a15:1-2Lu 5:29-30
b15:1-24Eke 34:6; Osi 11:8-9; Lu 6:36
c15:2Lu 19:7
d15:2-3Mt 9:10-13
e15:4Ese 34:4,11,16; Lu 19:10
f15:5Ais 40:11
g15:7Ese 18:23, 33:11; Lu 15:10; Je 5:20
h15:8Lu 19:10
i15:10Ese 18:23, 33:11; Lu 15:7
j15:11Mt 21:28
k15:12Dit 21:15-17
l15:13Pot 29:3
n15:16Pot 23:21,27:7
o15:17Sak 10:9
p15:20Ais 49:14-16; Jet 31:20
q15:22Jen 41:42; Sak 3:4
r15:24Lu 19:10; Ep 2:1,5, 5:14
s15:28Jon 4:1; Lu 15:2
t15:32Ese 18:23, 33:11; Lu 19:10

Luke 15

Mena sipisipi mende alu piana lao kongali pii doko

(Mt 18:12-14)

Gii a, b  mendepa muni takisa nyingi akalipi koo mana minao paenge endakalipi dupa pitakame Jisasa kateamo dosa baanya pii sala epeami-pyaa. Dopa c, d  piaminopa akali Patasipi mana setapae masingi akalipi dupame Jisasa kandao waipi lao dapa leami-pyaa: “Akali dakeme endakali mana koo minao paenge dupa nyoo kapao nee nao pituu kalyamona,” leami-pyaa. Dokopa Jisasame kongali pii dake dokaita lamaiya-pyaa: “Akali e  nyakamanya mendenya mena sipisipi andate mendai katatamo kandao doko, dutupanya mendai mende alu pitamopa akali sipisipi tange dokome aipa pitape? Baame sipisipi kingi ita mange mendai wakyoo-kisa dee mange mendai wakyoo dutupa pau yuu mendenya katena latala mendai alu pitamo doko kutawaka pao mendasa katatamo kandatala nyepalaka kayata daape! Nyepala f  dokopa baame mona etete yaepao lataiyanya setapala soo pao andaka lai petala baanya kaita miningi endakalipi makisa katengepi dupa kambu pyamana epena lata. Dopa latala baame dokaita lamaiyoo, ‘Nambanya mena sipisipi mende alu pipumu doko kutapala kandao nyepelyona, nyakama namba-pipa mona yaepamana!’ lata. Dopaka g  pyoo kaitinya katenge dupame endakali kingi ita mange mendai wakyoo-kisa dee mange mendai wakyoo dupa epe tolatae injetala mona kapilyepenge nanjoo kalyamino dupa kandao mona yaepengema. Dopa pingimaka doko, koo mana minao paenge endakali mendeme mona kapilyilyamo doko kandatala mona etete yaepengemana lao nambame nyakama langilyona,” Jisasame lea-pyaa.

Muni mende alu piana lao kongali pii doko

Dopa h  latala dee waipa soo Jisasame dapa lea-pyaa: “Dee enda mendenya muni konde kingi ita mendai setamo dokonya mendai mende alu pitamopa baame aipa pitape? Baame lama mende kaiyepala andaka kunguma dupa polao kutakondape nyoo kutawaka pituu mendasa nyepala kayapyali daape! Nyepala dokopa baame baanya kaita miningipi makisa katengepi dupa kambu pyamana epena lao wii latala baame dokaita lamaiyoo, ‘Nambanya muni konde mende alu pipumuaka doko, indupa kutapala kandao nyepelyona nyakama namba-pipa mona yaepamana,’ enda dokome dopa lata. 10 Dokaita i  joo mana koo minao paenge endakali mendai mende mona kapilyilyamo dokopa Gotenya enjele dupame mona etete yaepengemana lao nambame nyakama langilyona,” Jisasame lea-pyaa.

