a14:11 Ko 12:31, 14:39; 1 Te 5:20
b14:5Nam 11:29
c14:15Ep 5:19
d14:161 Ktl 16:36; Wee 106:48; 2 Ko 1:20
e14:19Lo 15:2
f14:20Mt 10:16; Lo 16:19; Ep 4:14; Pl 3:15
g14:21Ais 28:11-12
h14:23Ap 2:4,13
i14:24Jo 16:8
j14:25Ais 45:14; Sak 8:23; Jo 4:17-1
k14:261 Ko 12:8-10; Ep 4:12, 5:19
l14:29Ap 17:11; 1 Te 5:21
m14:331 Ko 11:16
n14:34Jen 3:16; 1 Ko 11:3,9; 1 Ti 2:11-12; Ta 2:5; 1 Pi 3:1
o14:351 Ko 11:5
p14:371 Ko 2:16, 7:40; 1 Jo 4:6
q14:40Kl 2:5

1 Corinthians 14

Pii tata waka mendepale lenge dokopa Gotenya pii panao lamaingi dokopa

Nyakamame a  auu kaenge mana doko watao minao kalyepape. Oli Sipitisame epe dingi dupa nyowani kayao katao Gotenya pii panao lamaingi mana doko nyepawanimi kumao kalyepape. Doko, endakali mendeme pii tata waka mendepale dupa lelyamo dokome endakali dupa pii lamaiya naenge. Daa, baame Gote pii lamaingi. Doko, endakali mendeme baanya pii doko aipa lelyape lao nasingi. Baa Oli Sipitisame sakatasilyamopa baame pii yalo petae dupa lenge. Dopaka doko, Gotenya pii panao lamaingi endakali dokome pii lamailyamopa pii dokome endakali dupa kyoto injisoo, mona sakatasoo, mona lyuu lasoo pingi. Pii tata waka mendepale dupa lenge endakali dokome baa tange kyoto injisingi. Dopaka doko, Gotenya pii panao lamaingi endakali dokome sosanya endakali dupa kyoto injisingi. Nabame b  nyakama pitakame pii tata waka mendepale dupa lapimi laka lao masilyo. Dopaka doko, nyakamame Gotenya pii doko panao lamaipimi laka lao etete mupa joo masilyo. Pii tata waka mendepale latamo endakali dokome sosanya endakali dupa kyoto injisina lao kapilyala nayatamo kandao doko, Gotenya pii panao lamaitamo dokome pii tata waka mendepale latamo doko ita minata.

Dopana, kaimia paluma, namba nyakama katatamisa ipato dokopa nambame pii tata waka mendepale mende lato kandao doko, nambame aipa petala nyakama nisotope? Goteme namba opale laitaka pita mende tamopi, masingi pii mendapua tamopi, Gotenya pii mende tamopi, mana pii mende tamopi, nyakama langya nayato kandao doko, nambame kapa pao nyakama nisala nayato. Ema napingi pulupapupi gitaa jepaepi dupanya mana mendai dopaleaka singi. Pulupalu lataminopapi gitaa pyataminopapi mende pyoo lata lata napinya mendai dopaka pyoo latamo kandao doko, aipa petala endakali mendeme wee ongo lalumu ongo lalumu lao setape? Dee endakali mendeme wii auu pyoo nalatamo kandao doko, apimi yanda pyaa paanya baa depa latape? Dokotekee joo nyakamame pii tolao nalatamino kandao doko, endakali mendeme aipa petala nyakamanya pii doko dopa lalumino lao setape? Daa, nyakamanya pii doko mee yuu kaina lao yakinatami. 10 Isa yuu angenya pii tata dupa longo singi. Dee pii dupanya tenge nakatenge mende sala naenge. 11 Dopaka doko, endakali mendeme pii latamo doko nambame nasoto kandao doko, baame namba yuu waka tange mende lamo lao maseta. Dee nambame apata baa yuu waka tange mendeaka lamo lao masoto. 12 Nyakamame dopaka pyoo Oli Sipitisame epe dingi dupa nyowani kaelyamino dokonya, epe dingi sosa kyoto injisepenge dupa nyakamame etete auu pyoo minamana lao masetala minao kalyepape.

13 Dopana, pii tata waka mendepale lenge endakali dokome pii dokonya tenge dupa kapilyalanya Goteme baa kapa pisina lao loma sepenge.

14 Nambame pii tata waka mendepale mende lao loma soto kandao doko, mendeme namba lungu pitamoli pyoo dopa lao loma sotoaka doko, nambanya mona doko mee palita. 15 Dopana c  nambame aipa pitope? Mendeme namba lungu pitamoli pyoo loma sotoaka doko, nambanya mona dokome apata loma soto. Mendeme namba lungu pitamoli pyoo lalyoo wee latoaka doko, nambanya mona dokome apata lato. 16 Doko, d  mendeme emba lungu pitamoli pyoo embame pii waka lao Gote tama pitino kandao doko, mana nanyingi endakali mende pititamo dokome aipa petala embame tama pitino dokonya kiniaka latape? Embame lateno doko aipa leepe lao baame naseta. 17 Embame auu pyoo tama pitinoaka doko, dokome endakali dolongo kyoto injisala nayata. 18 Nyakamame pii tata waka mendepale dupa lelyaminopapi nambame nyakama pitaka ita minao lenge dokonya nambame Gote lao yaka pilino lelyo. 19 Dopaka e  doko, losuu lao kambu pingi dokonya nambame pii tata waka mendepale lenge dupanya taosene kingi ita mende lato doko kuki epeaka doko, endakali dupa mana lamaiyanya nambanya moname masoo pii kaki yuungi iki lato doko etete epena lao masilyo.

