Luke 21

Unna viliki veu vause ateva raue vulu ia ghe taula ta God

(Mak 12:41-44)

Tale ale manga ateva, Iesu ghe atangarola me ghe tarala taumattu ngatoa tue peipeiena ila, laghe veluvelu viliki veu nongina laghe laa kaakaai viliki veu. Me ghe tara teela vause ateva raue vulu ia, karikaaili righi peina, ghe velu kaaila ghaluevilau nonga viliki veu tapirina.
21:2Tale inangari nge Grik,ghaluevilau lepton.Lepton ghaunaaili viliki veu, nongina kateva toea, me 100 lepton erooroo kateva denarius.
Me ghe uela va, “Aghaulia etaimim va ia o vause ateva raue vulu ia karika peina, ange kaaila oroi viliki veu, me ngeapalala katoa. Poli katoa oia oroieili uneira viliki veu etokatoka, me la nim vella nonga kasina tale aikaai eteva. Me ia o vause ateva karikaaili tivilau eoghi elokoila, ange kapaailila viliki veu eposoposo tani poli anna inana.”

Iesu ghe auliaala vaalua aue la tturuu ale manga ateva

(Mat 24:1-2; Mak 13:1-2)

Katoa laghe aarua ale manga ateva. Laghe ue va, “Masinaaili taatarane atu, me kasina masi voto laghe tau lao sio ta God tani amolumolu emasina ia o ale ateva.” Me Iesu ghe uela va, “Isaa o llo am aarua — nau aue mae karika teva atu aue toka saoa ta mene kateva. Aue taumattu ngatoa la puli reerekata isaa akapaaili oia voto.”

Sesa nau me niaiuvi aue mae

(Mat 24:3-14; Mak 13:3-13)

Laghe kolomila va, “Tisa, aue lovisa isaa oia voto aue elutu? Me saa voto aue elutu tani apasunga va ange naula?”

Iesu ghe liula me ghe uela va, “Uae nonga, la rau mene kameam. Oroi taumattu aue la mae tale ararighi eteae, me la ue va, ‘Aghi Mesaea ieghi.’ Me aue la ghaulia va nau ange mae akalakala sio, me am rau mene aimuli teeila. Am rau mene matautu nau am nongo niaiuvi me niamakatakata. Isaa o voto etani lutu ekasina me karika la aimatoonga va airuuruu tale kosa ateva oia ange mae sio.”

10 Eghe mene auliaa tee lao sio etaira va, “Anua atoa aue la aiuvieinila, me ararimangali etoa tee. 11 Kinatama rukeruke atoa aue la lutu tale kosa ateva. Maloo atoa aue la lutu tale kasina masaliki me sessa atoa aue la lutu. Aue niaimatoonga sesaaili me matautuna elutu elomarase.

12 “Emua ta isaa akapa o voto, aue la kuneiem me aue am ghaa nimmarikana, me la laoainiem tale ale nivelu eitaua ngatoa tani aisakei, me la atokaiem tale ale mata voovoo. Aue la ghaaiem tani atinginaiem emua ta mata kingi etoa me gavana ngatoa tani aisakei, mausi ararighi eteae. 13 Isaa avalua o me aue eoti salaimim tani ppooa aikaaiaaimim ta ngetaghi. 14 Liuna avalua o am rau mene aimanomanosia va saa inangari aue am liu etaira, 15 ta aghi aue atau aatu inangari tani ppooa me alomasaanga, me tau ngai ssateeimim atoa karika aue la rooroo tani liu. 16 Tamaimim me kinaimim, tueimim atoa me nengaimim atoa, me mangaliimim atoa me kapuimim atoa, ila tee aue la tauem lao ta tau ngai ssateeimim atoa, me aue la uvi emate katoa etaimim. 17 Ila akapaaili aue la ssa teeiem poli ararighi eteae. 18 Me karikaaili tikirighi uu nguruimim aue eraua. 19 Am tingina akorokorongana, me aue am ghaa maulue ateva tokatoka liu ia.

