a4:1Ip 9:6-17
b4:3Ga 3:23; Kl 2:8,20
c4:4Jo 1:14; Lo 1:3; Ep 1:10
d4:5Lo 3:24; Ga 3:13
e 4:5-7Lo 8:15-17
f4:7Jo 15:15; Ga 3:29
g4:81 Ko 8:4-6, 12:2; 1 Te 1:9
h4:91 Ko 13:12
i4:10Lo 14:5; Kl 2:16,20
j4:11Pl 2:16
k4:13Ap 16:6; 1 Ko 2:3
l4:14Mt 10:40
m4:16Emo 5:10
n4:191 Ko 4:14-15; 2 Ko 6:13; 1 Te 2:7-8; Pm 10
o4:22Jen 16:15, 21:2,9
p4:23Jen 17:16; Lo 9:7-9
q4:24Lo 8:15; Ga 5:1
r4:25Jo 8:32-33
s4:26Wee 87:5; Ip 12:22; Pa 3:12, 21:2,10
t4:27Ais 54:1
u4:28Lo 9:7; Ga 3:29
v4:29Jen 21:9; 1 Te 2:14
w4:30Jen 21:10; Jo 8:35
x4:31Ga 3:29

Galatians 4

Nambame a  pii dakenya mende lelyo: wane kole mendeme baanya takangenya moya dupa nyalanya malisoo kalyamo gii dokopa oapi dupa pitaka baanyaka doko, baa kendemane dupa kalyamino mendai dopaleaka joo katenge. Wane kole doko takangeme moya maitamo gii doko naepelyamopa endakali mendapuame baapi baanya oapi dupa isakamaiyoo katengema. Naima b  mendai dopaka pyoo wane kolesa yuunya mana dupanya kendemane joo kateama. Pitamo c, d, e  gii doko ipateamopa Goteme baanya Ikiningi doko epena lea-pyaa. Enda mendeme baa mandipeamopa baame endakali mana setapae dupanya pundipundi anjetae katenge dupa mokao kii tamao nyalanya mana setapae dupanya pundipundi katapala tolao watao minia. Goteme naima baanya ikiningi injisina lao baame dopa pia. Indupa nyakama Gotenya ikiningi joo kalyamino dokonya Goteme baanya Ikiningi dokonya Oli Sipitisa doko nyakamanya monanda ongonya epekena latapumopa baame “Apane, Apane” lao kee lelyamo. Dokonya f  emba dee kendemane joo nakatenya ikiningi joo kalyeno. Ikiningi joo kalyeno dokonya Goteme baanya epe dupa emba dita.

Polome Galasia kateamino dupa lao masiamo doko

Kini g  wamba nyakamame Gote masala nayamino gii dokopa gote angi daa dupanya kendemane joo kalai piami. Indupa h  nyakamame Gote lao masilyamino. Goteme nyakama lao masilyamona latopa auu pyaapomo. Dopaka doko, aipuma nyakamame yuunya maname kapa pao nisala nayapenge dupanya pilyetala watao minalanya pilyamipi? Aipuma nyakamame mana dupanya dee kendemane jipuma laka lao masilyamipi? 10 Koteaka i  lao nyakamame yuu giipi, kanapi, gii andakepi, ee kanapi, dupaka kandao masetae kalyamino. 11 Dokonya j  nambame nyakama lao masetala neame kumilyo! Nambame nyakama-kisa kalai lekeleke tao pio dupa aopyoo latala mee jetame lao masilyo.