20 Kaimia f  paluma, nyakamame nyakamanya masingi dokome wane koo joo nakalyepape. Dopa napinya, nyakama mana koo dupanya wane ŋaŋa mandipae joo kalyepape. Dopaka doko, nyakamanya masingi dokome endakali angi joo kalyepape. 21 Pii g  pepa pyapae singi dokonya,

“‘Pii tata waka latamipi endakali tata waka dupanya kambu dupanya-kaitapi nambame endakali dakaita pii lamaito.
Dopa pitopaka doko, dupame nambanya pii nasetamina,’ Kamongo Goteme lea-pyaana,” lapae silyamo.
22 Dopana, pii tata waka mendepale lenge mana doko masoo minala naenge endakali dupame kandatala masina lao dupa kandao kongali pingi. Masoo miningi endakali dupa kandao daa. Dopaka doko, Gotenya pii panao lamaingi doko masoo miningi endakali dupame kandatala masina lao dupa kandao kongali pingi. Masoo naminingi endakali dupa kandao daa.

23 Dopana, h  nyakama sosanya endakali dupa pitaka kambu pyatala nyakama pitakame pii tata waka mendepale dupa lataminopa mana nanyingi endakali mendapua tamopi masoo minala naenge endakali mendapua tamopi ipao kolandatamino kandao doko, dupame nyakama kyekelyaminona nalatamipi? 24 Dopaka i  doko, nyakama pitakame Gotenya pii doko panao lataminopa masoo minala naenge endakali mendepi mana nanyingi endakali mendepi ipao kolandatamo kandao doko, nyakama pitakanya pii dokome baanya mona dokonya yandateme pili petala nyakama pitakanya pii dokome baa yapata. 25 Dee j  baanya monanya yalo petae singi doko panatamopa baa tombauli sepala Gote tama pyoo lao pituu, “Kini, Gote nyakama-pipa awapa kalyamona,” lata.

Losuu lao kambu pingi dokonya pitamino dupa pitaka tolao pyepapena leamo doko

26 Dopana, k  kaimia paluma, nyakamame aipa pipengepe? Nyakama losuu laanya kambu pyatamino dokopa nyakamanya mendeme wee mende latamopa, mendeme mana pii mende latamopa, mendeme opale Goteme baa laitaka pita mende latamopa, mendeme pii tata waka mendepale mende latamopa, mendeme pii dokonya tenge doko kapilyeta. Dopa pitamiaka doko, utupa pitakame sosa doko kyoto injisalanya pipenge. 27 Endakali mendapuame pii tata waka mendepale mende latamino kandao doko, endakali lapo tepopi mendeme iki lapenge. Dopaka doko, teponya ulutena pyakalyoame nalapenge. Mendeme latatamopa mendeme lata pipenge. Dee endakali mendeme pii doko kapilyeta pipenge. 28 Dopaka doko, kapa pao kapilyepenge endakali mende nakatatamo kandao doko, losuu lao kambu pingi dokonya baa kambu piti petala, baa tange moname lata Gotepa lata pipenge. 29 Dee l  Gotenya pii panao lamaingi akali lapo tepopi mendeme pii lamaipenge. Dopa pitaminopa pii setamino dupame aipa pyoo lelyamipi lao yapapenge. 30 Dopaka doko, pii soo pititami dupanya mende Goteme pii mende maitamo kandao doko, pii lamaiyoo katatamo doko pii lao yatu lapenge. 31 Endakali pitaka mana nyowapi mona sakatawapi pina lao nyakama pitakame Gotenya pii doko mendeme lamaita pitamopa, mendeme lamaita lamaita pyoo lamaipenge. 32 Dee Gotenya pii panao lamaingi akali dupame pii panao lamaingi mana doko isingima. 33 Doko, m, n  kyakalya kyakana pyoo lalya lana pingi mana doko Goteme sakatasala naenge. Daa, mona paliuu mana tolao miningi doko baame sakatasingi.

Sosa kalyamo dupa pitakanya Gotenya endakali dupanya mana singili pyoo losuu lao kambu pingi dokonya enda dupame nengekaita lyokapenge. Dupame pii lamaiya nayapenge. Moseseme pii pepa piamo dokonya lapae silyamoli pyoo enda dupa pundipundi joo pitipenge.
35 Enda o  dupame opale mende mana nyemana lao masetamino kandao doko, andaka nyakamanya akalingi dupa pisepenge. Doko, losuu lao kambu pingi dokonya enda mendeme pii lelyamo doko elya pingi.

36 Aa! Gotenya Wai Pii Epe boko nyakama-kisa katao sakateape? Pande, pii doko nyakama-kisa iki epeape? 37 Endakali p  mendeme baa Gotenya pii panao lamaingi akalina lao masowapi Oli Sipitisame epe maita mende baa-kisa silyamona lao masowapi pitamo kandao doko, dopa pitamo endakali dokome nambame pepa pyao peekelyo pii dutupa Kamongome mana setea mende lamo lao masepenge. 38 Dopaka doko, baame dopa lao masala nayatamo kandao doko, Goteme baa masala nayataka.

39 Dopana, nambanya kaimia paluma, Gotenya pii panao lamaingi mana doko nyowani kayao kalyepape. Dee pii tata waka mendepale lenge mana doko nyakamame nee nyala nayalapape. 40 Nyakamame q  pitamino dupa pitaka auu pyoo tolao pyepape.

Copyright information for `ENQ