a24:5Lu 23:2; Ap 16:20, 17:6
b24:6Ap 21:28-30
c24:11Ap 20:16, 21:17,26
d24:14Mt 15:17; Ap 9:2, 24:5, 25:8; Lo 3:31, 10:4
e24:15Jo 5:28-29; Ap 4:2
f24:16Ap 23:1,6
g24:17Lo 15:25-26; Ga 2:10
h24:17-18Ap 21:17-28
i24:192 Ti 1:15
j24:21Ap 4:2, 23:6
k24:22Ap 9:2, 23:26
l24:23Ap 27:3, 28:16,30
m24:25Mk 6:20; Ap 17:32
n24:27Ap 25:9

Acts 24

Polo kosimi leamino doko

Maitakao kote yuungi pateamopa pitisa mupa Ananayasa dokopi, isingi akali mendapuapi, dee dupa nisoo kosa lena leamino akali Tetalasa dokopi dutupa Sisatia yuu dokonya epeami-pyaa. Ipupala Polo-kisa pii setamino dupanya tenge dupa kapomane andake Pilikisa doko lamaiyami-pyaa. Lamaitiaminopa kapomane andake dokome Polo epena lea-pyaa. Ipupiamopa akali Tetalasa dokome Polo kosimi laanya tee pyao dapa lea-pyaa: “Pilikisa, emba akali epe, embame naima nisipinosa etete epe yuu yongamopa naima auu pyoo kalyamano. Embanya masepae epe dokome naimanya yuu dakenya wamba koyamo dupa indupa auu pilyamo. Dopa pipumu dokonya naima pitakame koteaka lao eteteaka mona epe palyetala emba kandao etete yaka pilino lelyamano. Dopana, nambame pii longo latosa emba maka kayatena naimanya pii kuki mende emba langitoo embame mona epe paliuu sakape. Naimame a  akali dake kandamanopa yama makongapae mende lamo. Baame Juta endakali yuu wakale wakale katenge dupa pitakanya mona koo palisakamaiyoo pundu sakatasoaka katenge. Nasatete tange Jisasa tata wakale katenge dokonya baa aiyomba joo kalyamo. Baame b  losuu anda andake doko koyasalanya makande peteamoaka doko, naimame baa miniama. [Minatala naimanya mana setapae dupanya baa kosimi lawani kayama. Dopaka doko, yanda singi amii isingi mupa Lisiasa lenge dokome ipupala naima watao pyapala naimanya kingi pongo liangao nyia. Nyepala baame naima langyoo, nyakamame akali dake kosimi latami tamo kandao doko, emba-kisa laapape lea.] Dopa leana embame akali dake pisetenopa naimame baa kandao kosimi lapenge dupanya tenge baa tangeme laapomona,” Tetalasa dokome dopa lea-pyaa. Juta dupame Tetalasame pii leamo doko kyoto injisoo, “Pii dutupa etete kiningina,” leami-pyaa.

Polome Pilikisanya enombanya katao pii yanu piamo doko

10 Dokopa kapomane andake dokome Polonya pii lena lao aiyomba ema piamopa Polome lao pituu, “Embame ee kana longo dupanya yuu dakenya kosa tolao lao kalyeno nambame kandengena, nambame mona epe paliuu embame salapeno lao dupanya pii yanu pyakamaitoo. 11 Namba c  Jetusaleme Gote lao tama pyaa peo doko kote kingi ita mende-kisa dee lapoma iki patelyamona, embame datupa piseteno kandao doko, kapa pao salapeno. 12 Nambame Jetusaleme losuu anda andake kame dokonya akali mendepa nambapa pii yanda pyoloo napiamba. Nambame Jutamanya losuu anda dupanyapi taono dokonyapi endakali mendapua nyoo limbao nakatewaka. 13 Akali datupame namba kosimi lelyaminoaka doko, angi mende kapa pao emba-kisa laitaka pyoo laa nayalamino.