Wane patange mende alu piana lao kongali pii doko

11 Dee j  Jisasame pii mende lao pituu, “Akali mendeme wane lapoma mandea-pyaana,” lea-pyaa. 12 “Wane k  laponge dokome takange lamaiyoo, ‘Apane, embanya munipi oapi moya nyepenge dupa waima minao nalimbanya mokosakate dokopa namba diti mendatupa indupa dii!’ lea-pyaa. Dokopa takange dokome baanya oapi dupa wane dolaponya mokosoloo pyakamaiya-pyaa. 13 Dopa l  peteamopa wane laponge dokome gii kuki katapala baanya oapi dupa pitakame muni nyepala baa yuu tependa mendasa patala katea-pyaa. Baame yuu dokonya katao mona napaliuu luingi mana koo dupa minao baanya muni dupa nepa nepa pia-pyaa. 14 Baanya munipi oapi dupa pitaka nepao etapeamopa baa kateamo yuu dokonya lopo andake mende siamopa baa neepi oapi etete daa joo mee katea-pyaa. 15 Dokopa baa akali yuu dokonya tange mendenya kalai mende pyakamaitoo lao pea-pyaa. Peamopa akali yuu tange dokome baanya mena
i mena Juta dupanya mana dokome mena doko etete koona lao masiamino dokome mena miningi endakali doko koakana lao masingima-pyaa.
dupa pau yuu mendenya setakao kalya pena lea-pyaa. Dopa leamopa pupala baame mena dupa setakamaiyoo katea-pyaa.
16 Kateamopa n  mena dupanya nee setakamaiyamino dupa mename nao kateaminopa baame kandatala dupanya mendapua napu laka lao masiamoaka doko, endakali mendeme baa mende namaiyami-pyaa. 17 Dopa o  petala baanya masingi tolatala dapa lao masia-pyaa: ‘Nambanya takangenya kalai akali dupa pitakame nee kakana setao nao kataminopa namba angenya katao lopome kumilyona, indupa nambame yuu dake yakinatala nambanya takange kalyamo ongonya patoo. Pupala nambame baa lamaiyoo, ‘Apane, nambame emba-kisapi Gote-kisapi koo petapu. 19 Indupa namba akali epepi mende embame kapa pao embanya ikiningina dee late daana, namba embanya kalai akali joo kata lape,’ latonana lao masia-pyaa. 20 Dopa p  lao masetala sakatao baanya takange kateasa pea-pyaa.

“Tependale mendasa epeamopa takange dokome kandatala kondo kaya-pyaa. Kondo kayapala baame alo pyao pao mangenya kopyetae sepala wane doko nunu pia-pyaa.
21 Dokopa wane dokome takange lamaiyoo, ‘Apane, nambame emba-kisapi Gote-kisapi koo petapu. Namba akali epepi mende embame kapa pao embanya ikiningi dee lapenge daana,’ lea-pyaa. 22 Dopa q, r  leamoaka doko, takange dokome baanya kendemane dupa lamaiyoo, ‘Nambanya wane dake kumia jiamo doko indupa ipame lamo. Baa alu peteamo doko indupa dee kandelyamano. Tenge dokonya nyakamame pupae lao nambanya yonge pee enomba nyoo pingi londe doko nyoo ipao baanya pyakamaiyepa! Dee kinginya pisingi liŋi doko pisakamaiyepa! Dee moko pee pingi mendalapo pyakamaiyepa! Dee mendapuame mena pulumakao yakane andapae doko nyoo ipupala pyalapa! Naimame nee nao mona yaepao pitimana,’ lea-pyaa. Dopa lateamopa dokaitame sakatatala mona yaepenge mana dupa miniami-pyaa.

25 “Dopa pyoo kateaminopa akali dokonya ikiningi mupa doko eesa katao andalyaasa ipao pituu siamopa musiki tata tata dupa lao mali lyoo kapao kalyuiyamino sia-pyaa. 26 Sepala baame kalai akali mende epena latala doko pisoo, ‘Dupa aipa pyoo kalyamipi?’ lea-pyaa. 27 Dopa leamopa kalai akali dokome baa lamaiyoo, ‘Embanya kaiminingi doko ipatapumopa embanya takaneme wane doko auu pyoo katapya lamo latala mena pulumakao yakane andapae doko pyalamona,’ lea-pyaa. 28 Dokopa s  wane mupa dokome imbutongo mandipala andaka peteamino dokonya etete napatoo lao masetala kamaka katea-pyaa. Dokopa takange dokome kamaka pyakalyetala baa andiki andiki pisoo, ‘Wane emba andaka ipupoko!’ lea-pyaa. 29 Dopa lateamopa wane dokome takangenya pii yanu pyao, ‘Nambame ee kana longo embanya kendemane joo katao yuu mendaipi mende tanga nalao embanya kalai pyaka leenoli pyoo pyekenge. Dopa pilyopa embame mena meme yakanepi mende nambanya kaita miningi dupa-pipa mona yaepao pyao nalapa lao etete dyaa naenge kandapi! 30 Dopaka doko, embanya ikini dakeme embanya oapi dupa pitaka enda akali nyele-nyele paenge dupa-kisa etasetakala pilyoo ipumopa embame mena pulumakao yakane andapae doko baanya lao pyakamaiyene lamona!’ lea-pyaa.

31 “Dokopa takange dokome baa lamaiyoo, ‘Wane, embapa nalimba koteaka lao awapa katenge. Nambanya oapi dupa pitaka embanyaka silyamo. 32 Dee t  embanya kaiminingi dake kumia jiamo doko indupa dee ipame lamo. Baa pao alu peteamo doko indupa dee kandalamano. tenge dokonya minao naimame mona yaepenge mana dupa minapenge etete jipyanya minilyamanona,’ Takange dokome dopa lea-pyaana,” lao Jisasame lea-pyaa.

Copyright information for `ENQ