Luke 13

Nangai oghioghia o umate

Tale ia o nau eteva, katoa tana taumattu laghe auliaala ta Iesu vaalua katoa tana aGalili Paelat ghe uvi ematelala, nau eteva laghe uviuvi emate ghaata kkena tani ghelei sae aiaavusuvusuena ta Vau eteva. Iesu ghe liula etaira me ghe uela va, “Poli ila o aGalili etoa laghe mate avaluela o, am anna va ila sesaaili kaluira ssavoto, me lo atoa oia aGalili karika? Aghaaulia etaimim va karika! Arova am tam nangai oghioghia, am tee aue am mate. Vaalua tale kasangaulu ghaoalu (18) taumattu nge Siloam laghe matela nau aitiketike ateva ghe katuu sauaala ta ngetaira? Am anna va gheeleiaira sesaaili ta mene lo atoa eJerusalem? Aghauliaa etaimim va karika! Arova am tam nangai oghioghia, am tee aue am mate.”

Kiukiu niaimatoonga tale ai eteae (fig)

Iesu ghe auliaala tale taumattu ngatoa tale kateae kiukiu niaimatoongana: “Kateva taumattu, aina fig eteae ghe tiitingina tale umana paa ngutana uaeni etingiu. Ghe lao sio tani taatara poi va ghe tara righi uene me karika ghe tarala righi. Ghe uela ta kapuna tau ngai pasa utana atingiu va, ‘Tarala, kotoluae ninamanama aghe mae taatara vara aghe tara righi uene, me karika poi righi ataatara. Tue veluela! Vaalua me enim ruurungia inanina kosa ateva?’

“Tau ngai pasa utana atingiu ghe liula me ghe uela va, ‘Vau eteva, ratie tinginaiela, me emene tingina kateae ninamanama. Aua amene kai talieinia, me amene kuukumui poia. Marova ekune tale mene kateae ninamanama, aue masinaaili. Marova karika, aue ita tue velua.’”

Iesu ghe ghelei emasinala vause ateva poupouena ia tale nau manga ateva

10 Kateva nau manga, Iesu ghe aapasunga tale kateva ale nivelu eitaua. 11 Vause ateva raroai eteva ghe tokatoka ta ngetana ghe roola kasangaulu ghaoaluae (18) ninamanama; raroai eteva ghe gheeleia ghe poupou tani kasu, me karika ghe rooroo tani korosia. 12 Nau eteva Iesu ghe taraiela, eghe koloa mae sio etana, me ghe uela va, “Vause ateva, angu masinala tale voto ghe gheelei saasakieinio.” 13 Eghe saoaala nimane ta ngetana, me katengaata ta ghe korosiela, me ghe tiuaala tani tau sae God.

14 Kateva tana namuu tale ale nivelu eitaua ngateva ghe sessaiela ta Iesu, poli ghe ghelei emasinala vause ateva ta nau manga ateva, ghe samala me ghe uela ta taumattu ngatoa va, “Nauita ghaonomo tani ghelei uunguaaita, am mae tale isaa o nau va la ghelei emasinaiem, karika va ta nau manga ateva!”

15 Iesu ghe liula me ghe uela etana va, “Usimaghalua am! Am oia, aue am ghele pulaka kieimim vulumakao o donki, me am laa ghaa aropi tale nau manga ateva. 16 Vaalua, karika ita rooroo tani sausia tale nau manga ateva? Poli ie tee kateva oia natuna vause Abraham, Satana ghe ghaaiela ghe roola kasangaulu ghaoaluae (18) ninamanama.”

17 Ailiuliu tale inangarina ghe ghelei epalatala tau ngai ssateena atoa, me taumattu ghe taatara masi voto ghe gheelei, laghe masimasi.