12 Oo kaimia paluma! Wamba namba nyakama kateamino dopale jio dokonya indupa nyakama namba kalyoli pyoo katapimi laka lao ee lelyo! Nyakamame namba kandao koo mende napiami. 13 Namba k  yaina nyio tenge dokonya minao nyakama katiamisa tee pyao ipupala Wai Pii Epe doko nyakama langio doko nyakamame masilyamino. 14 Nambanya l  yaina dokome nyakamanya masingi kenda pisiamoaka doko, nyakamame namba maka kayawapi kandanya palyoapi mende napinya, Gotenya enjele mendepi Kataisa Jisasapi joo namba lanyiami. 15 Wamba nyakama mona etete yaepao kateamino doko aipa petala alu pilyape? Dokonya nambame nyakama kandao pii dake lelyo: wamba nyakamame nyakamanya lenge dolapo lukuoo nyepenge jiali kandao doko, lukuoo namba diamili! 16 Indupa m  nambame nyakama kiningi langilyo dokonya namba nyakamanya yanda pipili jilyope? 17 Endakali dokaitame nyakama andiki pyokondape pyoo kalyaminoaka doko, kalai pyaanya pilyamino doko angi kalai epe mende pyaanya napilyamino. Nyakamame dupanya pii doko watao minatala nambame pii nyakama langio doko yakinalapale lao pilyamino. 18 Akali mendeme kalai epe mende pyaanya endakali dupa andiki pyokondape pyoo katatamo kandao doko epe. Pii dake namba nyakama-pipa awapa katelyamano dokopa iki angi joo sala naenge. Koteaka lao angi joo singi. 19 Oo n  nambanya wane paluma! Enda mende wane manjanya maita pilyamopa tanda nyingili pyoo nambame nyakama lao masetala deaka tanda nyoo kalyo doko, nyoaka katao nyakamame Kataisa iki lao masokondape pitamino gii doko kandao nyoto! 20 Nambame nyakama lao masipusa nambanya mona andelyamona, nambame pii lalo doko dee aloo pitoo, namba indupa nyakama-pipa katapuma laka.

Enda Eka Setapanya kongali pii doko

21 Mana setapae dupa watao minao katapala auu pyoo katatamana lao masilyamino endakali dupa nambame pii mende pisilyo: Gotenya pii pepa pyapae dupanya lapae silyamo dupa nyakama nasilyamipi? 22 Doko o  dapa lao pyapae silyamo: Apotakamenya wane lapo. Dolaponya mende doko kendemane enda dokome mandea-pyaa. Mende doko mee enda dokome mandea-pyaa. 23 Kendemane p  enda dokome wane mandeamo doko endakalimi mandengeli pyoo mandea-pyaa. Mee enda dokome wane mandeamo doko wamba Goteme epe maitona leamo dokonya mandea-pyaa. 24 Pii q  doko kongali pii mende. Goteme endakali dupa-kisa pii lapoma lao seteamo dolapo enda dolapo-pipa makande petae silyamo. Pii Goteme Sainaimanda dokonya endakali dupa-kisa lao seteamo dokome kendemane wane mandenge. Pii lao seteamo doko enda Eka. 25 Enda r  Eka doko Atepia yuu dokonya Sainaimanda silyamo doko makande pyoo lapae silyamo. Indupa Jetusaleme silyamo dokopi dokonya wane dupapi mana setapae dokonya kendemane joo kalyamino doko baame makande pyoo lapae silyamoaka. 26 Dopaka s  doko, ketae silyamo Jetusaleme doko kendemane kalai napingi. Doko naimanya endangi. 27 Dokonya t  pii dapa lao pepa pyapae silyamo:

“Enda wane namandenge ingi pyakilyetae
emba mona yaepape!
Enda wane namadyuu tanda nanyingi
emba mona epe palyoo pii puu lao lape!
Doko, enda watao pyatae dokonya wane dupame
enda akali katenge dokonya
wane dupa ita minao longo jilyamo!”
28 Kaimia u  paluma, Goteme epe maitona leamo dokonya Aisake mandeamo mendai dopaka pyoo nyakama Gotenya mandipae kalyamino. 29 Kiniaka v  doko, endakalimi mandengeli pyoo mandipae wane dokome wamba Oli Sipitisame leamoli pyoo mandipae wane doko watao piamo mana doko indupa mee silyamo. 30 Dopaka w  doko, Gotenya pii pepa pyapae singi dokonya aipa lapae silyape? Doko dapa lapae silyamo: “Embame kendemane enda dokopa baanya ikiningi dokopa watao pyape! Doko, kendemane enda dokonya ikiningi dokome mee enda dokonya ikiningi doko-pipa awapa kapa pao moya doko etete nanyeta! 31 Dopana, x  kaimia paluma, naima kendemane enda dokonya ikiningi joo nakatenya, mee enda dokonya ikiningi joo kalyamano.

Copyright information for `ENQ