a13:1Mt 26:17; Jo 2:4, 10:18, 11:55, 12:23, 16:28; Pl 2:8; 1 Jo 3:16
b13:2Mt 26:20; Lu 22:3; Jo 6:71, 13:27, 14:30
c13:3Jo 3:35; 16:28
d13:4-5Lu 7:44, 12:37, 17:7-10, 22:27
e13:6Mt 3:13-14
f13:8Jo 3:5, 9:7
g13:10Jo 6:64, 70-71, 15:3
h13:11Jo 13:2
i13:12-15 Lu 22:27
j13:13Mt 23:8,10
k13:15Jo 13:34; Ep 5:2; Pl 2:5,8; Kl 3:13; 1 Ti 5:10; 1 Pi 2:21
l13:16Mt 10:24; Lu 6:40; Jo 15:20
m13:17Mt 7:24; Lu 11:28; Je 1:25
n13:18Wee 41:9; Jo 6:70
o13:19Jo 8:24,28, 14:29, 16:4
p13:20Mt 10:40; Mk 9:37; Lu 9:48, 10:16
q13:21Jo 11:33, 12:27
r13:23Jo 19:26, 20:2, 21:7,20
s13:26Jo 6:71
t13:27Lu 22:3; Jo 13:2
u13:29Jo 12:6
v13:30Lu 22:53
w13:31Jo 12:23, 17:1, 21:19
x13:32Jo 17:5
y13:33Jo 7:33-34, 8:21, 16:10
z13:34Lep 19:18; Mt 22:39; Lu 10:27; Jo 15:12,17; Ep 5:2; 1 Te 4:9; Ip 13:1; 1 Pi 1:22; 1 Jo 2:8, 3:23; 2 Jo 5
aa13:36Mt 26:31-32; Jo 7:34, 8:21

John 13

Jisasame baanya disaipele dupanya moko wasawasa pyakamaiyamo doko

Napinya a  Kayamo Gii epe doko ipatala nayamopa Jisasame yuu dake yakinatala Takange katatasa pupenge gii doko ipatelyamona lao masia. Baanya endakali yuu dakenya kateamino dupa baame auu kayao katea. Baame auaka kayao katao pao baa kumiamo gii dokonya tuu lea.

Alemandi b  nee nao peteaminopa baanya disaipele mende kenge Jutasa Isaketiote lenge Saimone ikiningi dokome Jisasa enge nyina lao Sataneme baanya monanya masingi koo palyetakamaiya. Takangeme c  dupa pitaka Jisasa baanya kinginya yakineamo doko masia. Dee Goteme baa epena leamo doko masoo baa katatasa pilyetamo doko masoaka pia. Dokopa d  Jisasame nee nao pituu sakatatala baanya yonge pee ketae pingi doko lyokapala tauwele mendeme matapu pia. Dopa e  petala disa mendenya endaki kai lao pisia. Dopa petala baame tee pyao baanya disaipele dupanya moko wasawasa pyata tauwele matapu piamo dokome kunanya nepata pyoo ipao Saimone Pita peteasa epeamopa Pitame baa lamaiyoo, “Kamongo, embame nambanya moko wasawasa pyakatepe?” lea.

Dokopa Jisasame baanya pii yanu pyakamaiyoo, “Nambame pilyo dake epapu embame masala naelenoaka doko, tenda embame masetena,” lea. Dokopa f  Pitame baa lamaiyoo, “Embame nambanya moko wasawasa napyaka etete daa,” lea. Jisasame baanya pii yanu pyakamaiyoo, “Nambame embanya moko wasawasa napyakato kandao doko, emba kapa pao nambanya disaipele joo nakalyalena,” lea. Dokopa Saimone Pitame baa lamaiyoo, “Kamongo, embame nambanya moko iki wasawasa pyakala naenya kingipi aiyombapi apata pyaka,” lea. 10 Jisasame g  baa lamaiyoo, “Endakali mende baanya yonge pitaka wasawasa pyatae doko dee wasawasa pyakamaipenge tenge mende nasingi. Baa moko iki wasawasa pyakamaipenge jingi. Dopa petaesa baa pitaka kaimala kunao nepatae jingi. Nyakama kaimala nasingi kalyaminoaka doko, nyakama pitaka daana,” lea. 11 “Nyakama h  pitaka kaimala kunao nepatayaka daana,” leamo doko, baa enge nyiamo doko kandatala dopa lea.

12 Jisasame i  dokaitanya moko wasawasa pyakamaiyoo etapala dokopa baanya yonge pee ketae pingi doko nyoo petala baa dee isa petea. Isa pitipala baame dokaita lamaiyoo, “Nambame nyakamanya pyakalo doko masilyamipi? 13 Nyakamame j  namba kandao Mana Lenge Akali lata Kamongo lata pilyamino doko namba kiningi dokona dopa latamino doko epe. 14 Namba Mana Lenge Akali-kisa Kamongo dokome nyakamanya moko wasawasa pyakato kandao doko, nyakamame dopaka pyoo nyakamalapo mendenya moko wasawasa pyakamai pyakamai pyoo kalyepape. 15 Nambame k  nyakamanya pyekelyo doko mana langyoo pyekelyona dopaka pyoo kalyepape. 16 Nambame l  nyakama etete kiningi langilyona, kendemane mendeme baanya akali andake doko ita naminingi. Dee wai minao penge akali mendeme wai lao pena lelyamo akali doko ita naminingi. 17 Nyakamame m  dupa masetala pitamino kandao doko, nyakama mona yaepaseta. 18 Nambame n  nyakama pitaka kandao dopa laa naelyo. Nambame endakali yapao nyio dupa tange masingi. Dopaka doko, pii pepa pyapae singi dokonya, ‘Nambanya betesa nelyamo akali dokome namba mokotia katambalanya moko lyaa lelyamona,’ lapae singi doko angi jalanya pilyamo.