14 “Dopana, d  nambame pii dake yapae napyoo langilyo: Jisasanya pii manapimi naima Juta dupa wakale katasingina lelyamino doko kiningi nambame mana dokoaka watao naimanya yumbange dupanya Gote doko lao tama pyoo mana setapae dupapi potopesa dupame pii pepa piamino dupa pitakapi dupa nambame masingi. 15 Akali e  datupame endakali tolataepi koo pingipi dupa pitaka Goteme malunya sakatasetana lao masoo malisoo kalyamino mendai dopaka pyoo nambame apata masoo malisoo kalyo. 16 Dokonya f  nambame endakali dupanya lengelyaapipi Gotenya lengelyaapipi dupanya koteaka lao mona mendai iki paliuu payatoo lao masetala lekeleke tao kalyo.

17 “Ee g, h  kana mendatupa pateamopa nambame naimanya tata daa jingi endakali dupa opale mendapua maiyanya Jetusaleme pao pituu, Gote lao oapi epe mendapua kundi maiyanyaka peo. 18 Pupala nambame dopa pyoo katao Jutamanya kaimala pipae kunalanya mana miningimali pyoo minao etapala losuu anda andake dokonya kateopa Juta mendatupame namba kandeami. Dokopa endakali longo mendapua namba-pipa pii lao limbao pilya pyana pyoo nakateama. 19 Dopaka i  doko, Juta mendapua Esia katenge dupame ipao namba miniamina namba-kisa tenge mende sipyali kandao doko, akali dutupameaka ipao embanya enombanya kosimi lapimili auu pipyali. 20 Daa tamo kandao doko, namba kanjole dupanya enombanya kateo gii dokopa akali datupame nambanya koo pito kandatami mende emba langina. 21 Wamba j  nambame akali dupanya kainanya katao pii mendai iki mende puu lao lao pituu, ‘Endakali kumapae dupa Goteme sakatasetana lao masoo minao kalyo leona, tenge dokonya iki dupame namba nyakamanya enombanya kosimi lelyaminona,’” lea-pyaa.

22 Akali k  Pilikisame Jisasanya pii manapi auu pyoale masingi dokomena baame Polo kosimi laa epeamino akali dupa lamaiyoo, “Amii isingi mupa Lisiasa lenge doko ipatamopa nambame nyakamanya kosa dake sakatona, malisalapa,” lea-pyaa. 23 Dopa l  latala baame yanda singi amii isingi mende lamaiyoo, “Akali Polo doko anjalakao anjala naenya, mee isoaka katao baanya kaita miningi dupame oapi dupa minao nisala ipataminopa kaita lyokao daa nalape,” latala Pilikisa baa pea-pyaa.

Polo anjetae kateamo doko

24 Kote mendatupa pateamopa Pilikisapa baanya etanenge Juta enda Dutusilapa epeambi-pyaa. Ipupala Pilikisame Polo epena lea-pyaa. Dokopa Polome ipupala Kataisa Jisasa lao masoo miningi dokonya lao pii leamo doko Pilikisame sia-pyaa. 25 Polome m  mana epe minao paengepi, tangeme tange auu pyoo isoo katengepi, tenda Goteme endakali dupa yapatamo dupapi dupanya lao lamaiyamo dokonya Pilikisame paka kaya-pyaa. Paka kayapala baame Polo lamaiyoo, “Embame kapa latelenona, tenda gii setamo kandao doko, nambame emba ipu latona, puu,” lea-pyaa. 26 Pena latala maitakao Polome namba muni mende kapa pao ditana lao masetala Pilikisame kote longo Polo epena latapu pii laloo peta pyoo kateambi-pyaa.

27 Maitakao n  ee kana lapoma pateamopa akali Posiasa Pesatasa lenge dokome Pilikisanya panda nyala epea-pyaa. Dokopa Pilikisame Juta dupame baa auu kayamili lao masetala Polo doko anjetae mee palena kayapala pea-pyaa.

Copyright information for `ENQ