a7:1-2Jen 14:17-20
b7:3Jo 7:27; Ip 1:2
d7:4Jen 14:20
e7:5Nam 18:20; Dit 14:22
f7:10Jen 14:17
g7:11Wee 110:4
h7:12Ip 8:6-13
i7:13-14Jen 49:10; Ais 11:1; Mt 2:6; Lo 1:3; Pa 5:5
j7:16Jet 33:18
k7:17Wee 110:4; Ip 5:6
l7:18Lo 3:22-23; Ip 10:1, 11:40
m7:19Ip 9:9
n7:21Wee 110:4; Ip 5:6
o7:22Ip 8:6-13, 12:24
p7:24Lo 8:34; 1 Jo 2:1; Pa 1:18
q7:26Ip 3:1, 9:25-28; 1 Jo 3:5-6
r7:27Lo 6:10; Ip 5:3, 9:7,12, 10:11-14
s7:28Ip 5:1-2,9

Hebrews 7

Akali Melekisendeke baa pitisa etete andake-pyaa

Akali a  Melekisendeke doko Seleme tangemanya kiŋi doko Gote Etete Alyasale Katenge dokonya pitisa-pyaa. Wamba Apotakameme yanda petala kiŋi dupa pyao kumasetala pilyiamopa Melekisendekeme kaitinisa kandanyetala auu pisoo pii epe lamaiya-pyaa. Dokopa Apotakameme oapi dupa pitaka kingi ita lao konjepala konjepae mende Melekisendeke maiya-pyaa. Kenge Melekisendeke dokonya tenge mupa doko dapa: kiŋi dokome mana tolatae watao miningi. Dee baa Seleme tangemanya kiŋi katea-pyaa. Dokonya tenge doko dapa: kiŋi dokome mona lyuu lenge mana watao miningi. Baa b  endangi napituu takange nakatao baanya tata yumbange napaliuu pingi. Baa endangimi mandea gii nasoo kumata gii nasoo pingi. Baa Gote ikiningi dopale jetala koteaka lao
b koteaka laoPepa Iputu piamo akali dokome Baipolonya pii mendeme Melekisendeke endangi takangepi, yumbangepi, baa pitisa kateamo gii dokopi dupanya laa nayamosa baa pitisa koteaka lao katenge doko Jisasa makande petaena lea-pyaa. Ip 5:5-6, 7:15-17 dupa kandape.
pitisa katenge.
Naimame d  Melekisendeke doko etete akali andakena lao masepenge. Naimanya yumbange mupa Apotakameme yanda petala oapi epe nyiamo dupa pitaka kingi ita lao konjepala konjepae mende Melekisendeke maiya-pyaa. Lipainya e  mandipaenya mandipae tata dupame pitisa kalai doko nyingima. Dokopa mana setapae dupame lelyali pyoo Isataelemanya oapi dupa kingi ita lao konjepala konjepae mende dupame nyingima. Isataele dupa Lipai dupanya kaiminingi etete Apotakame ikiningiaka doko, kayapala dupame kaiminingi dupanya oapi dupa kingi ita lao konjepala konjepae mende nyingima. Akali Melekisendeke doko baa dupa tata daaka doko, baame Apotakamenya oapi kingi ita lao konjepae dupanya konjepae mende nyia-pyaa. Dokopa Goteme maitona leamo pii doko siamo akali Apotakame doko kandao Melekisendekeme baa auu pisoo pii epe lamaiya-pyaa. Endakali pitakame dapa lao masingima: pii epe lamaiyoo auu pisingi akali doko alyasalena, pii epe singi akali doko dokonya pundipundina lao masingima. Lipai dupame oapi kingi ita lao konjepae dupanya konjepae mende nyingimaka doko, dupa kumingima. Dopaka doko, Gotenya pii pepa pyapae singi dokome Melekisendeke doko baa lete katengena lelyamo. Kiningi naimame kapa pao dapa lapenge: Lipai dokome oapi kingi ita lao konjepae dupanya konjepae mende nyingi-pyaa. Dopaka doko, wamba Melekisendekeme Apotakame-kisa oapi kingi ita lao konjepae dupanya konjepae mende nyoo pituu Lipai dokonya oapi dupanya konjepae mende nyiaka-pyaana lapenge. 10 Doko, f  Melekisendekeme Apotakame kaitinisa kandanyiamo gii dokopa Lipai doko baanya yumbange Apotakamenya yonge dokonya palea-pyaa.