19 “Doko o  angi petala nayamopa nambame nyakama indupa pituu tee pyao langilyona, tanga angi pitamo dokopa nyakamame doko namba lamo lao masetami. 20 Nambame p  nyakama etete kiningi langilyona, endakali mendeme nambame pena lelyo akali doko lanyetamo dokome namba lanyeta. Endakali mendeme namba lanyetamo dokome namba puu leamo doko lanyetana,” lea.

Jutasame yandapipi dupa-kisa Jisasa maitamo dokonya leamo doko

(Mt 26:20-25; Mk 14:17-21; Lu 22:21-23)

21 Jisasame q  pii dutupa latala dokopa baa mona etete kenda kayapala baame lao panao lao pituu, “Nambame nyakama etete kiningi langilyona, nyakamanya mendeme namba enge nyepala nambanya yandapipi dupa laitaka pyaapomona,” lea. 22 Baame dopa lateamopa baanya disaipele dupame mende kanda kanda petala api kandao lelyape lao masala nayami. 23 Baanya r  disaipele mende baa tange auu kaenge doko baanya enombatena semai latae petea. 24 Dokopa baame api kandao lelyape lao pisina lao Saimone Pitame disaipele doko kandao langalu titi lea. 25 Dokopa akali dokome Jisasa peteasa kandapilyetala baa lamaiyoo, “Kamongo, embame api kandao leepe?” lea. 26 Jisasame s  baanya pii yanu pyakamaiyoo, “Nambame baa betesa konjepaele mende disanya poyatala maiyapona doko akali dokona,” lea. Dopa latala baame betesa konjepaele mende disanya poyao nyepala Jutasa lenge Saimone Isaketiote ikiningi doko maiya.

27 Jutasame t  betesa doko nyepeamopa, Satane baa-kisa ipao palea. Dopa peteamopa Jisasame baa lamaiyoo, “Embame piti mende yapa pii,” lea. 28 Jisasame Jutasa kandao leamo doko nee nao peteamino dupanya mendaipi mendeme aipa lao lelyape lao masala nayami. 29 Doko, u  yangi dupame Jutasame muni bokosa isingi dokonyana Napinya Kayamo Gii epe dokonya oapi daa jetamo dupa sambala pena lelyape, pande endakali tipya dupa nisoo oapi maina lelyape lao masiami. 30 Jutasame v  betesa doko nyepala yapa kamanda pea. Baa yuu iminjetae dokonya pea.

Mana enenge doko

31 Jutasa w  kamaka pateamopa Jisasame lao pituu, “Indupa Endakalinya Ikiningi doko kenge andake nyilyamo. Goteme Endakalinya Ikiningi doko-kisa kenge andake nyilyamoaka. 32 Baa-kisa x  Goteme kenge andake nyetamo kandao doko, Goteme baanya kenge andake singi doko dokopaka baa yapa maita. 33 Wane y  paluma, namba gii kuki iki nyakama-pipa katatama. Dee nyakamame namba kutao katatami. Nambame Juta endakali dupa lamaiyoliaka pyoo nyakama indupa langilyona nyakama namba pato dokonya kapa pao naipatami. 34 Mana z  setapae enenge dake nambame nyakama dilyo: nyakamame mende auu kaya kaya pyoo kalyepape. Nambame nyakama auu kaelyoli pyoo nyakamame mende auu kaya kaya pyoo kalyepape. 35 Nyakamame mende auu kaya kaya pyoo katatamino doko kandatala, endakali pitakame nyakama nambanya disaipele lamo lao kandatamina,” lea.

Pitame Jisasa nakandengena laapomona leamo doko

(Mt 26:31-35; Mk 14:27-31; Lu 22:31-34)

36 Saimone aa  Pitame baa pisoo, “Kamongo, emba anja patepe?” lea. Dokopa Jisasame Saimonenya pii yanu pyakamaiyoo, “Namba pato yuu dokonya indupa embame kapa pao namba watao naipapeno. Dopaka doko, tenda embame namba watao payatena,” lea. 37 Dokopa Pitame baa lamaiyoo, “Kamongo, indupa nambame aipuma kapa pao emba watala nayalapope? Nambame emba nisoo kumatoana,” lea. 38 Jisasame baanya pii yanu pyakamaiyoo, “Embame namba nisoo kumatepe? Nambame emba etete kiningi langilyona, yaka pauli pii laa nayatamopa paa tepomasa embame namba nakandengena laapenona,” Jisasame dopa lea.

Copyright information for `ENQ