a2:1Ap 10:34; Je 2:1
b2:5Sep 2:3; Mt 4:17; 1 Ko 1:26-29; Ga 3:29; Pa 2:9
c2:7Ais 52:5
d2:8Lep 19:18; Mt 19:19, 22:39; Lo 13:8; Ga 5:14
e2:9Dit 1:17; Pot 24:23
f2:10Dit 27:26; Mt 5:19; Ga 3:10, 5:3
g2:11Eke 20:13-14; Dit 5:17-18; Lo 13:9
h2:12Ga 6:2; Je 1:25; 1 Pi 2:16
i2:13Mt 5:7, 6:14-15, 18:32-35; Lu 6:36; 1 Jo 4:18
j2:14Mt 7:21; Lo 4:1-3; Ga 5:6; Je 2:24
k2:15Mt 7:21, 25:41-45; 1 Ko 13:3; 1 Jo 3:17
l2:17Je 2:20,26
m2:18Ga 5:6
n2:19Mt 8:29
o2:21Jen 22:9-12; Lo 4:1-3; Ip 11:17-18
p2:23Jen 15:6; 2 Ktl 20:7; Ais 41:8; Lo 4:3,9,22; Ga 3:6
q2:24Je 2:14
r2:25Jas 2:1-21; Ip 11:31
s2:26Je 2:17

James 2

Endakali yapala nayalapape leamo doko

Nambanya a  kaimia paluma, nyakamame naimanya Kamongo tii pipae Jisasa Kataisa doko masoo minao katao endakali lengelyaapi kandao yapala nayalapape. Nyakamanya losuu anda dokonya akali mende kingi kondenya liŋi golome wasepae dupa pisoo yonge pee kyoo lao auu pipae pingi mendepa, dee akali tipya yonge pee kaimala pipae pingi mendepa ipatambi. Dokopa nyakamame akali yonge pee kyoo lao auu pipae pingi doko kandatala, “Emba toko angenya pitipalipu,” latami. Dopa latala akali tipya doko kandao, “Emba dupanya katatenopi nambanya moko setelyo asa pititinopi mende pii,” latami. Dopa latamino kandao doko, nyakamame nyakama tange mona lapo palyoo kopeta masoo endakali yapatami.

Nambanya b  mona setenge kaimia paluma, nyakamame salapape. Yuunya endakalimi tipyana lao masingima endakali dupame masoo miningi dokonya Kamongo joo katena lawapi baame baanya isingi panda doko dupa maitona lawapi Goteme dupa yapao nanyia-pyaape? Baa etete auu kayatami endakali dupa isingi panda doko maitona nalea-pyaape? Dopaka doko, nyakamame endakali tipya dupa elya pisetelyamino. Kamongo dupame nyakama kenda pisilyamino. Dupame tomba nao nyakama laminao kosimi laa napelyamipi? Nyakama c  kandao kenge epe latae silyamo doko lamba laa naelyamipi? Nyakamame d  Gotenya pii pepa pyapae silyamoli pyoo Kamongo kiŋi dokonya mana setapae dupame lelyamoli pyoo kini pitamino kandao doko, auu pyoo pitami. Mana setapae dokome lao pituu, “Embame emba tange auu kaengeli pyoo embanya endakali yango doko auu kayao katapena,” lapae silyamo. Dopaka e  doko, nyakamame endakali lengelyaapi kandao yapatamino kandao doko, nyakamame koo pitami. Mana setapae dupame nyakama mana setapae yalenge kalyaminona lao panasingi. 10 Doko, f  endakali mendeme mana setapae Moseseme nyiamo dupa pitakame lelyamoli pilyamoaka doko, mana setapae mendaipi mende yalelyamopa mana setapae pitaka yalenge tenge baa-kisa ipatelyamo. 11 Doko, g  kepo kolala nayape leamo dokome endakali pyao kumasala nayape leaka. Embame kepo kolala naenya endakali pyao kumaseteno kandao doko, emba mana setapae yalenge endakali joo katate. 12 Mana h  pii naima mokao nyingi dokome naima tenda yapatana lao masetala nyakamame pii lao kalai pyoo kalyepape. 13 Kondo i  nakaenge endakali doko Goteme baa kondo nakayawaka yapapala yanu nyeta. Kondo kaenge mana dokome yapapala yanu nyingi mana doko ita miningi.

Masoo minao mana epe miningi doko

14 Nambanya j  kaimia paluma, endakali mendeme Gote lao masoo minilyona latala mana epe mende naminatamo kandao doko, epe aki mende pyakalyetape? Baanya masoo miningi dokome kapa pao baa pyoo nyetape? 15 Nyakamanya k  masoo miningi pimalenge kaiminingipi mende yongenya pingipi nee indupa napengepi mende daa jetamopa nyakamanya mendeme dutupa lamaiyoo, “Nyakama mona epe paliuu kupa nakayao lopo nakayao pupape,” latami. Dopa latala nyakamame dutupanya daa jetamo dupa nisala nayatamino kandao doko, epe aki mende pyakalyetape? 17 Dopaka l  pyoo endakali mendeme mee masoo minatala mana epe mende naminatamo kandao doko, baanya masoo miningi doko kumapae jeta.

18 Dopa m  pita endakali mende kandao mendeme lao pituu, “Embame masoo minao katapinopa nambame epe pilyo. Epe mende napyoo mee masoo minilino doko embame namba laitaka pipi. Nambame epe pilyo dokome nambanya masoo miningi doko emba laitaka pitona,” lapenge. 19 Embame n  Gote mendai iki kalyamona lao masilino doko yaka pilino. Enjele koo dupame dopa lao masilyaminoaka. Dopa lao masetala walu lelyamino. 20 Embame mana epe mende naminao mee masoo minapinopa embanya masoo miningi doko angi nanjilyamo dokonya emba mona napalenge doko mana langitoo. 21 Naimanya o  yumbange Apotakame dokome baanya ikiningi Aisake doko olata toko dokonya Gote kundi maiyanya piamo dokonya Goteme baa tolataena laa naya-pyaape? 22 Baame masoo minao katao mana epe miniamo doko kandeleno. Epe piamo dokonya baanya masoo miningi doko yaka jia-pyaa. 23 Dokopa p  Gotenya pii pepa pyapae singi mende angi jiana lapae silyamo: “Goteme kiningi lelyamona lao Apotakameme masoo miniamo dokonya Goteme baa tolatae lea-pyaana,” lapae silyamo. Goteme Apotakame baanya mona setenge joo katena lea-pyaa. 24 Endakali q  mendeme masoo minilyamo dokonya ialyoo Goteme baa tolatae lamona nalenya baame mana epe minilyamo dokonya apata baa tolatae lamona lenge doko masilyamino. 25 Dopaka r  pyoo enda akali nyele-nyele paenge Leapa lenge dokome mana epe miniamo dokonya Goteme baa tolataena lea-pyaa. Akali pena leamino dolapo baame baanya andaka dokonya mana epe minao lanyepala dolapo kaita waka mendenya pena lea-pyaa. 26 Endakali s  kumapala imambu patelyamopa kumapae silyamoli pyoo, mee masoo minatala mana epe naminilyamino endakali dupanya masoo miningi doko kumapae jilyamo.

Copyright information for `ENQ