John 1

Inangari eteva ghe taumattula

Emua arau, nau karika righi voto ghe lutu, Inangari eteva ghe tokatoka. Ghe tokatoka tee God, me ie tee Goto ia. Emua arau, ia Inangari ia, me ghe tokatoka tee God.

Tale ia o Inangari eteva God ghe ghelei ekapala voto. Arova ia o Inangari eteva karika ghe tokatoka, karika righi voto God ghe gheleila aue ghe lutu. Maulue ateva etokatoka ta ngetana. Me maulue ateva, mallangiira ia taumattu ngatoa. Ia o mallanga ateva, elalla tale saurrom ateva, me saurrom ateva karika erooroo tani ghelei epalaia.

God ghe suula taumattu ngateva, ararina ateae ta Jon. Ghe mae sio tani aulieinia mallanga ateva oia ta taumattu ngatoa, poli ghe aloanna va ila akapa la ghaiesoa inangarina. Jon karika va mallanga ia. Ia ghe nim mae sio tani ppoa ngaotu inangarina mallanga ateva. Mallanga ateva koronna ia ghe sso mae tale kosa ateva, me emaamallanga tale taumattu ngakapa atoa.

10 Ia o Inangari eteva ghe tokala oia tale kosa ateva, me God ghe gheleila kosa ateva tale ia o Inangari eteva, me karika teva ghe kilakilaia. 11 Ghe tani mae sio tanganuena, me kapuna atoa karika laghe aikoloainiela. 12 Katoa tana taumattu laghe aikoloainiela, me laghe aiesoaala etana, me tale ararina ateae. Liuna avalua o, me ghe tau lao sio niavauvau eteae va ila natuna ila God. 13 Karika va natuna ila God tale raeira taumattu ngatoa, me aloannaira taita atoa me vause atoa, me nannaa taita atoa. Nim ia God ghe gheleilala va natuna ila.

14 Inangari eteva ghe taumattula, me ghe toka teeiemamila. Ami ghe tarala mallangina ateva tale ie nonga o Natuna ateva, Tamana ghe sungiela. Ia pasu ia tale maamasinaane me inangari koronna.

15 Jon ghe aulieniela nau ghe sama anamungailila me ghe uela va, “Ia oia taumattu ngateva aghe aaulieinia va aue mae. Ia namuu ia etaghi, me aghi ghauna aghi etana. Poli ia ghe tokala arau, me avirina aghe lutula.” 16 Poli pasu ia tale maamasinaane, liuna avalua o me ita ghaaghaa asease niarangise. 17 Poli God ghe tau lao sio inangari nipaopao ta Moses, me Moses ghe tau mae sio etaita, me Iesu Karisto ghe tau lao sio maamasinaane me inangari koronna. 18 Karika poi teva ghe tara God. Natuna nonga, ia koronna ia va Goto ia me kalakalanginaaili ia ta Tamana, ia ghe apasungaala etaita va God vaalue ia.

Jon tau ngai aasuu ia ghe auliaa ngaotula Iesu

(Mat 3:1-12; Mak 1:2-8; Luk 3:15-17)

19 AJiu etoa laghe suula pristi etoa me Livae
1:19 LivaeLivae atoa laghe saasausi tani uungu tale ale manga ateva
atoa eJerusalem tani laa kolomi Jon va ia see.
20 Jon karika ghe aisuliaala etaira, me ghe uela etaira va, “Karika aghi va Karisto ieghi.”

21 Laghe mene kolomiela va, “Io Elaija?”

Ghe liula me ghe uela va, “Karika.”

Me laghe mene kolomiela va, “Io Propete io?”

Ghe mene liula me ghe uela va, “Karika.”

22 Vara me laghe uela etana va, “Me ue va io see? Me ami laa ghauliaa ta lo atoa la sungiemamila tani mae kolomi va io see.”

23 Jon ghe liula tale inangarina propet Aisaia ghe uela va, “Aghi lingi ngalona ateva taumattu ngateva esamasama anamuu tale voto ateva karika righi taumattu etana ghe ue va, ‘Ghelei eghulughuluenala salane atikirighi Vau eteva.’”
1:23Aisaia 40:3
24 Elome tale lo atoa laghe lao sio tani kolomi Jon, katoa etaira Paresi ila. 25 Laghe kolomiela va, “Vaalua me uasuu taumattu me karika va Karisto etam, karika va Elaija etam me karika va Propete io?”

26 Jon ghe uela etaira va, “Aghi aghasuuem tale manu, me kateva elome etaimim karika am kilakilaia. 27 Arongo ta aghi aghe muemue mae sio, me karika masina ieghi tani pulaka velu oasa tale unna aikasukasu elua.”

