a2:1Jo 1:43, 4:46, 21:2
b2:4Jo 7:6,30, 8:20, 12:23, 13:1
c2:5Jen 41:55
d2:6Mk 7:3-4; Jo 7:25
e2:10Lu 5:39
f2:11Eke 4:30-31; Nam 16:28-30; Lu 9:32; Jo 1:14, 4:54, 11:40
g2:12Mt 4:13; Mk 3:31; Jo 7:3, 20:17; Ap 1:15
h2:13Eke 12:1-27; Dit 16:1-6; Lu 2:41; Jo 6:4, 11:55
i2:14Nia 13:8
j2:15Mal 3:1-4
k2:16Sak 14:21; Lu 2:49; Jo 5:18
l2:17Wee 69:9
m2:18Mt 21:23; Mk 11:28; Lu 20:2; Jo 4:48, 6:30
n2:19Mt 12:38-40, 26:61, 27:40; Mk 14:58, 15:29; Ap 6:14
o2:20Mt 12:6
p2:211 Ko 6:19
q2:22Lu 24:6-8; Jo 5:39, 12:16, 14:26
r2:23Jo 4:45, 7:31
s2:25Pot 15:11; Mk 2:8; Jo 1:47-48, 6:61, 13:11

John 2

Yuu taono Kena dokonya akali mendenya enda watapae piamo doko

Duma a  dopa pyoo Galili yuu taono Kena dokonya akali mendenya enda watapae pia. Enda watapae piamo dokonya Jisasa endangi doko petea. Dee Jisasapi baanya disaiple dupapi apata dokonya epena leamiaka-pyaa. Maitakao endaki waene nao etapeaminopa Jisasa endangi dokome Jisasa lamaiyoo, “Waene nasilyamo,” lea. Dopa b  leamopa Jisasame endangi lamaiyoo, “Enda, nambanya gii doko ipatala naelyamona nambame pipenge dupa embame namba langya nayape,” lea. Dokopa c  baanya endangi dokome kalai akali dupa lamaiyoo, “Baame nyakama mende langitamo doko nyakamame watao pyepapena,” lea.

Dosa d  endaki penge kaname wasepae tokange sia. Penge dopale dupanya Juta dupame endaki kamuoo kaimbu pingima. Endaki penge dutupanya mendai mendai lawanya lenge kingi ita tukulapopi andate mende-kisa dee kingi ita lapopi dopa pyoo mende petenge. Jisasame kalai akali dokaita lamaiyoo, “Nyakamame penge datupanya endaki kamualapa,” lea. Dopa leamopa dokaitame kamuoo etete tumbasiami. Dopa peteaminopa baame dokaita lamaiyoo, “Dokonya mendatupa epapu kamuoo nyepala nee isilyamo akali doko maiya pupa,” lea. Dopa leamopa dokaitame maiya peami. Dokopa e  nee isiamo akali dokome endaki doko nao siamopa waene jia. Dopa piamopa baame anjatae nyalamipi lao masala naya. Masala nayamoaka doko, kalai akali endaki kamuoo nyiamino dupame masiami. Akali nee isiamo dokome akali enda watapae piamo doko epena latala lamaiyoo, “Endakali pitakame waene epe doko wambao nyoo mokosoo maingima. Waene epe doko napelyamino dokopa koole dupa nyoo mokosoo maingima. Dopa pingimaka doko, embame waene epe dake mee sina kayapala epapu nyoo epelenona,” lea.

11 Jisasame f  kandasoo kongali doko Galili yuu taono Kena dokonya pia. Dopa pyoo baame baanya tii pipae doko panasiamopa baanya disaipele dupame baa lao masoo miniami.

12 Doko g  etapeamo dokopa Jisasa baa baanya endangipi, kaiminingipi, baanya disaipelepi dupa-pipa Kapaneame yuu dokonya lanao pupala dokonya koto mendalapo kateami.

Jisasa losuu anda andake dokonya peamo doko

(Mt 21:12-13; Mk 11:15-19; Lu 19:45-46)

13 Jutamanya h  Napinya Kayamo Gii doko ipanya piamopa Jisasa Jetusaleme pea. 14 Pupala i  losuu anda andake kame dokonya mena pulumakawapi, sipisipipi, yaka maileopi dupa sambena lao kateamino kandata, dee muni aloo pingi akali dupa peteamino kandata pia. 15 Kandatala j  baame kende mendapua nyoo elyambu pyoo yaki petala, endakali dupa-pipa mena pulumakawapi sipisipipi dupa pyao watao kamaka pyalyia. Muni aloo pyoo peteamino dupa kanjinya nepatala toko dupa kulimbanya nepea. 16 Dopa k  petala baame yaka maileo sambena lao kateamino dupa lamaiyoo, “Nyakamame dupa nyoo pupa! Nyakamame nambanya Takangenya anda dake sambenge anda injisakala nayalapape,” lea. 17 Pii l  pepa pyapae singi dokonya, “Nambame embanya anda doko etete auumi kumilyona,” lapae singi doko baanya disaipele dupame masiami.

18 Dokopa m  Juta dupame yanu pyao baa lamaiyoo, “Embame aki kongali mende naima laitaka pitinopa naimame kandatala dake pipenge pilinona lao masetamape?” leami. 19 Dopa n  leaminopa Jisasame yanu pyao, “Nyakamame losuu anda andake dake lakyepataminopa nambame yuu gii tepoma pitona,” lea. 20 Dopa o  leamopa Juta dupame yanu pyao, “Losuu anda andake dake pyoaka kateaminopa ee kana kingi ita kitomende-kisa dee tokange peana, embame koto tepo pipilipi?” leami.

21 Dopaka p  doko, Jisasame losuu anda leamo doko baa tange kandao lea. 22 Maitakao q  Jisasa baa Takangeme malunya sakatasiamo dokopa baanya disaipele dupame wamba baame pii leamo doko masiami. Dopa petala dupame pii pepa pyapae singi dokopi Jisasame pii leamo dupapi dupa masoo miniami.

Jisasame endakali pitaka kandenge

23 Napinya r  Kayamo Gii epe dokonya Jisasame Jetusaleme katapala kongali piamo dupa endakali longome kandatala baa lao masoo miniami. 24 Dopaka doko, Jisasame dupa kandatala baame dupa-pipa kopala naya. Doko, baame endakali dupa pitaka kandenge. 25 Endakali s  mendeme baa endakalinya mana dupa lamaipenge daa. Doko, baame endakalinya mona doko kanjakao kandenge.

Copyright information for `ENQ