a19:1Mk 10:46
b19:6Lu 1:14
c19:7Lu 5:29-30, 15:1-2
d19:8Eke 22:1; Lep 6:5; Nam 5:6-7; Lu 3:14, 12:33
e19:9Lu 3:8, 13:16; Ap 1 6:31; Lo 4:16
f19:10Mt 18:11; Lu 15:4,6,9,24,32; Jo 3:17; 1 Ti 1:15
g19:11Lu 2:38, 9:27-51, 13:22, 17:11, 18:31
h19:11-27Mt 25:14-30
i19:12Mk 13:34
j19:14Wee 2:2-3; Jo 1:11, 19:15,21
k19:17Lu 16:10
l19:26Mt 13:12; Mk 4:25; Lu 8:18
m19:27Wee 2:9
n19:28Mk 10:32; Lu 9:51
o19:32Lu 22:13
p19:362 Kiŋ 9:13
q19:38Wee 118:26; Lu 2:14, 13:35
r19:39Mt 21:15-16
s19:40Ap 2:11
t19:41-42Jet 26:1-24; Lu 13:34-35
u19:42Ais 6:9-10; Mt 13:14; Lo 11:8
v19:43Ais 29:3; Jet 6:6; Ese 4:2; Lu 21:21-24
w19:44Lu 1:68, 12:54-56, 21:6
x19:46Ais 56:7; Jet 7:11
y19:47Mk 11:18; Lu 21:37, 22:53; Jo 18:20

Luke 19

Jisasapa Sakiasapa

Dopa a  petala Jisasa yuu taono Jeteko dokonya pyakamatala taono dokonya-kaita pea-pyaa. Dokopa akali muni takisa nyingi dupanya isingi akali Sakiasa lenge mende yuu dokonya katea-pyaa. Baa akali kamongo mende-pyaa. Baame Jisasa doko aipalepe lao kandapu laka lao masiamoaka doko, endakali longome Jisasa kakopao peaminosa Sakiasa baa akali muu dokonyana baame kapa pao Jisasa kandapenge nanjia-pyaa. Dokopa baame Jisasa kanjanya baa ipatamo kaita dokonya alo pyao wambatala ita sikamo wangya mendenya pyakalyia-pyaa. Pyakalyetala ita wangya dokonya paleamopa, Jisasame paleamo dosa ipao pituu kandalyetala baa lamaiyoo, “Sakiasa, indupa namba embanya andaka pitimbanalena, emba yapa isa pyakana,” lea-pyaa. Dopa b  lateamopa baame pupae lao isa pyakanatala mona yaepao Jisasa laminao andaka pea-pyaa. Dokopa c  endakali pitakame kandatala mona koo palyoo lao pituu, “Jisasame akali mana koo minao paenge dokonya andaka pilya pelyamona,” lao waipi leami-pyaa. Dokopa d  Sakiasame toya katapala Kamongo doko lamaiyoo, “Nambame dapa pitoana, Akali Andake, embame sepe! Nambanya oapi dupa kapa kapa lao mokosetala endakali tipya dupa yangi maito. Dee wamba nambame endakali mendapuanya oapi sambo lao pake nyakamaito kandao doko, nambame waa palyoo kitomende lawame yanu pyata pyakamaito,” lea-pyaa. Dopa e  leamopa Jisasame lao pituu, “Baa Apotakame tatanya mandipayaka dokonya anda dake pyoo nyepae katapelyamo. 10 Endakalinya f  Ikiningi dokome endakali alu petae dupa kutao pyoo nyala epeana,” Jisasame lea-pyaa.

Muni mendapuanya lao kongali pii doko

11 Dokaitame g, h  pii doko sepala Jisasa Jetusaleme tengesa dokonya ipatelyamo. Gotenya isingi doko indupaka panalapomona lao masiaminosa Jisasame kongali pii mende apata dapa lamaiya-pyaa: 12 “Akali i  kenge singi mendeme yuu tependa mendakakaita pao kiŋi jetala pilyetona lao masia-pyaa. 13 Dopa lao masetala baame baanya kendemane kingi ita mende epena latala mendai mendai lao muni kina kingi ita lapoma lao mokosoo maiya-pyaa. Maitala baame dokaita lamaiyoo, ‘Nyakamame muni atupa minao namba mendakaita pao katato gii dutupanya pisinisa pyakao kalyepape,’ latala pea-pyaa. 14 Dopaka j  doko, baanya tata dokaitame baa kandao mona etete auu nakayapala akali mendapuame baa watao pena leami-pyaa. Pupala, ‘Akali dakeme naimanya kiŋi joo naima isoo nakatapyali lao masilyamanona,’ lao baa peamo yuu dokaita tange dupa lamaina leami-pyaa.

