Luke 17

Ssavoto

(Mat 18:6-7)

Iesu ghe uela ta kapuna disaepolo atoa va, “Voto eghelei taumattu ekaakatuu tale ssavoto ange ailutua, me alousiusi tale taumattu ngateva egheelei voto oia eailutua! Aue ghele masinaaili etana marova laghele iri atu etiulu maateia ta ngalona, me laghele allusia tale malionge, erau ghelei kateva tana aliki va ekaakatuu tale ssavoto. Am paniem tale voto am gheelei!

“Marova tuem ateva o nengam ateva eghelei ssavoto, upaoa, me marova enangai oghioghia, ukaluaa.
Marova eghelei teeio voto karika masina ghaituaata (7) tale kateva nau, me emae kaluaa ghaituaata, me eue va, ‘Ngannangai oghioghiaala,’ ukaluaa etana.”

Niaikaaia

Apostolo atoa laghe uela ta Vau eteva va, “Ughelei unemami niaikaaia enamuu.”

Vau eteva ghe liula va, “Marova uneimim niaikaaia naanamungaane nongina katu ue ngai erighi ghaunaaili ia (mastet), am rooroo tani ue ta ai eteae o va, ‘Tammutula tale uam, me umene ghoa pinosa elamana!’ aue enongo usilainiem.

Uunguaane tau ngai nongonongo anna ateva

“Marova kateva etaimim kapuna tau ngai nongonongo anna ateva euungu etapaa utana, o eaitara kiem sipsipi, nau ekiriaa mae elo ale, vaalua, aue uailuiluieinia tani namanama? Karika! Uue etana va, ‘Uaimanomanosiaa aneghi inana, me uaipanipaniaa, me ukkaisi tau mae aneghi inana, me uaku ateoghu ta anamanama me aropi, me auena umina namanama me uropi.’ Vaalua, aue ukkaili emasina tale uunguaane ange gheleila? 10 Nim nongina am, nau ngam gheleila voto God eauliaa etaimim tani ghelei, airuuruu am nim ue va, ‘Uunguaamami arau, poli ami nim tau ngai nongonongo anna iemami erau.’”

Iesu ghe ghelei emasinala kasangaulu (10) tau tasussuku

11 Iesu ghe mene laa saesae eJerusalem, ghe kasu eloi lao sio tale aioloa ngateva eSamaria me eGalili. 12 Ghe kasukasu elaolao tale masaliki eteae, me kasangaulu (10) taita aneira tasussuku eteva, laghe sousouela, laghe tingina amasaula, 13 me laghe kolokolo atinginala va, “Iesu! Namu ngateva! Alousiusi teeiemamila!”

14 Nau Iesu ghe tarailala, me ghe uela va, “Am lao sio, me am laa apasungainam ta pristi etoa.” Laghe kasukasu elaolao, me laghe raarangisanala.

15 Kateva etaira, nau ghe tarala va ghe raarangisanala, ghe oghi lao sio, me namungaili ta ghe tautau sae God. 16 Ghe lao sio me ghe suiaala ta liue kkena Iesu, me ghe kkaili emasinala etana. Taita ateva oia aSamaria ia.

17 Iesu ghe uela va, “Kasangaulu (10) taumattu la raarangisanala, me ea ghasio (9)? 18 Vaalua me taitani ngeleka ateva, ia nonga emae sio tani amasina ta God?” 19 Iesu ghe uela etana va, “Tingina saela me ukasu; unem niaikaaia ange ghelei emasinaiola.”

Maemae ararimangalina ateva God

(Mat 24:23-28, 37-41)

20 Katoa tana Paresi laghe kokkolomi Iesu va lovisa ararimangalina ateva God aue emae. Ghe liula me ghe uela va, “Ararimangalina ateva God karika aue emae nongina am, am taatara. 21 Karika teva aue eue va, ‘Tarala, ia toko!’ o, ‘Ia teke!’ ta ararimangalina ateva God ia oia elome ta ngetaimim.”

22 Vara me ghe uela ta kapuna disaepolo atoa va, “Nau etoa emaemae, aue am aloannaaili tani tara Natuna ateva Taumattu ngateva tale teva nau, me karika aue am taraia. 23 Katoa aue la ue etaimim va, ‘Tarala, ia teke!’ o, ‘Tarala, ia toko!’ Karika am mene akoronnaila va am usila. 24 Poli nongina ravaravaia ateva eravaravaia elomarase, me emammallanga akapa tale pai etoa, aue nongina Natuna ateva Taumattu ngateva tale nauna ateva. 25 Ta emua kasina aue eateatea mmarikana, me taumattu tale lo ateva oia vitu aue la ratia.

26 “Me nongina ia o nauna atoa Noa, aue nongina nauna atoa Natuna ateva Taumattu ngateva. 27 Taumattu ngatoa laghe namanama me ropiropi, taita me vause laghe lailai, ghe ghaala nau eteva Noa ghe kupi ssola tale anua ateva, me manu ghagga ateva ghe mae sio, me ghe tturungi ekapailala.

28 “Aue nongina tee nau ta Lot. Taumattu ngatoa laghe namanama, ropiropi me laghe aipolila peiira, laghe pasapasa, me laghe atuttulu. 29 Me nau eteva Lot ghe kasu vulila eSodom, kura ateae me atu ramerame ateva ghe sio mae epona liu, ghe tturungi ekapailala.

30 “Aue nongina nau eteva Natuna ateva Taumattu ngateva emae rekata. 31 Tale ia o nau eteva, taumattu ngateva etokatoka eleka tale ale ateva, erau mene kupi sso tanganuena va esso ghaa peina; aue nongina tee taumattu ngateva euungu tapaa ngutana, erau mene oghi ghoa tanganuena. 32 Am anna sa ateva ghe lutula ta vausenna ateva Lot! 33 Se etootonga tani asaangi maamauluaane, aue eraua; me se eraua, aue esaanga. 34 Tale ia o nau eteva, aghauliaa etaimim va, aue ghalua taumattu lalu aso tale kateae nonga aisalo eleivo: kateva aue la ghaaia, me kateva aue la rati elokoi. 35 Ghalua vause aue lalu kaakarasa ngaitaua vatum: kateva aue la ghaaia, me kateva la rati etokaia.”
17:35Kasina uru ngai laghe pitila, laghe pitila va,36Ghalua aue lalu uungu etapaa ngutana: kateva aue la ghaaia; me kateva la rati etokaia.(Mat 24:40)


37 Disaepolo atoa laghe kolomiela va, “Vau eteva, llo ia ea aue la lutu?”

Iesu ghe liula me ghe uela va, “Nongina ea matena ateva taumattu easoaso, paka ghila atoa la veluvelu eitaua tani namaia.”
17:37Paka ghila atoa, la aseasela va valtia, la namanama nonga voto angghe matela me mauuna.


Copyright information for `EMI