Colossians 2

Aghaloana tani aulia kieimim vaalua aghe saula maamaatana mausiimim me tau ngai kaua ngatoa eLaodasia, me tee lo atoa la aikaaia karika ami ghe aitarala me ila. Aghanna tani aisausieinila me tani gheleila va la toka aitaua tani korokorongana tale niaielousi. Aue la kaarasi tani ghaa niarangise me alomasaanga, aue la kila voto aisuliana kanna God, isaa ta Karisto. Karisto nonga erooroo tani ghelei taumattu ngatoa la alomasaanga me tani apasunga llo voto God eaipanipania ta taumattu ngatoa. Aghaulia etaimim llo oia voto, ta toa taumattu la rau kameam nonga tale kamena niapasunga am nongonongo arova masinaaili. Arongona ta masaueili eghi etaimim, me urunguitanighi eteva etokatoka teeiem, me amasimasi tani tara va tokatokaimim masina me uneimim niaikaaia ta Karisto korokoronganaaili.

Ouna ateva maulue ta Karisto me karika tale inangari niloeloe

Me isaa oia, nongina am ghe ghaala Karisto Iesu Vauimim ia, am kasu teeia nau etoa. Am atoka maamauluaaimim epona etana nongina ai eteae oane eposoposo asarasarakana ia, me tingina akorokorongana tale niaikaaia am ghe ghaala, me aue am kaili emasina etana nau etoa.

Am aipanipania! Toa taumattu la rau kameam nonga tale nim nannaaira pei tale kosa ateva oia korokoronganaaili me kamena, emaemae ta raroai etoa me karika emaemae ta Karisto. Poli isaa akapaaili voto kanna God etoka ta Karisto, 10 me ngam ghe pasula nau am tokatoka ta Karisto, ia emuemue ngakapa tau ngai toitoi etoa me namu ngatoa tee. 11 Nau eteva am ghe mae sio ta Karisto am ghe ghaala ni-isoiso, karika tale ni-isoiso tuunga ateva, ta am ghe ghaala ni-isoiso ateva kanna ia Karisto, ghe iso vella vilikina tale matemateaane, 12 poli am ghe mate teela Karisto nau eteva laghe asuuemla tale manu me am ghe totu teeiela tale ouna ateva maulue, poli am atoka tuutuliimim tale kaluimim niaikaaia elome tale sarasarakaniaana God, ghe totula Karisto tale nimate. 13 Kaluimim ssavoto ghe gheleiemla arova matena am me poli sesa gheegheleiaaimim karika ghe kapa, vara me God ghe ghelei esakesakeamla ta Karisto, ta ghe kaluaala isaa akapaaili kaluimim ssavoto. 14 Ghe sei vella kaluita ssavoto tale uru ngai laghe pitila me kaluimim dinao nau ghe matela tale aikoto. 15 Tale ia o salana ateva ghe apalala sarasarakania sesa spiriti etoa me tau ngai toitoi me ghe apalatailala ta mataira taumattu ngatoa nau eteva ghe apalailala tale aikoto.

16 Ia avalua o me am rau mene tau veluem va la aulia teeiem tale inana am namanama me manu am ropiropi me karika am laolao tale kasina tana uneira nivelu eitaua tale nau manga tale kateva kateva ninamanama me kateva kateva ulana me tale nau sambati. 17 Isaa o inangari niloeloe me kastam nim tootoo voto auena emae, me ia o Karisto, ia koronna ia, ang ghe mae sio. 18 Am rau mene tau velu taumattu ngatoa va la ghelei kaluimim nikkaua tani ue va am siua nannaaimim me am kaua ensolo atoa me la anna va muenaaili ila poli laghe tarala nitaatara, sesa nannaaira egheegheleila me la tautau sae nannaaira. 19 Karika la tokatoka tee Karisto, ia nongina uruita eposoposo aitaua vaulaniita me riuita me ita piipinosa nau eteva God eapinosaita.

20 Am ghe mate teela Karisto, me ghe akekkeliemla tale raroai etoa, me vaalua am mene usiusi inangari niloeloe tale kosa ateva oia: 21 Am rau mene poso, am rau mene namunamua, am rau mene tuli! 22 Isaa o ase inangari niloeloe pei tale kosa ateva oia aue ekapa, nim kaluira taumattu ngatoa la apasunga. 23 Isaa o inangari niloeloe enim gheegheleila va la kkaua me la ghelei voto tale vilikiira va enim usila nannaaira. Isaa o inangari niloeloe arova tani alomsaanga, karika, me karika etautau mae righi niaisausi tani apala sesa gheegheleia kateva kateva taumattu.

Copyright information for `EMI