15 “Dopa leaminoaka doko, baame yuu tependa dokonya katao kiŋi jetala dee pilyoo epea-pyaa. Ipupala pupae lao wamba baanya kendemane muni maiyamo dutupa epena latala akali mendai mendai lawame, ‘Nambanya muni utupanya potopesa akipate nyekeamipi lao kandatoo,’ lea-pyaa. 16 Dokopa akali wambao epea mendeme lao pituu, ‘Akali Andake, embanya muni kina kingi ita lapo dolapo nambame minao pisinisa petakala potopesa andate lapoma nyekeona,’ lea-pyaa. 17 Dokopa k  kiŋi dokome baa lamaiyoo, ‘Kalai yaka pyekee lamo! Emba kendemane epe! Embame kalai kuki dutupa nambame leoli pyoo auu pyoo isoo pii lamo dokonya embame nambanya yuu taono dupanya kingi ita mende isatale lao nambame emba-kisa setelyona,’ lea-pyaa. 18 Dopa lateamopa kendemane lapo pyoo epea dokome lao pituu, ‘Akali Andake, nambame embanya muni kina kingi ita lapo dolapo minao pisinisa petakala potopesa andate mendai nyekeona,’ lea-pyaa. 19 Dokopa kiŋi dokome baa lamaiyoo, ‘Embame nambanya yuu taono dupanya yuungi isatale lao nambame emba-kisa setelyona,’ lea-pyaa. 20 Dee kendemane mendeme ipupala lao pituu, ‘Akali Andake, emba akali tomba neleno nambame kandenge. Akali waka mendeme opale mende setao kalyamo ongo embame nyingi kandapi. Akali waka mendeme nee pokelyamo ongonya embame yukuoo nyingi kandapi. Tenge ongonya nambame emba paka kayapala embanya muni kina kingi ita lapo dolapo kotale dakeme yaki petala setakao kateona, ae silyamo kanda,’ lea-pyaa.

22 “Dopa lateamopa kiŋi dokome akali doko lamaiyoo, ‘Kiningi, nambame tomba napala akali waka mendenya oapi silyamo dupa nyoo ee mendenya nee pokatae dupa yukuoo nyoo pingina lao embame masoo leeno. Dopa lao masetala embame namba andaka pilyoo ipato dokopa muni potopesa mendapua nyetena lao nambanya muni datupa aipuma potopesa mandenge beŋe mendenya setakala naekeepe? Emba tangeme pii leleno dutupanya nambame emba-kisa tenge setapala emba akali koo lamo lelyona,’ lea-pyaa. 24 Dopa latala baame endakali tengesa kateami dupa lamaiyoo, ‘Nambame muni kina kingi ita lapo akali doko maiyo dolapo nyakamame yukuoo nyepala muni kina andate lapoma setenge kendemane dake maiyepa!’ lea-pyaa. 25 Dopa leamopa dokaitame kiŋi doko lamaiyoo, ‘Akali Andake, embame akali maiyepa leeno dokonya muni kina andate lapoma sepelyamona,’ leami-pyaa. 26 Dopa l  leaminoaka doko, kiŋi dokome dokaita lamaiyoo, ‘Opale singi endakali dupa pitaka konda pyoo maito. Dopaka doko, opale nasingi endakali doko-kisa setamo dolapo nyokonyoto. 27 Dopana, m  namba kandao yandapipi jingima dupame wamba nambame nyakama isatale lao auu kayala nayamino dokonya nyakamame dokaita angenya laminao ipao nambanya enombasa pyao kumasalapape!’ lea-pyaana,” lao Jisasame lea-pyaa.

Akali kiŋi dupame pengemali pyoo Jisasa Jetusaleme peamo doko

(Mt 21:1-11; Mk 11:1-11; Jo 12:12-19)

