a5:1Lep 19:32; Ta 2:2
b5:5Lu 2:37, 18:7
c5:6Pa 3:1
d5:10Jo 13:14; Ip 13:2
e5:111 Ko 7:8
f5:141 Ko 7:9; Ta 2:8
g5:171 Ko 16:18; 1 Te 5:12
h5:18Dit 25:4; Mt 10:10; Lu 10:7; 1 Ko 9:9; 3 Jo 8
i5:19Dit 19:15; Mt 18:16; 2 Ko 13:1
j5:20Ga 2:14; Ep 5:11
k5:25Mt 5:16, 10:26

1 Timothy 5

Endakali tolasingi mana epe doko

Embame a  akali lyanga mende puu lao pyalanya laa naenya, takange mana lamaingili pyoo mana lamaipi. Kolele dupa kaiminingina lao masoo, enda wambake dupa endangina lao masoo, kolele dupa pimalengena lao masoo, etete tolao pyoo katao mana lamaiyoo pyoo katape.

Enda walyakae dupa kandao leamo doko

Embame enda walyakae tapuita napetenge dupa andanda semaipi. Dopaka doko, enda walyakae mendenya wane tamopi aputingi tamopi katengema tamo kandao doko, dupame wambao dapa pyoo mana nyepenge: nyakama Gote minao katao endangi takangepi dupame wamba nyakama nisiamino dokonya yanu pyao nisokondape pitamino mana doko Goteme auu kaenge. Enda b  walyakae tapuita napetenge mendeme baa iki pitipala, Goteme baa nisetana lao masetala kuka kotakapi tee lao loma soo petenge. Dopaka c  doko, enda walyakae tangeme masilyali pyoo luiyao paenge doko lete petelyamopapi baa kumapae joo petenge. Enda walyakae dupa-kisa tenge mende nasina lao embame pii utupa mana lao lamaipi. Endakali mendeme baanya puu dupapi, dee angi baa palu dupapi, dutupa nisala naenge dokome Gote lao masoo minala nayao maita maingi. Dopa pilyamo dokome baa etete koo joo netesa endakali dupa-pipa kapa napenge.

Enda d  walyakae ee kana kingi ita tokange napetenge dupanya kenge nyoo setakamaiya nayape. Ee kana kingi ita tokange pitipae, wamba akali mendainya iki peteapi, mana epe miningipi, wane mondo pingipi, endakali opone miningipi, Gotenya endakali dupa auu pisingipi, endakali kenda pipae nyoo katenge dupa nisingipi mana epe dupa pitaka watao minawaka petengena lao kenge singi enda dupanya kenge nyoo setakamaipi.

11 Embame e  enda walyakae kolele dupanya kenge setakamaiya nayape. Dupame akali nyowani kaelyami dokome Kataisa yakinatala akali pupuma laka lao masingima. 12 Dopa petala enda dupame nyakamanya pii wambao lanya seteamino doko nepelyami dokome pyalanya pyoo lamaipenge jingima. 13 Dee mana koo dokonya konda pyoo enda walyakae kolele dupame anda lyaa dii lao payao kalai napyoo mee pitimana lao mana nyingima. Dee dupame mee napituu, pii nambonambo pyoaka, wakamanya dupanya tipa-tipa pyoo payao pii nalapenge dupa lao paengemaka. 14 Dopana, f  enda walyakae kolele dupame akali pupala wane mandyuu nyakamanya palu dupa isipimi laka lao masilyo. Dopa pitaminopa yandapipi mende naima kandao pii koo lenge kaitini mende naseta. 15 Yangi dupame mana epe dupa yakinatala Satane watao patelyamino. 16 Masoo miningi enda mende enda walyakae-pipa petenge tamo kandao dupa tange nisepenge. Dopana, enda walyakae tapuita napetenge dupa sosame nisalanya kenda nakaena lao dopa pipenge.

Isingi akali dupa kandao leamo doko

17 Isingi g  akali kalai auu pyoo pingi dupa nyakama sosa dupame eteteaka andanda semaipenge. Kiningi nyakama kandao etete kyoto joo pii manapi langyuu kalyamino dupa etete andanda semaipenge. 18 Doko h  Gotenya pii pepa pyapae singi dokonya dapa lapae silyamo: “Embame mena pulumakao wiisa dii moko katao tambelyamo dokonya nengekaita doko yaki pyoo tambombala nayape.” Dee, “Kalai pingi akali mendeme baanya yole nyalanya kapa pengena,” dopa lapae silyamo. 19 Endakali i  mendeme isingi akali mende-kisa tenge setea kandeno doko, embame mee ambe nasepe. Endakali lapomapi dee tepomapi mendatupame lengeme kandatala laa ipatamino dokopa embame sepe. 20 Isingi j  akali koo pyoo paenge dupa embame endakali pitakanya enombanya pyalanya lape. Isingi akali waka dupame sepala paka kaena lao dopa pipi. 21 Gotepi, Kataisa Jisasapi, dee enjele Goteme yapao nyiamo dupapi dutupanya enombanya nambame emba langyokondape pyoo langilyo. Embame kalai mende pyaanya emba tangeme wambao maseteno dokonya pyaa nayao, mana pii dutupa auu pyoo kandao minao katape. Embame mende kandao mende peta mende kandao mende peta pyoo opale mende napipi. 22 Akali mendeme Gotenya kalai pina lao embame aiyomba yapa minani pyakamaiya nayape. Endakali waka dupanya koo pingi dupa embame mokosoo nyala naenya, koo mende emba-kisa nasina lao isoo katape.

23 Embame mee endaki iki nao nakatenya embanya ingi dokopa dee emba paa longo lao yaina nyingi dokopa dolapo lao masetala, waene kuki mende napa pipi.

24 Endakali mendapuanya koo pingi dupa wambao panelyamopa naimame yapa yapenge. Dopaka doko, endakali mendapuanya koo pingi dupa yalo petala maitakao panenge. 25 Epe k  pingi dupa dopaka pyoo panengeaka. Panala naenge dupa tanga kapa pao yalo petae naseta.

Copyright information for `ENQ