a3:1Mt 12:36, 23:8; Lu 12:47; 1 Ko 12:28
b3:2Pot 10:19, 13:3, 18:21; Je 1:26
c3:6Pot 16:27, 26:18-21; Mt 5:22, 12:36-37, 15:11,18-19
d3:7Jen 1:26, 9:2
e3:8Wee 140:3; Lo 3:13
f3:9Jen 1:26-27; 1 Ko 11:7
g3:10Ep 4:29
h3:12Mt 7:16
i3:13Ep 4:1-2
j3:151 Ko 3:3; 2 Ko 1:12; Je 1:5,17
k3:171 Ko 13:4-7
l3:18Ais 32:17; Mt 5:9; Pl 1:11; Ip 12:11

James 3

Nyakamanya keke dupa tange isokondape pyepape leamo doko

Nambanya a  kaimia paluma, nyakamanya endakali longo dupa mana lamaingi endakaliaka joo nakalyepape. Goteme endakali dupa pitaka yapapala yanu nyetaka doko, naima mana lenge endakali dupa baame yapapala yanu nyalakao nyeta doko nyakamame masilyamino. Naima b  pitakame koo longo lao pingi. Endakali mendeme pii lenge dokonya koo mende nalatamo kandao doko, baa etete tolatae katao baa itange doko pitaka kapa pao isoo katataka. Mena osa mendeme naimame masetamanoli pina lao nengekaita aene mende palyetala naimame baa tolao pena lao lyaa minao tolasingi. Dee nyakamame sipi dupa masalapape. Dupa yale paka silyamoaka doko, poo andake mendeme soo pyasilyamopa penge. Lyaa miningi kende doko etete yakaneaka doko, lyaa miningi akali dokome pupyali lao masilyamo dokonya pena lao lyaa miningi kende dokome minao tolasingi. Dopaka pyoo keke doko yongenya katenge dupanya yakane mendeaka doko, dokome pii dupa etete luiyao lenge.

Itate koo lelya pyapae mendeme tata yale mende tenge doko masalapape.
Keke c  doko itate mende jilyamo. Naimanya yongenya katenge dupanya kainanya katenge keke dokome koo dupa pitaka pingi. Keke dokome naimanya yonge doko pitaka koyasingi. Endakali mandipa katapa kumapa pingi doko pitaka keke dokome itate tamaingi. Itate panda koo dokome keke doko itate tamaingi. Endakali d  dupame mena kapua tatapi, yakapi, kanopatopi, endaki petenya singi dupapi dutupanya tata dupa pitaka kapa pao tambo lasingima. Kini tambo laseteami. Dopaka e  doko, endakali mendaipi mendeme keke doko tambo lasala nayapenge. Keke dokome ema-ema pyoo payao koo pyoo kayala naenge. Keke dokonya kumasingi tomakai tumbatae kalyamo. Keke f  dokome Kamongo-kisa Takange doko lao naimame tama pingi. Keke mendai dokomeaka endakali Gote baa waingi tao wapuiyamo dupa koyasoo naimame pii kenda pipae dupa lenge. 10 Nengekaita g  mendai dokonyaka endakali tama pingipa koyasingipa lapota pyakaenge. Nambanya kaimia paluma, opa napipenge. 11 Endaki lee kuingi mendai dokonyaka tende pingipa tende napingipa lapota epengepe? 12 Nambanya h  kaimia paluma, piki ita mendeme olipi dii kapa pao mandengepe? Pande, getepe kende mendeme piki dii kapa pao mandengepe? Dokotee joo endaki tende napingi lee kuingi dokonyaka tende pingi lee kuola naenge.

Kaitinya katao masingi epenge doko

13 Nyakamanya i  endakali mana kandenge masepae mende kalyape? Katatamo dokome masingi endakali dupa andiki pyoo katengemali pyoo katao mana epe minao payao katao baanya epe pitamo dupa panao pyoo katena. 14 Dopaka doko, nyakamame moname waka dupa etete putiti kayapala nawe lao katatamino kandao doko, nyakamame nyakama tange lalyoo sambo pii lao kiningi pii doko pyanya palyala nayalapape. 15 Masingi j  dopale dupa kaitinya-tae pyakanala naenya isa yuu dakenya-tae endakali monanya katao pyakalyingi. Enjele koo dupa-kisa katao pyakalyingiaka. 16 Putiti kayawapi nawe lawapi katatamino endakali dupame kyakalya kyakana pyoo koo tata dupa pitaka pyoo katatami. 17 Dopaka k  doko, masingi kaitinya katao epelyamo doko nyingima endakali dupame dapa pyoo mana miningima: wambao doko dupame masingi etete epe doko watao miningima. Laponge doko dupame endakali yango dupa-pipa mona mendai palyetala wanawana lao mendenya pii sakamaiyowapi, etete kondome kumao mana epe minawapi, endakali pitaka mona mendai iki palisowapi pingima. Dupanya masoo miningi doko sambo daa, kiningi. 18 Akema l  lenge endakali dupame mona setaloo pyoo katamana lao kalai pili petala epe tolao pingi mana dupa dii joo mandengema.

Copyright information for `ENQ