a5:1Ais 38:12; 1 Ko 15:44-49; 2 Ko 4:7; Pl 3:20; Kl 3:3-4; 2 Pi 1:13-14
b5:2Lo 8:23; 1 Ko 15:51-53
c5:41 Ko 15:53-54; 1 Te 4:15
d5:5Lo 8:16,23; 2 Ko 1:22
e5:6Ip 11:13-16; 1 Pi 1:17
f5:7Lo 8:24; 1 Ko 13:12
g5:8Pl 1:21-23
h5:9Kl 1:10; 1 Te 4:1
i5:10Mt 16:27, 25:19,31; Jo 5:27; Lo 14:10; Ip 11:6
j5:112 Ko 4:2
k5:122 Ko 3:1; Pl 1:26
l5:14Lo 5:15, 6:4-11, 8:32
m5:15Lo 6:11, 14:7-9; 1 Ti 2:6
n5:16Lo 1:3, 9:5
o5:17Ais 43:19; Mt 9:16; Lo 8:1,10; Ga 6:15; Ep 2:10; Ip 8:13; Pa 21:5
p5:18Lo 5:10; Kl 1:20
q5:19Jo 3:17; Lo 3:24-25; Kl 1:19-20
r5:20Ep 6:20
s5:21Ais 53:5-8; Jo 8:46; Ap 3:14; Lo 8:3; 1 Ko 1:30; Ga 3:13; Pl 3:9; 1 Pi 2:22,24; 1 Jo 3:5

2 Corinthians 5

Indupa a  naima isa yuu angenya kalyamano aiyaa anda dake lakyetamo kandao doko, naima katatama anda angi doko kaiti-kisa katekelyamona lao masilyamano. Anda doko Gote tangeme petae. Endakali kingi mendeme daa. Anda doko tanga tangapi kalyu katata. Indupa b  kalyamano angepa naima mona ŋee lao katao naimanya anda kaiti-kisa kalyamo doko yonge pee joo pee pyuwanimi kumilyamano. Naima doko pee pyoo katatamano kandao doko, mee nakatatama. Kini, c  naima aiyaa anda dakenya katapumano dokopa tanda nao mona ŋee lao kalyamano. Doko, naimame anda dake yakinatama daa. Naima naimanya anda kaiti-kisa kalyamo dokonya kolandatamanopa lete katenge dokome naimanya kumingi doko etete etasalakao etasipya laka lao masilyamano. Naima-kisa d  dopa pina lao Gote tangeme naima depa lasetea. Dee baame naima opale maitakao ditamo dupa kiningi ditona lao makande pyoo wambao Oli Sipitisa doko ditia.

Dopa e  piamopa naima koteaka lao mona kyoto joo kalyamano. Naima anda dakenya katapumano dokopa naima Kamongo-pipa awapa nakalyamanona lao masilyamano. Doko, f  naimame baa lengeme kandao nakalyamano. Baa lao masoo minao kalyamano. Dopaka g  doko, naima mona kyoto joo kalyamanona lao nambame latelyo. Dee naimame anda naima kalyamano dake yakinatala pao Kamongo-pipa awapa katatamano kandao doko, etete epena lao masilyamano. Dopana, h  naima baa-pipa awapa katatamanopi angenya katatamanopi doko baame auu kaenge mana dupa naimame minamana lao masingi. 10 Doko, i  naima pitaka Kataisame yapena lao baanya enomba dokonya katapenge. Naima isa yuu dakenya kalyamano dokopa naima mendai mendai lawame mana koo epepi minatamanoli pyoo yole nyepenge dokonya dopa pipenge.

Endakali dupa Gotenya mona setenge injisakamaipenge kalai dokonya leamo doko

11 Dopana, j  naimame Kamongo masetala paka semaiyoo katao endakali dupanya masingi doko aloo pisakamaiyoo kalyamano. Goteme naima kandapaena dee nyakamame nyakamanya mona dokome apata naima masipimi laka lao nambame masilyo. 12 Naimame k  nyakama pii langilyamano dake nyakamame naima dee lalyalapale lao daa. Nyakamame naima kandatala nyakama luiyalapale lao kaitini mende nyakama dilyamano. Mona andaka aipa pyoo kalyamape lao masoo luiyala naenya mee ketae yonge kandao luingi endakali dupa kandao nyakamame lamaipenge pii dupa nyakama-kisa sipya laka lao naimame masilyamano. 13 Kini naima kyekeamape? Doko, Gote lao masetala kyekeama. Kini naima mona paliuu kalyamape? Doko, nyakama lao masetala mona paliuu kalyamano. 14 Doko, l  Kataisame naima auu kaenge dokome naima kalai pyepale lao sakatasingi. Kini, naimame dapa lao masilyamano: akali mendeme naima endakali dupa pitaka alo pyoo kumatea. Dopa piamo dokonya naima pitaka kumateama. 15 Baame m  naima pitaka alo pyoo kumiamo doko naima endakali kalyamano dupa deaka naima tangenya joo kalya naenya, baanya itata kalyepale lao baame naima alo pyoo kumapeamopa Goteme dee sakatasia.

16 Dopana, n  endakalimi endakali mende yapao kandenge kaitini dokonya naimame endakali mende deaka yapala naenge. Kini, wamba naimame kaitini dokonya Kataisa yapeamanoaka doko, indupa naimame baa deaka dopa napilyamano. 17 Dee o  endakali mende Kataisapa pakatae kalyamo doko, baa enenge. Kandeleno! Wambatae dupa etapala enenge dupa sakatatelyamo. 18 Gote p  baame dutupa pitaka pia. Naimame Gote yandapipi joo kateamanopa Kataisa mambele baame naima mona setea. Dee naimame endakali waka dupa baanya mona setenge injisakamaipenge kalai doko baame naima dia. 19 Doko q  dapa: Kataisame kalai piamo dokome Goteme yuunya endakali dupa pitaka mona setao katea. Endakali dupame koo pingi dokonya baame yanu nanyetona lao masoo katea. Dee baame endakali dupa baanya mona setenge injisiamo pii doko naimanya kingilyaka setea.

20 Dopana, r  naima Kataisanya enomba joo katenge. Naimame nyakama pii kongo lao langingi doko Gote tangeme langilyamosa pingi. Naimame Kataisanya panda nyoo katao nyakama Gotepa mona setao kalyepa nalepe lao masoo katenge. 21 Akali s  koo nasingi doko naima alo pyoo Goteme baa koo singi akali injisia. Baame naima akali dokopa pakatala, naima tolataena latae endakali katatamina lao baame dopa pia.

Copyright information for `ENQ