Kiukiu niaimatoonga tale katu ue ngai erighi me isti eteva

(Mat 13:31-33; Mak 4:30-32)

18 Vara me Iesu ghe kolomila va, “Vaalue ia ararimangalina ateva God? Aue asuimatoonga tale sa ateva? 19 Ia nongina katu ue ngai erighi, taumattu ngateva ghe ghaala katu ue ngai erighi (mastet), ghe pasaiela tale umana utana atingiu. Ai erighi ghe saela, me ghe namungailila, me ghila atoa laghe gheleila aleira tale laangina.”

20 Iesu ghe mene kolomila va, “Sa ateva aue asuimatoonga ararimangalina ateva God etana? 21 Ia avalua toko. Vause ateva ghe ghaala isti me ghe ghelei eitaua teela oroieili palaua me palaua ngateva ghe rrangala.”

Ghauna ateae atamana

(Mat 7:13-14, 21-23)

22 Iesu ghe laolao see tale masaliki taatara atoa, me tale ghauna atoa masaliki, ghe aapasunga elaolao ta taumattu ngatoa, me ghe lao sio eJerusalem. 23 Kateva taumattu ghe kolomiela va, “Vau eteva, karika oroi taumattu aue esaanga?”

Iesu ghe uela etaira va,
24 “Am sarasarakana tani kupi sso tale atamana ateae ghauna ia; poli oroieili taumattu aue la tootoonga tani kupi sso, me karika aue la roo. 25 Namuu tale ale ateva aue etingina, me eghoa kavati atamana ateae; aue am tingina eleka, me am mirimiri, me am kolokolo tale atamana ateae, me aue am ue va, ‘Namuu ngateva, otila atamana ateae etaimami!’

“Aue eliu etaimim me eue va, ‘Karika akilakilaiem va am see iem!’

26 “Aue am liu me am ue va, ‘Ami ghe namanama me ropiropi eitaua teeio; ughe apasunga tale masalikimami!’

27 “Aue emene ue va, ‘Karika akilakilaiem va am see iem. Am kasu vulieghila, am akapa sesa gheeleiaaimim!’

28 “Aue am ngala me am kata ngalungaluimim, nau am tara Abraham, Aisiki me Jekob, me propete akapa atoa tale ararimangalina ateva God, me am, aue la tiu veluem! 29 Taumattu aue kasu tale sinaka esae me sinaka esuu, me tale mene ghalue vilau paii, aue la mae sio tale tevo ateva tale kinatama ninamanama ateae tale ararimangalina ateva God. 30 Katoa taumattu ngatoa la ghaitiutiu aue ila la ghairuuruu, me katoa ila airuuruu ila aue la ghaitiutiu.”

Iesu ghe alousiusi teela eJerusalem

(Mat 23:37-39)

31 Ia o nau eteva katoa tana Paresi laghe mae sio ta Iesu, me laghe uela etana va, “Ukasu vulia voto ateva oia, me ulao ppae tale mene teae masaliki, poli Herot ealoanna tani uvi emateo.”

32 Iesu ghe liula etaira me ghe uela va, “Am laa ghauliaa etana tau nikamekame ateva okae va, ‘Aghi aue atiu velu raroai etoa, me aue aghelei emasina taumattu ghaine me nimana, me tale aiaakotonna ateva nau, aue aruu uunguaaghi.’ 33 Karika aue atoka, ghaine, nimana me luevoo; koronnaaili karika teva propete aue emate eleka eJerusalem!

34 “Jerusalem, Jerusalem! Ughe uvila propete atoa, ughe osala tau ngai kasuaa inangarina atoa God tale atu! Ghaisaa ta aghaloanna tani atoka aitaueinam kapughu taumattu ngatoa, nongina kina paolo ateva eaakou natuna atoa tale kaekaena, me karika am aaloanna! 35 Masalikiimim taatara ateae aue ekapa. Aghauliaa etaimim va karika aue am mene taraieghi, lomosi ta nau eteva aue emae, me aue am ue va, ‘Niarangise tale lo ateva emaemae elome tale ararina ateae Vau eteva.’”
13.35Sams 118:26


Copyright information for `EMI