Philippians 1

Angalua Pol me Timoti, kapuna tau ngai uungu iengalua Iesu Karisto,

angalu pitipiti atu etaimim akapa lo atoa taumattu manga am ta Iesu Karisto ePilipae tee elda me rikina atoa.

God Tamaita ia me Vau ngepona ateva Iesu Karisto lalu tau aatu maamasinaairarua me luei etaimim.

Nikaili emasinaaili me nilooloo sae

Akaakaili emasina ta kapughu Goto ateva nau ekapa atoa nau aghannainam. Tale isaa akapa uneghi nilooloo sae mausiimim akapa, alooloo sae tee nimasimasi poli niaighui me niuungu am ghelei tale masi kiukiu ghe tiuaala tale aitiutiu eteva nau me ange mae ghaa sio nau oia. Aghaatoka tuutulighi va, lo ateva ghe tiuaala masi niuungu etaimim aue ghelei isaa o niuungu lomosina ta elaa ruu ta nauna ateva Iesu Karisto.

Karika sesa etaghi tani ateatea ia o salana atikirighi mausiim akapa, poli aghaielousieinam tale urunguitanighi. Arova la iriiri etokaieghi tale sene o agheelei kotokoto me aghaulia va koronna masi kiukiu, am akapaaili me aghi, ita ghaaghaa niparruu tale maamasinaane God. God erooroo tani aulia ngaotu vaalua aghannaaili ekapaiem tee ailousiaane ateva Iesu Karisto.

Me uneghi nilooloo sae mausiimim isaa avalua toko, va aielousiaaimim aue epinosa me eoroi tale nialomasaanga, me tale ninanna masalike tale niaielousi etaimim, 10 va am tara kila saa llo voto masina me raarangisana me karika righi voto sesa etaimim lomosina ta nauna ateva Karisto, 11 me aue am pasu tale uene voto ghulughuluena ekasukasu ta Iesu Karisto, tale niasaesae me nikkaua ta God.

Unna sene Pol ghe akasukasula masi kiukiu

12 Isaa oia aghanna, kapughu etoa, va am kila va saa llo ghe lutula etaghi ghe aisausiaala tani akasukasu masi kiukiu. 13 Tale isaa o voto me soldia ngakapa atoa la aitoia tanganue Siisa me mene katoa taumattu la kilakila va atokatoka tee sene mausi Karisto. 14 Me poli isaa o sene etaghi, me oroi ila lo atoa kapuita laghe asarasarakanailala ta Vau ngepona ateva laghe tam matautula tani ppooa inangari.

15 Koronna va katoa la poppooa Karisto tale nisessaia tani tau sio ararighi eteae me uungua niaittaraaii. Mene katoa la gheelei tale masi ninannaa. 16 Kateva uta taumattu laghe gheelei tale niaielousi poli la kilakila va atokatoka oia mausi tani aippooa kotokoto tee masi kiukiu. 17 Mene kateva uta taumattu la poppooa Karisto ta la nnainila nonga, karika va tale masi ninanna. La nim anna tani ghelei teeieghi voto sesa nau atokatoka tale sene.
1:16-17Katoa uru ngai laghe pitila, laghe piti emuemuela ves 17, me emulina ves 16.
18 Me isaa o voto vaalua malloeane? Tani voto ateva masinaaili ia, ia avalua toko: va tale saa ase salana arova kamena o koronna me la poppooa Karisto. Tale isaa o voto me amasimasi.

Ue, anim toka masimasi
19 poli akilakila va tale kaluimim nilooloo sae, me tale nisausi kanna kapuna Spiriti eteva Iesu Karisto, saa llo voto ghe lutula etaghi, aue gheleieghi me asaanga. 20 Tale nannaaghi aghaloanaaili va tale saa ase salana, erau mene ghelei epalataieghi, me anim sarasarakana tani apasunga Karisto tale vilikighi, arova amaulue o amate. 21 Ta ngetaghi, tani toka aue atoka ta Iesu, me tani mate aue aghaa masi voto. 22 Arova maamauluaaghi emene toka tee lao, malloeanina va aue uunguaaghi etue uene mane, me ta ngetaghi tani ue va ea alao karika akilakila. 23 Aghainanga teeilalua ilalua o salana aluekiri. Aghanna tani kasu, me alaa toka tee Iesu, poli emaamasinaaili evalua o. 24 Me mausiimim me emaamasina va atoka. 25 Liuna avalua o me aghaiesoa ngasarasarakanaaili va aue amene toka aitaua ngakapa teeiem me aikaaiaaimim me masimasiaaimim aue namuu. 26 Liuna avalua o me nau amene toka teeiem, masimasiaaimim ta Iesu Karisto aue epasu esassanga mausighi.

27 Marova saa ateva elutu, am toka me am kasu nonga tale masi kiukiu kanna Karisto. Arova amae taraiem o anim nongoam, aue akila va am tiitingina akorokorongana tale kateva nonga spiriti, me ekaakateva iem tale ninanna me niuungu va mene katoa la aikaaia tale masi kiukiu. 28 Me karika aue am matauta lo atoa la sessa teeiem tale voto la gheelei. Eaimatootongana etaira va, aue la turungila me am aue am saanga. Isaa o voto God aue ghelei. 29 Poli God ghe nim tau aatu sio etaimim mausi Karisto, karika va tani aiesoa nonga etana, ta tani sau maate aitaua teeia. 30 Am tee ngam laolao tale isaa o ase maamaatana me am ghe taraieghila ta aghe ghaala, me isaa oia am nongonongo va aghaaghaa.

Copyright information for `EMI