28 Jisasame n  pii dutupa lao etapala baanya disaipele dupa nyoo maita pyatala Jetusaleme paanya pea-pyaa. 29 Pao Olipimanda yuu dokonya taono Betepasipa Betanipanya tengesa pyakamatala baame baanya disaipele dupanya lapoma wambao pena lea-pyaa. 30 Baame akali dolapo lamaiyoo, “Nyilyambome yuu taono yakane omo silyamo ongonya pupala mena dongi yakane wamba endakali mende napetea mende anjetae katatamo kanjambinona, doko liangao minao ipupape. 31 Dopa pitambinopa endakali mendeme nyilyambo kandao, ‘Dongi doko aipuma liangelyambipi?’ lao pisia kandeno doko, nyilyambome yanu pyao, ‘Kamongo dokome kalai mende dongi dakeme pipenge jilyamona,’ laapape,” lea-pyaa. 32 Dopa o  lateamopa dolapome pupala baame leamo dupa pitaka kandeambi-pyaa. 33 Akali dolapome dongi yakane doko liangeambinopa akali dongi tange dupame dolapo lamaiyoo, “Nyilyambome dongi yakane doko aipuma liangekelyambipi?” leami-pyaa. 34 Dokopa akali dolapome dokaita lamaiyoo, “Kamongo dokome kalai mende dongi dakeme pipenge jilyamona,” leambi-pyaa. 35 Dopa latala dongi yakane doko laminao Jisasa kateamo dokonya epeambi-pyaa. Ipupala dolapome dongi maita dokonya nyilyambonya yonge pee ketae pingi dupa kuiyatala Jisasa nyoo pisiambi-pyaa. 36 Baa p  dongi maita dokonya pituu peamopa, endakali dupame wambatala nyakamanya yonge pee dupa nyoo kaitini dokonya kuiyoo seteami-pyaa.

37 Yuu q  Olipimanda dokonya lanao ipao Jetusaleme tengesale pateamopa, baanya disaipele dupanya kambu longo mendeme wamba baame kalai pupu lapae piamo kandeamino dupa pitaka lao masoo mona yaepatala puu lao Gote lalyoo dapa lao wee leami-pyaa:

“Kiŋi epelyamo dake auu pisetaena,
Kamongo Goteme epena lapumopa epelyamo!
Goteme naima kandao mona lyuu lelyamo.
Etete Ketae Kaitinya Katenge doko lao tama pyoo katamanalena,” leami-pyaa.
39 Dokopa r  Patasi mendapua endakali longo dupa-pipa awapa payamino dupame Jisasa lamaiyoo, “Mana Lenge Akali! Embame embanya disaipele datupame pii lelyamino doko auu napilyamona, kaena lao pyalanya laa!” leami-pyaa. 40 Dopa s  leaminopa baame dupanya pii yanu pyao, “Dokaitame pii nalamili kandao doko, kana dupame kapa pao pii puu lao lamilina lao nambame nyakama langilyona,” lea-pyaa.

Jisasame yuu taono Jetusaleme doko lao ee leamo doko

41 Dokopa t, u  Jisasame yuu taono Jetusaleme dokonya tengesa ipao pituu baame yuu doko kandamatala yako lao dapa lao ee lea-pyaa: “Indupa gii dakepa yuu dakenya tange endakali dupame apata mona lyuu lasingi tenge dupa masipimili kandao doko, auu pipyali. Dopaka doko, indupa gii dakepa tenge doko yalo petae sipumopa nakandelyamino. 43 Goteme v, w  nisala epelyamo gii dake nyakamame nakandelyamino tenge dokonya tanga gii mende ipatamopa nyakamanya yandapipi dupame nyakama kame pimbatala yangi yangipi katao kakopataminopa kame pimbatae palitami. Dee endakali yuu mandanya katenge dupa yuu dama-pipa etete koyatami. Yuu damanya andapi kamepi kaname petae kalyamo datupanya mendaipi mende kalyamoli petae katena lao yandapipi dupame kayala nayatamina,” lea-pyaa.

Jisasa losuu anda andake dokonya peamo doko

(Mt 21:12-17; Mk 11:15-19; Jo 2:13-22)

45 Dokopa x  Jisasa losuu anda andake kame dokonya pupala topo setao petamino endakali dupa watao pyao pituu, “Pii pepa pyapae singi dokonya, ‘Nambanya anda doko endakalimi loma singi anda joo katatana,’ lapae silyamo. Dokapa doko, nyakamame anda dake pake nao makongao paenge endakali dupa yalo pingi kananda injisiamina,” lea-pyaa.

47 Dokopa y  baame koteaka lao losuu anda andake dokonya katao endakali dupa mana lamaiyoaka kateamopa pitisa mupapi, mana setapae masingi akalipi, endakali dupanya isingi akalipi dupame, “Baa aipa pyoo pyao kumasemape?” leami-pyaa. 48 Dopaka doko, endakali pitakame baanya pii sipuma laka lao masetala salakao siaminosa, dokaitame baa pyao kumasepenge kaita mende kandao nanyiami-pyaa.

Copyright information for `ENQ