John 16

“Aghaulia isaa o voto etaimim poli am rau mene oghi vulu aikaaiaaimim. Aue la tiu veluem tale aleira ale nivelu eitaua, me aue nau emaemae lo atoa la uvi emateam, aue la ghannaa va la gheelei uunguaane God. Isaa o voto aue la ghelei etaimim poli karika la kilakilaiengalua me Tamaghi. Aghaaulia isaa o voto etaimim me nau isaa o voto etiuaa tani lutu, aue am nna va ngaghe auliaala kieimim.

Uunguaane Spirit Manga ateva

“Aghe tokatoka teeiem, liuna avalua o me karika aghe aaulia isaa o voto emua arau.
Me ia oia ngamene laa saesae ta lo ateva ghe sungieghila tani sio, me karika teva etaimim ekookolomieghi va, ‘Ea ulao?’ Nau ngaghaaulia me ngam nongonongo isaa o inangari ngam nim aalousiusi. Aghaaulia ngakoronna etaimim va emaamasina va akasu, poli arova atam kasu, tau ngai sausi eteva karika aue sio etaimim, me poli ngakasukasu aue asungia tani mae etaimim. Nau eteva emae aue ghelei taumattu tale kosa ateva oia la kila amasina ssavoto me ghulughuluena me niaisakei. Tale ssavoto, poli la tam aiesoa etaghi. 10 Me tale ghulughuluena, poli ngalaa saesae ta Tamaghi, me karika aue am mene taraieghi. 11 Me tale niaisakei, poli vau tapaa kosa ateva oia angghe aisakeila, me ghe tam roola.

12 “Oroianaaili voto aghanna tani aulia etaimim, me poli isa oia nau karika aue am kila amasina. 13 Nau Spiriti eteva eaapasunga voto koronna aue mae, aue eaulia voto koronna etaimim. Karika aue eaulia righi voto nim nannaane. Aue eaulia llo ghe nongola me aue eaulia kieimim tale voto auena emae. 14 Aue easaesae ararighi eteae, poli aue eghaa inangarighi me eaulia etaimim. 15 Isaa akapannaaili voto kanna Tamaghi, kalughu. Liuna avalua o me aue va, ‘Aue eghaa inangarighi, me eaulia etaimim.’

Nialousiusi me nimasimasi

16 “Karika masauna arighi me aue am lungieghi, me karika aue emasau me aue am mene taraieghi.”

17 Me katoa tani kapuna disaepolo laghe aikolomieinila va, “Vaalua me eue va, ‘Karika masauna arighi me aue am lungieghi, me karika masau me aue am mene taraieghi,’ me eue tee va, ‘Alao ta Tamaghi’?” 18 Laghe aikolomieinila va, “Vaalua malloeana nau eue va ‘karika masauna arighi’? Karika ita kilakila amasina llo eaulia.”

19 Iesu ghe kilakila sa voto ateva laghe anna tani kolomia. Liuna avalua o me ghe uela etaira va, “Nga uela va, ‘Karika masauna arighi me aue am lungieghi, me karika masau me aue am mene taraieghi.’ Isaa o llo am aikolomainiem etana? 20 Aghaaulia ngakoronna etaimim va aue am ngala me am alousiusieili, me taumattu tale kosa ateva oia aue la masimasi. Me am, aue am alousiusieili, me alousiusiaaimim aue am mene masimasi etana. 21 Nau aliki eteva ange anna tani lutu, vause ateva ealousiusi poli ekilakila va nau nimmarikana ange rekatala, me nau aliki eteva elutulutu, eaikaluaa nimmarikana ghe ghaala, poli emasimasi va aliki eteva ange lutula tale kosa ateva. 22 Ia o voto ateva nonginaaili am. Ia oia am aalousiusi me aue amene taraiem, me aue am masimasi. Lo ateva nimasimasi, karika teva aue ghaa velua etaimim. 23 Ia o nau eteva karika aue am kolomieghi tale teva voto. Aghaaulia ngakoronna etaimim va Tamaghi aue tau aatu voto am kolomi tale ararighi eteae. 24 Nau to angghe lao sio karika am ghe kookolomi righi voto tale ararighi eteae. Am kolomi me aue am ghaa me aue am pasu tale nimasimasi.

Iesu ghe apalala kosa ateva

25 “Isaa o voto aghaaulia etaimim tale inangari niaimatoonga, me aue nau to emaemae, karika aue aghaulia voto etaimim tale inangari niaimatoonga. Aue aghauliaa ngamasalikangaili Tamaghi etaimim, me aue am kila amasinaaili ia. 26 Ia o nau eteva aue am kokkolomi tale ararighi eteae, me karika aue va aghi aue akolomi Tamaghi tani sausiem, 27 poli Tamaghi tee eaielousieinam ta am, am ghe aielousieinaghila me am aiesoa va aghi aghe tokatoka tee God, me aghe sio mae. 28 Aghe kasula ta Tamaghi, me aghe sio mae tale kosa ateva oia, me aue amene kasu vuli kosa ateva oia tani mene sae ta Tamaghi.”

29 Me kapuna disaepolo atoa laghe uela va, “Ngami vira mene ghaaghaa masina inangarim, poli karika umene poppoa inangari niaimatoonga. 30 Ia oia ngami kilakila va ukilakila akapa voto, me karika teva aue kolomio tale righi nikokkolomi, poli ukilakila akapa nannaaimami. Liuna avalua o me ami aiesoa va ughe kasula ta God.”

31 Iesu ghe liula me ghe uela etaira va, “Angam vira aikaaia etaghi? 32 Nau ange aakalakala me ange rekatala va aue la ghameti reerekatainam, me kateva kateva etaimim aue eilou lao tanganuena. Aue am ilou vulieghi me aue ekapa kapughu, me karika va aue kapaaili kapughu, ta poli Tamaghi aue toka teeieghi.

33 “Aghe aaulia isaa oia inangari etaimim, poli aghanna va am toka etaghi, me aue luei eteva etoka etaimim. Kosa ateva oia oroieili nimmarikana am ghaaghaa, me am rau mene sio asoasoa, poli ngaghe apalala voto tale kosa ateva oia.”

Copyright information for `EMI