Iesu ghe auliaa teela vaalua aue la tturuu eJerusalem

(Mat 24:15-21; Mak 13:14-19)

20 “Nau eteva am tara eJerusalem tau niaiuvi etoa angila taatalieinia, aue am kila va eJerusalem nauna ange kalakalaala va la tturungia. 21 Tale ia o nau eteva, aJiudia ngatoa am tani ilou sae tale motouru, me see atoa elome eJerusalem am kupi ghoa me am ilou. Me see atoa am tokatoka tale paa ngutana, karika am mene kupi sso eJerusalem. 22 Poli nau tani ghaa aipolipoli tale sesa gheeleiaaira aJerusalem atoa me voto laghe piti elokoila tale Uru ngai Manga ateva ange lutula. 23 Alousiusi ta lo atoa vause la kakkaai me lo atoa la sussu. Poli namungaili voto sesa tale ia o masaliki eteae, me sessaiaane God aue toka tale isaa o taumattu. 24 Katoa aue la uvi ematela tale iema matakerengana, me katoa aue la ghaaila nongina karavusu etoa tani lao tale kasina anua ativuu etoa, me aue anua ativuu etoa la asa tau sio eJerusalem lomosina ta nauira ekapa.

Maemaeaane Natuna ateva Taumattu ngateva

(Mat 24:29-31; Mak 13:24-27)

25 “Aue niaimatootongana aue elutu tale sinaka ateva me ulana ateva me katto atoa. Tale kosa ateva, taumattu tale anua atoa aue la matautu me karika aue la alomasaanga tale lingi niaangarina manu eteva me ghagga ateva. 26 Me taumattu aue nnangaili me la matautu poli la kila va voto sesa ange maemae tale kosa akapa ateva, poli God aue aisiisia voto atoa elomarase. 27 Tale ia o nau eteva aue la tara Natuna ateva Taumattu ngateva esio tale urukookoo tee sarasarakaniaane me kinatama mallangina ateva. 28 Nau isaa o voto etiuaa tani lutu, am tingina sae me am masimasi, poli nauna Vau ngepona tani asaangiem ange akalakalaala.”

Kiukiu niaimatoonga tale fig ateae

(Mat 24:32-35; Mak 13:28-31)

29 Me Iesu ghe mene auliaala kateae kiukiu niaimatoonga, “Am tarala fig ateae me mene kasina tana ai. 30 Nau eteva utara ange vubbuleaa uruna, angu kilala va masi nau tale sinaka ateva ange kalakalaala. 31 Liuna avalua o me nau eteva utara isaa o voto ange lutulutu, aue ukila va maemaeaane Natuna ateva Taumattu ngateva nongina kingi ange aakalakala.

32 “Aghaulia ngakoronna etaimim va ia oia vitu eteva karika poi aue kapa me isaa o voto aue lutu. 33 Epona liu me kosa ateva aue lalu kapa, me inangarighi eteva karika poi aue kapa.

34 “Am tani taatara amasina. Am rau mene laa ropi see sesa manu va am veeveena, me am rau mene anna voto tale kosa ateva, ta erau egheleiem va am katuu, me aue am soghiaa nau eteva erekata, 35 nongina am nannaa va karika aue mae. Isaa o voto aue lutu tale taumattu ngakapa atoa la tokatoka tale kosa ateva. 36 Nau ekapa atoa am anguu taatara me am looloo sae va aue am sarasarakana tani saanga tale isaa oia voto ange anna tani lutu, me am rooroo tani tingina emua ta Natuna ateva Taumattu ngateva.”

37 Ella Iesu ghe aapasungaa tale ale manga ateva, vara elo alai ghe sae asoaso tale motouru eteva eOliv. 38 Vara elue talau poopooa, taumattu ngakapa atoa laghe maemae tale ale manga ateva tani nongoa.

Copyright information for `EMI