a2:1Dit 13:1-6; Mt 24:11,24; Lo 3:21; 2 Pi 3:3; Ju 4
b2:2Ais 52:5; Ap 9:2; Lo 2:24
c2:3Lo 16:18; 1 Te 2:5
d2:4Jen 6:1-2; Mt 8:29; Ju 6
e2:5Jen 68; Ip 11:7; 1 Pi 3:20; 2 Pi 3:6
f2:6Jen 19:24; Mt 10:15; Ju 7
g2:7Jen 19:1-16,29
h2:91 Ko 10:13; 2 Te 1:5-10; Ju 6
i2:10Ju 7-8,16
j2:11Ju 9
k2:12Wee 49:12-14; Ju 10
l2:13Ju 12
m2:15Nam 22:5,7; Ju 11; Pa 2:14-15
n2:16Nam 22:28-35
o2:17Ju 12-13
p2:18Ju 16
q2:19Jo 8:34; Lo 6:16-17
r2:20Mt 12:45
s2:21Ese 3:20; Lu 12:47-48; 1 Ko 11:2
t2:22Pot 26:11

2 Peter 2

Sambo mana lenge akali dupa

Dopaka a  doko, wamba Isataele kaina dupanya sambo potopesa dupa kateaminoliaka pyoo, nyakamanya kainanya sambo mana lenge endakali mendapua katatamiaka. Dupame sambo pii endakali koyasingi dupa waa katao latami. Kamongo dokome dupa sambapeamoaka doko, baa maita maitamino dokome dupa tange yapa koyatami. Endakali b  longome dupanya mana koo luiyapae dupa watao minatami. Dopa pitamino tenge dokonya minao endakali mendapuame mana angi doko kandao pii koo latami. Sambo c  mana lenge endakali dupame nyakamanya munipi opale putiti kayapakala, dupa tangenya masingi dupa lao panatala pake joo nyakatami. Dopaka doko, Goteme dupa yanu nyotona lao wamba waka depa lanya seteana, dupa koyasetamo doko luu palyapi mende naelyamo.

Wamba d  enjele mendapuame koo piaminopa, Goteme dupa katena lao kayala naya-pyaa. Baame dupa yuli koo etete iminjembatae dokonya anjinya palyia-pyaa. Goteme yapatamo gii doko malisoo anjetae palelyamino. Wamba e  Gote watao minala nayamino endakali dupa baame katena lao kayala naenya, endaki andake dupa dupa-kisa epena lea-pyaa. Dopaka doko, mana tolatae dokonya lao pii lamaiyoo katenge akali Noa dokopi dee endakali kalange dutupapi dutupa Goteme nisia-pyaa. Baame f  yuu taono Sotomapa Gomotapa dolapo-kisa tenge setapala yangeamopa tao etete kenai jia-pyaa. Goteme taono dolapo dopa piamo doko baa watao minala nayatamino endakali dupa-kisa dopa pitana lao makande pia-pyaa. Dokopa g  endakali dupanya mana koo luiyapae dupanya mona etete kendame kumao katenge akali epe tolatae Lote lenge doko Goteme pyoo nyia-pyaa. Doko, baa akali tolatae doko endakali dupa-pipa awapa kateaminopa dupame mana setapae yaleamino dupa kaleme sepa lengeme kandata petala koteaka lao baa monanya tanda nyoo katea-pyaa.

