae sio etamami kaluimim niaielousi kanna Spirit Manga.

Liuna avalua o me nau eteva ami ghe nongola karika ami ghe ruula tani looloo sae tani kolomi God tani tau aatu alomasaanga tale Spirit Manga ateva me aue am kila aloanaane God. 10 Me aue am kasu tale masi salana eoneonea God, me aue am amasimasia tani ghelei masi niuungu me aue am tani kila amasinaaili God. 11 God aue easarasarakanaiem tale kinatama sarasarakaniaane tani gheleiem va am rau mene sio asoasoa tale nau sesa arova emae ta aue am nim matua ngatoka, me am masimasi 12 tani kaili emasina sae ta Tamaita ateva, ia ghe gheleiemla va am rooroo tani aitaua saa llo eghe aimonomonosiaala epona liu tale kapuna tau manga atoa tale mallanga ateva.

13 God ghe ghaa oghitala tale sarasarakania saurrom ateva, me ghe atokaita lao sio tale ararimangalina ateva Natuna ateva eaielousieinia. 14 Ie nonga aighaa oghita ia, me ekakkaluaa kaluita ssavoto.

Iesu Karisto ia nonga tale voto akapa

15 Karisto tootoona ia God ateva, karika ita rooroo tani taraia, ghe tokala arau me ia mue ia tale voto akapa ghe gheleila. 16 Poli ta ngetana voto akapa God ghe gheleila, voto epona liu me tale kosa ateva, voto ita taatara me voto karika ita rooroo tani tara, me ila akapaaili ensolo atoa, kuturu etoa, raroai etoa me asease tau ngai toitoi etoa. God ghe gheleila isaa akapaaili voto ta Karisto, me kanna Karisto. 17 Ghe tokala emua arau, me ta ngetana isaa akapaaili voto etokatoka amasina. 18 Me ia emuemua ale manga ateva nongina uruita ateva emuemua vaulaniita ateva. Ia ghe toka akasinala me aitiutiu ia tani totu tale nimate. Ia avalua o me ie nonga eaitara akapanaaili voto atoa. 19 Poli God emasimasi va isaa akapaaili voto kanna God etoka ta Karisto. 20 Ta ngetana God ghe mene atoka aitauaala isaa akapa voto teeia, voto tale kosa ateva me epona liu, me ghe gheleila luei tale raena ateva Natuna ateva tale aikoto ateva.

21 Me am, isaa to nau am ghe masaueilila me tale nannaaimim am ghe sessa tee God, me gheegheleiaaimim sesa, 22 me isaa oia ia ghe atoka aitaueiniemla teeia tale matemateaane tale aikoto ateva, tani maeainiem nongina etokatoka, manga, me raarangisana, me karika righi sesa gheegheleiaaimim, 23 arova am aloana tani mene lao tee tale kaluimim niaikaaia, me am toka parasi me am tingina akorokorongana tale masi kiukiu am ghe nongola, laghe ppooala tale isaa akapaaili taumattu tale kosa ateva, me aghi tee, Pol, tau ngai uungu ieghi tani ppooa ia o masi kiukiu.

Uunguaane Pol tale ale manga

24 Ghaine amasimasi tani ghaa maamaatana tani aisausieinam, me aghelei ekapa llo maate Karisto ghe suitoongainaghila va aghaaghaa tale vilikighi, tani sausi ale manga ateva. 25 God ghe tau mae sio niuungu etaghi tani uungu mausi ale manga ateva, ghe sungieghila tani ppooa akapa masi kiukiu etaimim. 26 Ia o inangari eteva ang ghe aisulia vella arau, me tale isaa oia nau ang ghele kaurekatila ta taumattu manga. 27 God ghe suitoongainilala tani apasungaala voto aisuliana etaira, va tau ngeleka atoa aue la ghaa kinatama niarangise ateva, me Karisto aue toka teeiem tau ngeleka atoa, me am atoka tuutuliimim tale voto emae epona liu. 28 Ami aulia ngaotu Karisto, ami aulia kieira taumattu ngakapa atoa me ami apasungala ta taumattu ngakapa atoa tale alomasaanganiaane Karisto, tani ghelei taumattu ngakapa atoa va la matuena ta Karisto nau la tingina emua ta God. 29 Liuna avalua o me auungu ekorokorongana tale isaa akapaaili sarasarakaniaane etautau mae etaghi.

Copyright information for `EMI