28 Isaa o voto ghe lutula eBetani tale pai kativilau eJodan, nau Jon ghe asuu.

Natuna sipsipi eteva God

29 Mene kateva nau me Jon ghe tarala Iesu ghe maemae aloi etana me ghe uela va, “Am tarala! Natuna sipsipi eteva oia God! Ia aue ghaa velu ssavoto tale kosa ateva. 30 Ia aghe aulieiniela etaimim, nau aghe ue va, ‘Kateva taumattu aue mae, ia namuu ia ta ngetaghi, poli ghe tokala arau, me avirina aghe lutula.’ 31 Karika aghe kilala va ia see, ta anim aasuu taumattu tale manu va aue Israeli etoa la taraia.”

32 Jon ghe auliaala etaira va, “Aghi tee okae, me aghe tarala Spiriti eteva ghe kasula epona liu nonginaaili va ghila ateva valusu ia ghe mae sio toka etana. 33 Karika aghe kilala va ia see, ta lo ateva ghe sungieghila tani asuuem tale manu eghe uela etaghi va, ‘Aue utara Spiriti eteva esio toka tale kateva taumattu, me aue ukila va ia o taumattu ngateva aue easuuem tale Spirit Manga ateva.’ 34 Aghi aghe tarala isaa o voto ghe lutula. Liuna avalua o me aghauliaa etaimim va ia Natuna ia God.”

Aitiutiu etoa kapuna disaepolo Iesu

35 Mene kateva nau Jon me ghalua tana kapuna disaepolo latolu ghe tiitingina aitaua. 36 Nau ghe tarala Iesu ghe kasukasu elaolao me ghe uela va, “Am tarala! Ia o natuna sipsipi eteva God!”

37 Ilalua o disaepolo alua lalu ghe nongola, me lalu ghe lao sio tani aimuli tee Iesu. 38 Iesu ghe kiriela me ghe tarailaluela, me ghe uela va, “Sa ateva amalu aloannaia?”

Lalu ghe liula me laghe uela va, “Rabbi, ea utokatoka?” (Ta samasama nge Ibru, ‘Rabbi’ malloeana va ‘tisa’.)

39 Iesu ghe liula me ghe uela va, “Amalu usieghila, me amalu laa tara.”

Laghe usila tani laa tara nongina Iesu ghe tokatoka. Angghe 4 kilokola elo alai, me laghe toka teeiela vara me ghe voola.

40 Andru, nengane ia Saemon Pita, kateva ta ilalua o taumattu ngalua lalu ghe nongola Jon, me lalu ghe usila Iesu. 41 Aitiutiu eteva voto Andru ghe gheleiela, ghe kasula tani pae tuena ta Saemon Pita tani auliaa etana va, “Ngami ghe paela Mesaea ngateva.” Ta samasama nge Ibru, malloeana ‘Mesaea’ elaolao aitaua tee samasama nge Grik va ‘Karisto.’ 42 Andru ghe laoa asio tuena ta Iesu. Me nau Iesu ghe taraiela, ghe uela va, “Saemon natuna io Jon. Aue lakolo ararim ateae ta Kepas” (malloeana ta samasama nge Grik va Pita, atu ia).

Iesu ghe kolola Pilip me Nataniel

43 Vara ghe pai saela ta mene kateva nau, me Iesu angghe anna tani lao eGalili. Nau ta ghe lao sio, ghe saopila Pilip, me ghe uela etana va, “Mae usieghi.”

44 Pilip atala nge Betsaida ia, tanganueirarua Andru me Pita. 45 Pilip ghe saopila Nataniel me ghe uela etana va, “Ngami paela taumattu ngateva Moses ghe pitila me ghe aulieiniela tale inangari nipaopao, me propete atoa laghe piti emuemue alokoila maemaeaane, Iesu ta ngetana, natuna ia Josep aNasareti ia.”

46 Me Nataniel ghe kolomiela va, “Righi masi voto elutulutu eNasareti?”

Pilip ghe liula me ghe uela va, “Mae sio me ulaa tara.”

47 Nau Iesu ghe tarala Nataniel ghe kasukasu emaemae etana me ghe uela va, “Tarala! Taumattu ngateva o, ia taumattu koronna ia ta Israeli etoa, karika egheelei me eauliaa voto kamena.”

48 Nataniel ghe kolomila Iesu va, “Vaalua ughe kilaieghila?”

Iesu ghe liula me ghe uela va, “Ngaghe taraiola nau Pilip ghe koloola ta ughe tokatoka tale liue fig eteae.”

49 Me Nataniel ghe uela va, “Tisa, io Natuna io God, me io kingi nge Israeli io.”

50 Iesu ghe liula me ghe uela va, “Uaikaaia etaghi poli auela va aghe taraiola ughe tokatoka tale liue fig eteae? Aue utara mene kasina voto namungaili aue elutu. 51 Aghauliaa ngakoronna etaimim va aue am tara epona liu aue eotia, me kapuna ensolo atoa God aue la siosio me la saesae ta Natuna ateva Taumattu ngateva.”

Copyright information for `EMI