Goteme endakali koo pingi dupa yanu nyingina leamo doko

Gote h  watao miningi endakali dupa-kisa makande pingi mende epelyamo dokopa, Kamongo dokome kandatala pyoo nyingi. Dopaka doko, mana koo miningi endakali dupa Kamongo dokome kandatala, indupa pituu endakali yapapenge gii dokonya tuu lao tanda maingi. 10 Endakali i  yangimi nyakamanya yongeme pyuani kaenge dupa watao minao mana koo dupa auu kayapala, Kamongo doko kilya kandengema. Dopa pilyamino endakali dupa Goteme wambao masetala yanu nyingi. Sambo mana lenge dupame luiyawaka katao nyakamanya masingi iki watao minatala kaitinya enjele tii pipae singi dupa kandao lamba laanya paka nakaengema. 11 Enjele j  dupa-kisa pupu lapae silyamopa kyoto joo katao endakali dupa etete ita minao katengemaka doko, dupame Kamongonya enombasa endakali dupa lamba lao yapala naengema. 12 Endakali k  dupame mena yanapi mona napalenge endakalimi nyepala pyao kumasina lao matakaimi mandenge dopale joo yongenya mana watao minao katao angi dupa kapa pao masala nayao lamba lao katapala mena yanapi kumili pingima. 13 Dupame l  mana koo miniamili pyoo yanu pyao tanda nyetami. Dupame mona yaepenge doko kotakapi masetamali pipenge mendena latala, eteteaka mona yaepao yongenya iki masipimili pyoo nyakama-pipa nee napiminopa, dupame nyakama kaimala pyoo koyasilyamino. 14 Dupame enda kepo kolao paenge dupa kandapeta payao koteaka lao koo pipenge dupa kutilyamino. Endakali ŋeeŋee lapenge dupame koo pina lao andiki-andiki pyoo pyalya lao nyilyamino. Dupame endakali wakamanya oapi dupa nyoani kaenge doko mana nyepala masetae kalyaminona, tenda Goteme dupa etete watao pyata. 15 Dupame m  kaitini tolatae doko yakinatala kyakalya kyakana pyoo, akali Beo ikiningi Belamenya mana doko watao minilyamino. Belame dokome koo piamo dokonya yole nyalanya etete auumi kumia-pyaa. 16 Mena n  dongimi kapa pao pii laa naengeaka doko, dongi mendeme endakalimi lee pyoo Belamenya mana koo doko kandatala baa pyalanya lea-pyaa. Dopa petala dongi dokome potopesa Belame dokonya kyakaenge mana minalanya peteamo doko kaita lyokea-pyaa.

17 Endakali o  dutupa endaki lee kungi tuakatae dopalepi, kopa poo andakeme soo paenge dopalepi joo kalyamino. Goteme dupa yuu koo eteteaka iminjembatae dokonya pena lao depa lakamaiya-pyaa. 18 Doko, p  dupame luiyao pii tenge napalenge dupanya pii andake lengema. Dopa petala dupame kyakalya kyakana pingi mana dupanya wandinya nepala nayapengele endakali dupa andiki-andiki pyoo pyalya lao nyingima. Dopa petala endakalinya mona koo dokome mana koo luiyapae minawani kaenge dokonya nyoo pengema. 19 Dupame q  endakali dupa mokapae joo katenana latelyaminoaka doko, nyakama tange koyalanya anjetae joo katengema. Doko, mendita mendeme endakali mende ita minilyamo kandao doko, baa dokonya anjetae joo katenge. 20 Dupame r  naimanya Kamongo-kisa Pyoo Nyingi Akali Jisasa Kataisa doko masiamino dokome yuunya mana kaimala pipae dupa wandinya nepao pyakao pupala dee mana dupame pyalya minina lao katatamino kandao doko, wambao kopeta kateaminoaka doko, maitakao etete kopeta katatami. 21 Dopana s  mana tolatae kaitini doko dupame masala nayamili kandao doko, yaka jipyali. Doko, dupame mana tolatae kaitini doko masetala mana etete epe Goteme maiyamopa nyiamino doko dupame maita mailyamino. 22 Dupa-kisa t  mana ipatelyamo dokome kongali pii lapoma dalapo panelyamo: “Yaname myuku talyepala tange nenge,” dokopa “Menanya yonge epe doko pao lyongolyongo kuiyoo mandau pingi,” dokopa dolapo panelyamo.

Copyright information for `ENQ