Pitisa enenge mendeme wambatae dupa alo piamo doko

11 Lipae g  tata dupame pitisa kalai piamino dokonya Goteme Isataele endakali dupa mana setapae dupa maiya-pyaa. Lipai dupame pitisa kalai doko auu pyoo pyaakao piamili kandao doko, maitakao akali Etone daa, Melekisendeke yale mende katapenge nanjiali. 12 Pitisa h  dupa alo pitamo kandao mana setapae dupa apata alo pipengeaka. 13 Goteme i  akali lelyamo doko baa Lipai tata daa. Baanya tata dokonya mende wamba olata tokonya pitisa joo kalai pyoo katea mendenya daa-pyaa. 14 Naimanya Kamongo doko Juta tata dokonya mandipaena lao masetelyamano. Moseseme pitisa dupanya lao lao pituu, tata doko pitisa katenana laa naya-pyaa.

Jisasa baa Melekisendeke kateamo kombe dokonya koteaka lao pitisa kalyamo

15 Pii dapa lao panelyamo: pitisa mende ipatelyamo doko Melekisendeke yalena lao panelyamo. 16 Baa j  endakali tata mendenya manapi ipangepi mendeme tenge katao pitisa katena lao, daa. Lete etete katawaka katenge dokonya pupu lapae dokome baa pitisa injisia-pyaa. 17 Goteme k  baa kandao dapa lea-pyaa:

“Emba Melekisendeke kateamo kombe dokonya pitisa katawaka katatena,” lea-pyaa.
18 Mana l  setapae wambatae dupa Goteme kunao nepatea-pyaa. Doko, mana setapae dupa kyoto nanjepala dee kalai pipenge nanjia-pyaa. 19 Doko, m  mana setapae dupame mendita mende epe etete injisala naya-pyaa. Goteme kaitini waka mende wapuiyamo doko etete epe dokonyana mana setapae dupa ita minapumopa kaitini dokonya-kaita naima Gote tengesa pelyamano. 20 Dee n  Goteme pii etete kiningi lelyona latala Jisasa pitisa katasia-pyaa. Pitisa kalai nyiamino dupa mendeme pii etete kiningi lelyona laa nayamopa pitisa kateami. Dopaka doko, Goteme Jisasa kandao pii etete kiningi lelyona lao lao pituu,

“Namba Kamongo dokome pii etete kiningi latelyo doko masingi aloo napitona emba pitisa katawaka katatena,” lea-pyaa.
22 Dopana, o  pii lao setapae doko Jisasame makande joo naima laitaka pipumopa wamba pii lao setapae doko ita minilyamo.

23 Wamba akali longo pitisa kateami-pyaa. Doko, dupa kumingi dupana kapa pao pitisa katawaka katapenge nanjia-pyaa. 24 Dopaka p  doko, Jisasa baa katawaka katenge dokome pitisa kalai doko koteaka lao minilyamopa aloo napingi. 25 Dopana, baame kapa pao endakali dupa etete pyoo nyalakao nyilyamopa dupa baa-kisa Gote tengesa pengema. Doko, baa koteaka lao katao pituu, Goteme endakali dupa nisina lao baame loma singi.

Pitisa Mupa Jisasame etete kapa pao naima nisingi

26 Pitisa q  mupa dopale dokome etete kapa pao naima nisingi. Baa etete epe dokona koopi mende napingi. Baa-kisa koo tengepi mende nasilyamopa endakali koo pingi dupanya baa etete waka mendepale. Baa dupa pitakanya etete andake alyasale katenge. 27 Wamba r  pitisa mupa kateami dupame koteaka lao Gote lao kundi maipengena lao maiyami-pyaa. Wambao dupame tangenya koo kunalanya kundi maitala, maitakao endakali dupanya koo kunakamaiyanya kundi maingima. Dopa pingimaka doko, Jisasame koteaka lao kundi maiya nayapenge. Baame baa tange paa mendai iki Gote lao kundi maiya-pyaa. 28 Mana s  setapae dupanya pitisa mupa katapenge jilyamopa akali pupu lapae nasingi dupa pitisa mupa katengema-pyaa. Dopaka doko, maitakao pii etete kiningi lelyona leamo dokome Gote Ikiningi doko pitisa mupa katena lea-pyaa. Dokopa Goteme baa etete kapa pisiamo doko koteaka lao dopa petayaka mee kalyamo.

Copyright information for `ENQ