a7:2Ap 20:33; 2 Ko 12:17
b7:2-32 Ko 6:12-13
c7:4Kl 1:24
d7:52 Ko 2:13, 4:8
e7:62 Ko 1:3-4, 2:13, 7:13-14
f7:71 Te 3:6
g7:82 Ko 2:1-4; Ip 12:11
h7:10Mt 27:3-5; Ip 12:16-17
i7:122 Ko 2:3,9, 7:8
j7:152 Ko 2:9
k7:162 Te 3:4

2 Corinthians 7

Mona setenge paluma, Goteme dopa pitona leamo pii dutupa pitaka naima kandao lea-pyaa. Dopana, naimame naimanya yongepi imambupi koyasetamo dupa pitaka kunao nepamana. Naimame Gote andanda semaiyoo katao etete epe joo payamana lao masoo katamana.

Polo mona epe palyiamo dokonya leamo doko

Nyakamame a, b  naima mona salapape. Naimame nyakamanya endakali mende koo pingyala nayama. Mende minao koyasala nayama. Dee mende minakasala nayamaka. Nambame dopa lelyo doko, nyakama-kisa tenge peyao nalelyo. Doko nyakama naimanya mona itange etetena latelyo. Nyakama kumatamino doko, naima awapa kumatama. Nyakama katatamino doko, naima awapa katatama. Nambame c  nyakama kapana lao masokondape pilyo. Nambame nyakama lao masetala etete luilyo. Naima-kisa kenda pipae epelyamo dupa pitakanya namba mona yaepao mona etete epe palyoo katenge.

Wamba d  naima Masetonia yuu dakenya ipao kateamano dokopa apata naima kukipi mende mee kalya nayama. Daa, kenda pipae tata tata dupa pitaka naima-kisa epea. Endakali waka dupa-pipa laiya lao naimanya mona andaka paka kayao pyoo kateama. Dopaka e  doko, mona kenda kaelyami endakali dupa mona epe palisingi Gote dokome Taitesa baa naima kateamasa epeamo dokonya-kaita baame naima mona epe palisia. Baa f  epeamo dokonya iki mona epe palyala nayama. Daa, baa nyakama-pipa kateamino dokopa nyakamame baanya mona epe palisiamino doko baame naima langiamo dokome apata naima mona epe palyiama. Taitesame naima langyuu, nyakamame namba etete kandapuma laka lao masoo, mona andao namba watao katamana lao kyoto joo masoo kalyaminona lao langia. Dokonya namba eteteaka mona yaepeo.

Nambame g  nyakamanya pepa mende pyao peekeo dokome nyakamanya mona minao kenda pisiana lao masilyo. Dopaka doko, nambame dopa napyuu naenya lao masala naelyo. Kini wamba nambame pepa pyao peekeo dokome kuki mende nyakamanya mona minao kenda pisiamo doko kandatala nambame dopa napyuu naenya lao masio. Dopa lao masiwaka doko, indupa nambame taeme piona lao masetala mona yaepelyo. Nambame nyakamanya mona minao kenda pisio dokonya namba mona yaepala naelyo. Daa, nyakama mona kenda kayamino dokome nyakama mona kapilyiamino dokonya namba mona yaepelyo. Doko, Goteme mona kenda kayapimili lao masiamoli pyoo nyakama mona kenda kayami. Dopana, naimame opale mendenya nyakama koyasala nayama. 10 Doko h  Goteme mona kenda kayapimili lao masingili pyoo mona kenda kaenge dokome naima endakali dupa mona minao kapilyetala pyoo nyepae kalyepale lao katasingi. Dopana, endakali mendeme dokonya mona kenda nakayapenge. Dopaka doko, yuunya endakali dupame mona kenda kaengeli pyoo mona kenda kaenge dokome etete koenge doko sakatasingi. 11 Goteme mona kenda kayapimili lao masiamoli pyoo mona kenda kayamino dokome nyakama-kisa mana tata tata epe dupa sakatasiamo doko nyakamame masalapape. Dopa piamo dokome nyakamame mana tolao minawani kayao kateami. Dopa pyoo iki kalya naenya nyakamame nea kayao nyakama-kisa pii siamo doko yanu pyamana lao masiami. Dee nyakamame mana koo dupa etete maka kayao kateami. Dopa pyoo iki kalya naenya nyakama paka kayao kateami. Dee nyakamame naima kandatapuma laka lao masoo naima watao payawanimi kumao kateami. Dee nyakamame kyoto joo kateami. Dee nyakamame kenda pipae siamo doko auu pyoo tolasalanya pyoo kateamiaka. Nyakamame dokonya piamino dupa pitakanya nyakama-kisa tenge mende nasilyamona lao laitaka piami. 12 Dopana, i  nambame pepa pyao peekeo doko akali koo piamo dokopa dee baame akali mende koo pimaiyamo dokopa dolapo lao masetala pyao peyakala nayo. Daa, nyakamame naima watao payawanimi kumao kateamino doko Gotenya enomba dokonya nambame nyakama laitaka pyaanya pepa doko pyao peekeo. 13 Nyakamame dopa pyoo kateamino tenge dokonya naima mona epe palyoo kateama.

Kini, naima mona epe palyoo kateamanoaka doko, nyakama pitakame Taitesanya mona minao auu pisetakamaiyaminopa baa mona yaepao kateamo dokonya naima eteteaka mona yaepeama.
14 Nambame baa lamaiyoo nyakama lalyio dokonya namba elya sala nayo. Naimame pii nyakama langiamano dupa pitaka kiningi. Mendai dopaka pyoo naimame Taitesa lamaiyoo nyakama lalyiamano pii doko kiningi jiaka. 15 Taitesa j  baa nyakama kateamisa epeamo dokopa nyakamame paka kayao walu lao baa lanyiami. Dee nyakama pitakame baanya pii doko watao miniami. Nyakamame dopa piamino doko baame masepeta sepala nyakama mona setalakao setelyamo. 16 Nambame k  dupa pitakanya nyakama etete kapana lao masetala mona yaepao kalyo.

Copyright information for `ENQ